×

Ika Bible 2018

Ọgụngụn 22

1
Ya ndị Izrẹlụ nọ jẹnshi ihun. Omẹgụ, wẹ nọ ziẹntọ alị-aradan Mụabụ, mkpẹnrẹn Iyi Jọdanị. Jẹriko rị nfetu Iyi Jọdanị ebẹhụ.
2
Balakị nwa Zipọ a hụngụọ ihiẹn ile Izrẹlụ mẹ ndị Amọ;
3
egun hụ a tụ ndị Mụabụ makẹni ndị Izrẹlụ e bukẹ ọda — egun ndị Izrẹlụ a tụkẹnmẹkẹ ndị Mụabụ.
4
Ya ndị Mụabụ nọ sị ndị-isi Midianị, “Igunrunni k'e buchanrịn ihiẹn ile nọkunmẹni ẹnyi ripụ kẹ efin dọn e richanpụ ẹfịfịa rị imẹ ogige.” Balakị nwa Zipọ ya rị a kị Mụabụ ogẹn ahụn.
5
Ọ nọ han ụkọ d'a kpọ Balaam nwa Bioru, hụn rị alị a wụ Pẹtọ, ẹhụ iyi Yufretisi. Balakị sị wẹ sị a: “D'e lee, alị ohu a ghagụọ alị Ijiptu pụha! D'e lee wẹ kẹ wẹ jun ụzọ ile! A bịagụọ wẹ d'e biri ihun m ebeni!
6
Bịa nwan d'a bụ ndịnị ọnụ, n'a karịka wẹ m ẹka! Ikẹnkwọ ị bụgụ wẹ ọnụ, ọ nị m mẹri wẹ chụpụ. Makẹni, a marịnghọ m nị ị gọzi ịhịan, ọ wụrụ onyẹ wẹ gọzi; ị bụ ịhịan ọnụ, ọ wụrụ onyẹ wẹ bụ ọnụ.”
7
Ndị-isi alị Mụabụ lẹ ndị-isi alị Midianị nọ jẹnmẹ; wẹ gihụ egho wẹ gi e fi ẹfa hụn w'e sikọ d'a kụ Balaam. E ru wẹ nke Balaam, wẹ nọ gwa a ihiẹn Balakị ku.
8
Balaam nọ sị wẹ, “Ranhịn nị ebeni cheri, m sikọ d'a gwa ụnụ ihiẹn Osolobuẹ k'a gwa m.” Ya ndị-isi Mụabụ hụ nọ sọn ẹ nọdị.
9
Osolobuẹ nọ bịa d'e kunrun Balaam, sị a, “Elee ndị wụ ndịnị yụ lẹ wẹ rị?”
10
Balaam nọ sị Osolobuẹ, “Eze ndị Mụabụ wụ Balakị nwa Zipọ zihẹni m ozi, sị:
11
‘D'e lee alị ohu gha Ijiptu pụha hụn jun ụzọ ile! Bịa nwan d'a bụnị m wẹ ọnụ. Ikẹnkwọ ị bụgụ wẹ ọnụ ọ nị m lụsọn wẹ ọgụn chụpụ.’ ”
12
Kanị Osolobuẹ nọ sị Balaam, “Y'e esọnkọ wẹ; y'a bukọ ndị ahụn ọnụ, makẹni wẹ wụ ndị wẹ gọzi agọzi.”
13
Eki e fọn Balaam nọ lihi, ọ nọ sị ndị-isi hụ Balakị zihẹ, “Lama nị, nị Osolobuẹ ekweni nị m sọnjẹn ụnụ.”
14
Ya ndị-isi alị Mụabụ nọ laburu Balakị, sị a, “Balaam ekweni sọnhẹn ẹnyi.”
15
Ya Balakị nọ hanjẹn ndị ọzọ ka ndị ibuzọ ọda ka wẹ ọghọ e nwọn.
16
Wẹ nọ bịa d'e kunrun Balaam, sị a, “Balakị nwa Zipọ sị, ‘Anịlẹ ihiẹn ọwụlẹ mẹ i abịalẹ
17
makẹni m k'a kụ ị ụgwọ ọhụnma-ọhụnma, mẹ ihiẹn ọwụlẹ i ku. Bịa d'a bụnị m ndịnị ọnụ.’ ”
18
Kanị Balaam nọ shịarị wẹ sị, “Ọsụọn'a nị Balakị kpọn siliva lẹ goru kpọnjun obi-eze ẹ, we obi-eze ẹ ye m, emẹkọ m ihiẹnanaị karị ihiẹn Osolobuẹ wụ Chuku m sị m mẹ, kẹ ihiẹn-uku kẹ ihiẹn-nta.
19
Nọdị nị nwan ebeni uhinhinni kẹ ndị ibuzọ dọn mẹ, m sikọ d'a gwa ụnụ ihiẹn Osolobuẹ k'a gwazị m.”
20
Ya Osolobuẹ nọ bịa d'e kunrun Balaam uhinhin ahụn, sị a, “Hụnnị ndịnị bịa d'a kpọ ị, sọnmẹ wẹ nwan; ka mẹhụ ihiẹn m sị ị mẹ.”
21
O ru ụtụntụn, Balaam nọ lihi ọtọ, kwademẹ jaki ẹ, sọnmẹ ndị-isi alị Mụabụ.
