Masaba y'a fɔ Arɔn ye ko: «Fili min be kɛ ne ka sigiyɔrɔ koo la, o kunko bena kɛ e n'i dencɛw n'i bɛma Levi ka soo ta ye. Tilenbaliyako minw be kɛ sarakalasebaara la, e n'i dencɛw dama bena lɔ n'o kunko ye.
I k'i balimaw, i bɛma Levi kɔmɔgɔw gwɛrɛ i la janko u ka fara i kan k'i dɛmɛ baara la, ni e n'i dencɛw be lɔ ne ka sariyaw walakaw bilakɛsu ɲafɛ tuma min na.
Nga e n'i dencɛw dɔrɔn be se ka sarakalasebaara kɛ sarakabɔyɔrɔ la, ani ne sigiyɔrɔ la, soo cɛtigɛfani kɔfɛ. Ne be sarakalasebaara dira aw ma k'aw boɲa. Ni mɔgɔ o mɔgɔ gwɛrɛla ne la min te Levi kɔmɔgɔ ye, u k'a faga.»
Masaba y'a fɔ Arɔn ye ko: «Isirayɛlidenw be saraka minw bɛɛ bɔ ne ye, ne le b'i sigi o koow bɛɛ kunna. Ne be u di e n'i dencɛw ma ka kɛ aw niyɔrɔ ye tuma bɛɛ.
Saraka minw saniyanin lo kosɔbɛ, n'u ye olu bɔ ne ye ka n niyɔrɔ jɛnita bɔ a la ka ban, a tɔɔ bena kɛ i ta ye. U be na ni minw ye ne fɛ k'u kɛ saraka ye ne ma minw saniyanin be kosɔbɛ, a kɛra suman sarakaw ye wo, hakɛ yafa sarakaw lo wo, walima fili yafa sarakaw, olu be kɛ e n'i dencɛw niyɔrɔ ye.
Isirayɛlidenw be yɔrɔ min bɔ u ka saraka fifataw bɛɛ la, o fana bena kɛ i ta ye. Ne be o di e n'i dencɛw n'i denmusow ma, o ka kɛ aw ta ye tuma bɛɛ. I ka somɔgɔ minw saniyanin be, olu bɛɛ be se k'o dumu.
Fɛɛn ɲanaman deen fɔlɔ minw be di ne ma, olu bɛɛ ye i ta ye, begɛn fara adamaden kan. Nga i ka kan ka adamaden deen fɔlɔw falen, aw kana olu faga. Begɛn minw saniyanin tɛ, aw ka olu deen fɔlɔw fana kɛ ten.
Nga i kana misi deen fɔlɔ, ni saga deen fɔlɔ, ani baa deen fɔlɔ falen, olu ye ne ta ye. I ka olu joli seriseri sarakabɔyɔrɔ kan k'u tulu jɛni saraka ye min be jɛni pewu, n'a kasa ka di ne Masaba ye.
Isirayɛlidenw be ne tɔgɔlasaraka minw bɛɛ bɔ ne Masaba ye, ne b'u bɛɛ di e n'i dencɛw, n'i denmusow ma a ka kɛ aw ta ye tuma bɛɛ. O ye layidu cɛnbali ye, ne be min ta e n'i kɔmɔgɔw ye.»
Levi kɔmɔgɔw le ka kan ka baara kɛ Ɲɔgɔnkunbɛn fanibugu kɔnɔ, ka lɔ ni u ka fili kunko ye o yɔrɔ la. O bena kɛ sariya ye min tena dabila abada u kɔmɔgɔw bɛɛ fɛ. Levi kɔmɔgɔw tena niyɔrɔ sɔrɔ Isirayɛlidenw cɛma.
Nga Isirayɛlidenw be jaka minw bɔ k'a di ne Masaba ma, ne be olu di Levi kɔmɔgɔw ma ka kɛ u niyɔrɔ ye. O le y'a to ne y'a fɔ u ye ko u tena niyɔrɔ sɔrɔ Isirayɛlidenw cɛma.»
«Kuma Levi kɔmɔgɔw fɛ k'a fɔ u ye ko tuma min na u be Isirayɛlidenw ka jaka minɛ, ne Masaba be min di u ma ka kɛ u niyɔrɔ ye, u ka jaka bɔ o la k'a di ne ma.
A kɛra ten. N'u mana jaka minw minɛ Isirayɛlidenw fɛ, u bena fɛɛn dɔ bɔ olu bɛɛ la k'a di ne Masaba ma. Ne niyɔrɔ ye min ye o jaka nunu la, u k'o di sarakalasebaga Arɔn ma.
«A fɔ Levi kɔmɔgɔw ye ko n'u y'o fɛɛn nunu bɛɛ la ɲuman di tuma min na, a tɔɔ bena kɛ u ta ye, i n'a fɔ Isirayɛliden tɔw be to n'u ka suman n'u ka duvɛnkɛnɛ tɔɔ ye cogo min na.