Ho boro Kanana nga bakindo Arada, nanaraka ku Negebe yo agi he ni ya aYisaraere naye ngba ga Atara gene yo, ko ki so vura kuti aYisaraere, ki zi bete yo ni zizi aboro.
Aboro ki tona ka gumba pai kuti Mbori, na kuti Mose, ki niya, “Tipagine oni akusi rani ti ni ringara Ezipeta yo ani ye ka kpika ngbakungba no? Bambiko riahe ho te, ime a te, ani nasoga gi kere riahe asoga re.”
Aboro ki ndu koyo du Mose ni, ki ya. “Ani mangi ingapai, bambiko ani gumba gbegberẽ pai kuti Yekova, na kuti ro a; mo kpári fu Yekova, ko di awo ti rani ku sa yo.” Si du Mose akpari tipa aboro ti ni.
Yekova ki ya fu Mose. “Mo mángi kpia kere wo wa we, ki moi he ri nguaha; si adú wa gere, agu aboro dunduko awo ka dewa yo, ho ni ka nibi he ni, ni ki bati.”
Mose ki mangi kpia wo rogo sirigi, ki moi he ri nguaha; si ki du wa gere, ka wo de gu boro, ho ni ka ningere ni koyo du kpia wo sirigi ni, ni ki nibati abata.
Yo i andu nunguro ni, ki zi bataya ku bani pavuru Arunona yo du rogo gu ngbakungba naye ti gu bangbanda rago nga ga aAmoro; bambiko Arunona nga gu bangbanda rago nga ga Moaba, dagba Moaba na aAmoro.
“Mo mbú rani ani susi rogo ga ringara; ani asúsa nga ku bani ku rogo ga ati te, watadu ku rogo ga ati bakakue a te; ani ambíra nga gamo aguga te; ani andú kina ngba ga Bakindo Bagene, daho ani ka susa bangbanda ga ringara ni.”
Ono Siona aida nga fu aYisaraere i susi rogo gako ringara te. Ono ko ki dungura gako aboro dunduko ki ndu sa aYisaraere ku ngbakungba yo, ki da ku Yasa yo, ki so vura kuti aYisaraere.
AYisaraere ki mangi ko na rindi basape, ki di gako ringara tona Arunona yo ki da ti di nga Yaboka, ki ndu dati kina aboro aAmona; bambiko ga aooro aAmona bangbanda ringara adu ni nyanyaki he.
Bambiko Esebona nangia gu bakporo nga ga Siona bakindo aAmoro, nga gu ko naso vura na gu bakindo naadu mbata nangia ga Moaba, ki rogo gako aringara aroga be ko dunduko, da kina ku Arunona yo.
Ako, nagberẽ he foro Moaba! Ako aboro Kemose, gaoni pai gberẽ! Ko fu awiriko wa merẽsimerẽsi aboro, na awiriko nga ade wa zizi yo, fu Siona bakindo aAmoro.
Yekova ki ya fu Mose, “Ka mo gúnde nga be ko ya; bambiko mi fu ko ku be ro, ko na gako aboro dunduko, na gako ringara; mo amánga fu ko a wa mo amangi fu Siona bakindo aAmoro, naaraka Esebona yo.”