Nā, rite tonu tā Pāraka i mea ai ki ngā mea i kōrerotia e Paraama; ā, whakaekea ana e Pāraka rāua ko Paraama he pūru, he hipi, ki tētahi āta, ki tētahi āta.
Nā, ka mea a Paraama ki a Pāraka, “E tū ki te taha o tāu tahunga tinana, ā, ka haere ahau; tērā pea a Ihowā e tūpono mai ki ahau. Ā, me kōrero atu e ahau ki a koe te kupu e whakakitea mai e ia ki ahau.” Nā, ka haere ia ki tētahi puke hamore.
Nā, ka tūpono a Ihowā ki a Paraama; ā, ka mea ia ki a ia, “Kua oti i ahau ngā āta e whitu, kua whakaekea anō hoki he pūru, he hipi, ki tēnei āta, ki tēnei āta.”
Nā, ka ara tāna kī pepeha, ka mea: “Nā, Pāraka kīngi o Moapa ahau i ārahi mai i Arame, i ngā maunga o te rāwhiti, i mea: ‘Haere mai hei kaikanga māku mō Hākopa; haere mai hoki hei whakatara ki a Īharaira.’
Tēnei hoki ahau kei te tihi o ngā kāmaka e titiro atu ana ki a ia, e kite atu ana i a ia i runga i ngā pukepuke. Nanā, he iwi noho ko ia anake, e kore anō hoki e tāua i roto i ngā tauiwi.
Mā wai e tatau te puehu o Hākopa, e titiro rānei te maha o te whakawhā o Īharaira? Hei te mate o te hunga tika he matenga mōku, kia rite hoki tōku whakamutunga ki tōna!”
Nā, ka mea a Pāraka, ki a Paraama, “He aha tāu e mea nei ki ahau? I tīkina atu koe e ahau hei kanga i ōku hoariri, nā, kua manaakitia rawatia rātou e koe.”
Nā, ka mea a Pāraka ki a ia, “Tēnā, haere mai tāua ki tētahi wāhi kē atu, e kite ai koe i a rātou. Ko tō rātou pito tāu e kite ai; e kore hoki koe e kite i a rātou katoa; ā, hei reira puaki ai i a koe tāku kanga mō rātou.”
Nā, ka kawea ia e ia ki te māra o Topimi, ki te tihi o Pihika, ā, hangā ana e ia e whitu ngā āta, whakaekea atu ana hoki e ia he pūru, he hipi, ki tēnei āta, ki tēnei āta.
Ā, ka haere atu ia ki a ia, nā, e tū ana ia i te taha o tāna tahunga tinana, rātou ko ngā rangatira o Moapa. Ā, ka mea a Pāraka ki a ia, “I pēhea mai te kupu a Ihowā?”
Ehara te Atua i te tangata e teka ai; i te tama rānei a te tangata e puta kē ai ōna whakaaro. Tērā rānei ia e kōrero, ā, kore ake e mahi? E puaki rānei tāna kupu, ā, kāhore e mana?
“Kāhore i tirohia e ia he kino i a Hākopa, kāhore anō hoki i kitea he tutū i a Īharaira. Kei a ia a Ihowā, tōna Atua, kei roto hoki i a rātou te hāmama a te kīngi.
He pono kāhore he mākutu mō Hākopa, kāhore anō hoki he whaiwhaiā mō Īharaira. Hei tēnei wā anō ka kōrerotia a Hākopa, āe rā, a Īharaira, ‘Anō te mahi a te Atua!’
Nanā, ka whakatika te iwi ānō he raiona kātua, ka ara ake anō hoki ānō he raiona; e kore e takoto, kia kainga rā anō te tūpāpaku, kia inumia hoki ngā toto o te parekura.”
Nā, ka whakautua e Paraama, ka mea ki a Pāraka, “Kāhore ianei ahau i kōrero ki a koe, i mea, ‘Ko ngā mea katoa e kōrero mai ai a Ihowā, ko tēnā tāku e mea ai’?”
Nā, ka mea a Pāraka ki a Paraama, “Tēnā, me kawe koe e ahau ki tētahi atu wāhi; tērā pea e pai te Atua kia whakapuakina e koe i reira tāku kanga mō rātou.”