Izarei saw zydua ta Mawsi nata Arawna chô liata paphôh ei ta, ama hnohta, “Izi râh liana kha vaw thi ha sih la a pha via awpa tlai, cha leipa chhao ta, he râhchawhpa liana heta thi sih la tlao a pha via aw!
Khazia ma zaozi ta thi awpa ta Abeipa ta he râh lâ he miah â chhi tly? Eima lapi sawzy he patupa ta y aw ei ta, Izi râh lâ kua awpa eima châta pha via vei ma?” tah ei ta.
Abeipa chô liata a ty leipa u la, cha râh liata chyhsazy cha chi hra khah u, âmo cha eima châta viahchhâ hawh deita ama châ; amâ bohna cha âmo tawhta la hapa châ ta, Abeipa eima hnohta a y mâh tâh, âmo cha chi khah u,” tah ei ta.
Châhrasala zawpi pôhpakhypazy chata Zawsua nata Kâlebâ cha alô ta vaw awpa ta pahrua ei ta. Abeipa rônahna cha Izarei saw zydua hnohta ahmaohna poh o liata a zâ luah ta.
Abeipa ta Mawsi hnohta, “He chyhsazy heta khachâ ma eina mohnao aw ei? Ama hry liata ngiana hmonoâhpazy ei taona chôta khachâ ma na ngâ leipa ta ama y aw?
Châhrasala Mawsi ta Abeipa hnohta, “Cha kyh cha Izi mo ta ama pahno pathlei aw, he zawpizy he ama hry tawhta na hmotaotheina ta nâ chhi papuapazy châ tlôh ei ta.
Izi mo ta he râh liata a pahrâpazy he chho aw ei ta, pha aw vei. He râh liata a pahrâpazy heta nâ Abeipa cha Izarei sawzy hry liata na y tahpa pahno tlôh ei ta. Nâ, Abeipa cha hmiachhypa ta cha hmô ha ei ta, na meihdo cha Izarei sawzy chô liata a duah ta, nohchhô ta meihdo tôh ta, zâ ta mei tôh ta ama hmia lâta na sie tyhpa chhao ama pahno.
‘ Abeipa ta he zawpizy he ama hnohta pie awpa ta bie â taihpa râh lâ a tlôkhei thei leipa vâ ei ta, râhchawhpa liata a thie ha ei,’ ama tah pathlei aw.
‘ Abeipa cha hiehâhna kyh liata nainôsôpa châ ta, kyhpachâna hnei hluh ngaita ta, moleina nata hmoparaonazy a ngiahthai theipa a châ. Thailei a châpazy deikua cha, hrie leipa ta y beih vei. Pawzy hmoparaona ty sawzy chô liata patlôsa ta, chhâ thôhna nata chhâ palihna taihta a patlôsapa a châ,’ tahpa ta vaw reih ha chi ta.
Na kyhpachâna rônah ngaitapa vâta, he chyhsazy hmoparaona he ngiachhiepa ta a ngiahthai la, Izi râh tawhta tahmâ taihta nâ ngiahthai lymâpa hawhta, he chyhsazy hmoparaona he a ngiahthai mah y,” tah ta.
Izi râh nata râhchawhpa liata ei rônahna nata ei hmonoâhpa taopazy hmô ha ei ta, chatana chôta ei bie a zyh leipa chyhsa zydua heta, ei hrawh tlai na pasia ei ta, ei ao nathlie veih ei.
Nâ chakaotuhpa Kâlebâ deikua he cha palôh nanopa phaoh ta, tlokhuh ta eina pazipa vâta, ano he cha a pangaipa râh tlôkhei aw na ta, a pathlazy ta râh cha ama hnei aw.
Amale mo nata Kâna mozy saikao byzy liata pahrâ tlôh ei ta, chavâta nâmo cha mylâ a lie u la, Tilaipi Saihpa lâpi lâ tawhta râhchawhpa lâ a ngia teh u,” tah ta.
“He zawpi moleipa, ei chô liata a paphôh ngâ thlâh hapazy he, khachâ ma ei chhyh thai aw ei? Izarei sawzy paphôhna, ei chô liata ama paphôhnazy he ei thei haw.
Bâh pazawhpa tlai ta nama pahrâ nawpa tao awpa ta bie ei châ taihpa ei râh cha, Zephune sawchapawpa Kâlebâ nata Nunâ sawchapawpa Zawsua tah leipa ta cha ahy hmah a ngia aw veih ei chi.
Râh nama mohparuna noh ziepa noh sypalih kha, noh kha vyuhpa ta kô kha lymâ ta, nama paraona vâta kô sypalih pasa nama tao aw; chatanachata ei ly leizie nama pahno aw.
Kei Abeipa heta ei reih: he zawpi moleipa, keima nâ dyuh awpa ta a hmaohpakhypazy chô liana heta, he hmo he tao tlai aw na ta, he râhchawhpa liana heta leidia aw ei ta, he liata ama thi aw,’ tahpa ta chho teh u,” tah ta.
Chatanachata mydi ta thyu ei ta, tlâh laki lâ khy ei ta, Mawsi hnohta, “Moh teh, eimâ khy hih, Abeipa ta bie miah â taihpa su lâ cha eima khy aw, eima vaw molei haw,” tah ei ta.