×

Ika Bible 2018

Ọgụngụn 19

1
Osolobuẹ sị Mozizi lẹ Ẹrọnụ,
2
“Ọnwan wụzị ihiẹn Iwu Osolobuẹ chọ: Sị nị ndị Izrẹlụ wẹhẹni ụnụ onyẹnnyẹ-efin ufie ẹhụ a zu oke, hụn nwọnlẹni ebe ọ nọ rụ, efin wẹ gitulẹni rụn ọrụn.
3
We ẹ ye Ẹliẹza onyẹ nchụn-ẹjan; wẹ k'e wepụ a ebe ịhịan bi d'a nọ idẹnya Ẹliẹza gbu ẹ.
4
Wẹ gbugụ a, Ẹliẹza e gi mkpịnsịn-ẹka deri ẹdeke ẹ, fe ẹ ye ihun Ọdụ-ozuzu mgbe ẹsa.
5
O k'a rị e lee wẹ, a dụnkwama wẹ onyẹnnyẹ-efin hụ ọkụn: kẹ akpụkpọ a kẹ uru ẹ kẹ ẹdeke ẹ kẹ ihiẹn ndị rị imẹ ẹ.
6
Onyẹ nchụn-ẹjan ahụn sikọ d'e weri mkp'osisi sida lẹ ẹrurushin-hisopu lẹ oruru ufie, tụ wẹ ye imẹ ọkụn hụ rị a onyẹnnyẹ-efin hụ.
7
O mẹgụ, onyẹ nchụn ẹjan ahụn jẹnkọ d'a sụrịrị ẹkwa a, gi mirin wụ ẹhụ. O nwọn nwan ikẹn banhan ebe ịhịan bi, kanị o k'a rụkwọ d'e ru ama ẹnyasị.
8
Onyẹ hụn dụn efin hụ ọkụn k'a sụzịkwọ ẹkwa a, gi mirin wụ ẹhụ; o k'a rụkwọ d'e ru ama ẹnyasị.
9
“Okẹnnyẹ rụlẹni k'e kpọnkikomẹ ntụn onyẹnnyẹ-efin ahụn, kpọn ẹ ye ebe rụlẹni, ịhịan bilẹni. Ndị Izrẹlụ k'e dọnmẹ ẹ, e weri a kwademẹ mirin wẹ gi e dọn ịhịan nsọ. Ẹjan-njọ wẹ gi e wepụ ụrụ rọ.
10
“Onyẹ hụn kpọn ntụn efin ahụn k'a sụrịrị ẹkwa a; ọ k'a rụ d'e ru ama ẹnyasị. Iwuni k'a rịnị kẹ ndị Izrẹlụ kẹ abịamabịa bi imẹ igunrun wẹ jẹnrin ejẹn.
11
“Onyẹ ozun ịhịan mẹtụ k'a rụ ọrọgbọ akpọhịn ẹsa.
12
O k'e girịrị mirin hụ wẹ gi e wepụ ụrụ wụ ẹhụ nke akpọhịn ẹtọ lẹ nke akpọhịn ẹsa; ya k'o sikọ d'e gi rịzị ọchan. Omẹni o mẹni ẹrịra nke akpọhịn ẹtọ lẹ nke akpọhịn ẹsa, ọ rịkọ ọchan.
13
Onyẹ ozun ịhịan mẹtụ bụ o feni ẹhụ rị e mẹrụ Ọdụ Osolobuẹ. Wẹ k'e bepụ a imẹ ndị Izrẹlụ. Ebe o mẹ ni efekpuni w'ẹ mirin hụ wẹ gi e wepụ ụrụ, ọ rụghọ; onyẹ rụnị k'ọ wụkwọ.
14
“Ịhịan nwụntọ mmụlọ iwe ẹ, ọnwan wụ iwu ẹ: Onyẹ ọwụlẹ hụn banye ebẹhụ lẹ onyẹ ọwụlẹ rị ebẹhụ k'a rụ ọrọgbọ akpọhịn ẹsa;
15
ihiẹn ọwụlẹ wẹ kpumẹlẹni k'a rụzịkwọ.
16
“Omẹni ozun rị ogbe rọ: ozun mẹtụ ịhịan ogbe, onyẹ hụ sikọ d'a rụ ọrọgbọ akpọhịn ẹsa, kẹ hụn wẹ gi ọpịa gbu kẹ hụn nwụn ọnwụn-ẹhi; ẹrịra k'ọ rịzị onyẹ ẹhụ a mẹtụ ọkpụkpụ onyẹ nwụnnị mọbụ ili.
17
“Ịhịan gi ozun rụ, bụọrị nị ntụn onyẹnnyẹ-efin hụ, ẹjan-njọ ahụn wẹ dụn ọkụn, bụọye imẹ ihiẹn, hu mirin rị mma ye ẹ.
18
Onyẹ rụlẹni a kpagiri ẹrurushin hisopu suye imẹ mirin ahụn, fe ẹ kpu ọdụ ahụn ịhịan nọ nwụn lẹ ihiẹn rị imẹ ẹ lẹ ndị rị imẹ ẹ ogẹn ozun gi rị a. Ẹrịra kẹ w'a dọn fekpuzi onyẹ hụn ọkpụkpụ onyẹ-nwụnhụnnị mẹtụ lẹ onyẹ ili mọbụ ozun onyẹ wẹ gbu mọbụ onyẹ nwụn ọnwụn ehi mẹtụ.
19
Onyẹ rụlẹni sikọ d'e fe mirin hụ wẹ gi a rịzị ọchan kpu hụn rụnị ẹhụ nke akpọhịn ẹtọ lẹ nke akpọhịn ẹsa, mẹ ẹ rịzị ọchan nke akpọhịn ẹsa hụ, hụnyẹ a sụ ẹkwa, gi mirin wụ ẹhụ; o ru ẹnyasị ụhụọhịn hụ, ọ rịzị ọchan.
20
Kanị, ịhịan rụ bụ o dọnni enwẹn ẹ nsọ, wẹ k'e bepụ a imẹ igunrun ndị nke ẹ, makẹni o mẹrụgụọ Ọdụ-nsọ Osolobuẹ. Ebe o mẹni wẹ eke fekpu ẹ mirin ịhịan gi a rịzị ọchan, ọ rụkwọ arụ.
21
Iwuni k'a rịferi. “Onyẹ hụn fekpu wẹ mirin hụ wẹ gi rịzị ọchan k'a sụrịrị ẹkwa ya nwẹn; onyẹ ọwụlẹ mirin wẹ gi a rịzị ọchan mẹtụ k'a rụ d'e ru ẹnyasị.
22
Ihiẹn ọwụlẹ onyẹ rụnị hụatụ a rụọlẹ; onyẹ ọwụlẹ hụatụ ihiẹn hụ k'a rụ d'e ru ẹnyasị.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes