Jo-Israel nyaka buor ka ng’ato ka ng’ato ni e bwo bandech jatendgi kendo e bwo bandech dhoodgi. Ginigur hembegi molworo Hemb Romo, kendo momanyore kode.
Koro magi e dhoudi ma nogur hembegi yo wuok chieng, e nyim Hemb Romo: Jo-Juda nobed e bwo bandech kambigi, kochan e ogendgi mag lweny. Jatendgi en Nashon wuod Aminadab.
Kamano ji duto manie kambi mar jo-Juda, kochan e ogendgi, romo alufu mia achiel gi piero aboro gauchiel gi mia ang’wen. Ka oganda jo-Israel duto chako wuoth, to gin ema gikwongo.
Kamano ji duto manie oganda jo-Reuben, kochan e ogendgi mag lweny, romo alufu mia achiel gi piero abich gachiel kod mia ang’wen gi piero abich. Gin ema giniwuog mar ariyo.
Bang’gi to Hemb Romo ema nowuogi, ka kambi jo-Lawi osiko kargi e dier kambe mamoko. Ka giwuotho, to ginichanre mana kaka kambegi ochanore, ka ng’ato ka ng’ato ni e bwo bandeche.
Kamano ji duto manie kambi jo-Dan romo alufu mia achiel gi piero abich gariyo gi mia auchiel. Gin ema giniwuog achien e bwo bandechegi, kochan-gi e ogendgi mag lweny.
Mago e jo-Israel mane okwan kaluwore gi dhoutgi. Kar romb ji duto e kambi, kochan e ogendgi mag lweny romo ji alufu mia auchiel gi adek, gi mia abich gi piero abich.
Jo-Israel notimo mana kaka Ruoth Nyasaye nochiko Musa. Ne gibworo e bwo bandechegi, kendo ne giwuotho e bwo bandechegigo, ka ng’ato ka ng’ato nigi joodgi e dhoodgi mana kaka nonyisgi.