Bang’ mano, ng’at ma ok ogak nojow buch dheno, mi nodhi oole oko mar kambi, kamoro maler. Nyaka kan buruno mondo oganda jo-Israel olosgo pi mar pwodhruk, nikech dheno otimgo misango mar golo richo.
Ng’ato momulo ng’at motho, to ok nopwodhre, ochido Hema Maler mar Ruoth Nyasaye. Ng’atno nong’ad kare oko kuom jo-Israel. Pi pwodhruok ne ok kir kuome, omiyo osiko kogak.
Bang’e ng’at ma ok ogak nokaw owino mi nolut e pigno, eka nokir e hema kod e gik moko manie iye, kaachiel gi ji duto ma tho ng’atno oyudo kanyo. Ng’at momulo choke dhano, kata ng’at monegi, kata ng’at motho athoya, kata momulo liel, bende nokir pigno kuome.
Ng’at ma ok ogak nyaka kir pigno kuom ng’at mogak chieng’ mar adek gi chieng’ mar abiriyo, mi chieng’ mar abiriyo nodok mopwodhore kuom gakne. Nolwok lepe, kendo nolwokre, eka nobed maler ka chieng’ opodho.
“To ka ng’at ma ogak ok opwodhore, to nyaka ng’ad kare oko kuom ogandagi, nimar dochid Kama Ler mar Ruoth Nyasaye. Pi pwodhruok ok okir kuome, omiyo osiko kogak.