22
Kanị okẹn olulu nọ bu Osolobuẹ n'o jẹn ejẹn; mmọn-ozi Osolobuẹ nọ nọkin Balaam ụzọ. Balaam nyinkọ jaki ẹ; ịya lẹ idibo ẹ ẹbụọ wị.
23
Ogẹn jaki ẹ gi hụn mmọn-ozi Osolobuẹ k'o bu ọpịa-agha o sepụhagụ wuzo ụzọ, ọ nọ gha ụzọ pụ, kụye ugbo rị ebẹhụ, Balaam nọ fịan a ihiẹn, kẹn'ọ pụhazị ụzọ.
24
Ya mmọn-ozi Osolobuẹ nọ wuzo ebe ụzọ nọ mẹ warara ẹgbata alị vaịnị ẹbụọ nwọnsọnmẹ mgbọn: mgbọn rị azụụnnị lẹ azụụnnị.
25
Ogẹn jaki ahụn gi hụnzị mmọn-ozi Osolobuẹ, ọ nọ nyankụnma mgbọn, bịan Balaam ụkụ limẹn'ẹ. Ya Balaam nọ fịanzị a ihiẹn.
26
Ya Mmọn-ozi Osolobuẹ nọ shizi ihun d'e wuzo ebe ụzọ nọ mẹ warara ọda-ọda, w'a fagha afagha.
27
Jaki ahụn a hụn mmọn-ozi Osolobuẹ, o nọ gbu osekpu, hụn ahụn o bu Balaam. Ya kẹ Balaam nọ gi iwe fịan a ọkpọ o bu.
28
Osolobuẹ nọ shịapụ jaki ahụn ọnụ, ọ nọ sị Balaam, “Kị m mẹ i, i gi fịan m ihiẹn mgbe ẹtọnị?”
29
Balaam nọ sị jaki ahụn, “Y'a kparigụọ m! Omẹni m te bu ọpịa, nkẹ e gbu m'i kikẹnni.”
30
Jaki ahụn nọ sị Balaam, “Mmẹ wụ jaki i nụ — ẹlẹ mmẹ? Jaki i hụn i rị e nyin kete y'e nwọnlẹ m d'e rukwọ tannị? Ẹnịna kẹ m'e mẹ i mbụ?” Balaam nọ sị a, “Mba.”
31
Osolobuẹ nọ shịapụ Balaam ẹnya, ọ nọ hụn mmọn-ozi Osolobuẹ k'o bu ọpịa-agha o sepụhagụ ẹka, wuzo ọkpụzọ, ya Balaam nọ gbu osekpu, bu ihun kpumẹ alị.
32
Mmọn-ozi Osolobuẹ ahụn nọ sị a, “K'i fịannị jaki i ihiẹn mgbe ẹtọnị? M bịa d'e chekin i ụzọ makẹni ijẹnni i jẹnkọ jọgbu enwẹn ẹ ẹnya m.
33
Mmẹ kẹ Jaki i hụn chọma ụzọ ọzọ mgbe ẹtọnị. Omẹni o te chọmanị ụzọ, nkẹ e gbugụọ m'ị, la ya nwẹn tọ.”
34
Balaam nọ sị mmọn-ozi Osolobuẹ, “E mẹọlẹ m njọ. Amarịn m n'ị chekin m ụzọ. O mẹ nwan nị ize rị e ze i, m k'e kin azụụn lama.”
35
Mmọn-ozi Osolobuẹ ahụn nọ sị Balaam “Sọnmẹ ndị hụ, ka kuhụ ihiẹn m gwa ị.” Ya Balaam nọ sọnmẹ ndị-isi hụ Balakị zihẹ.
36
Ogẹn Balakị eze Mụabụ gi nụ nị Balaam lala, ọ nọ shikwọrị obodo ohu rị mkpẹnrẹn alị a wụ Mụabụ, ẹhụ Iyi Anọnụ, d'e kunrun Balakị.
37
Ya Balakị nọ sị Balaam, “Ẹlẹ m rị e zi wẹ d'a sị ị bịa ozigbo-ozigbo? Kị haịn i gilẹni bịa d'a za m? Ya wụ asa m ẹka kụdẹ ị ụgwọ ra?”
38
Balaam nọ sị a, “E lee m nwan, n'a bịagụọ m d'e kunrun i! Kanị, nị m sa nwan ẹka ku ihiẹn ọwụlẹ? Ihiẹn Osolobuẹ buche m ọnụ sụọ kẹ m sikọ d'e ku.”
39
Omẹgụ, Balaam nọ sọnmẹ Balakị shi Kiriatị-Huzotu.
40
Balakị nọ gi efin lẹ atụnrụn chụn ẹjan, weri anụ imẹ ẹ ye Balaam lẹ ndị-isi Mụabụ Balakị wẹhẹ.
41
Eki e fọn, Balakị nọ weri Balaam, shi elu ugu Bamotu Baalụ, ọ nọ gha ebahụn legha ụfọdụ ndị rị imẹ igunrun Izrẹlụ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes