1
Kẹ ndị Izrẹlụ rị Shitim, ikẹnnyẹ wẹ nọ ghẹrẹsọn ikpoho alị Mụabụ.
2
Ikpoho ndị hụ nọ wejẹnmẹ wẹ ebe wẹ nọ a rụa mmọn wẹ. Ndị Izrẹlụ ahụn hụ e sọn wẹ e ri, a kụnị mmọn ndị ahụn isi alị.
3
Ẹrịra kẹ Izrẹlụ dọn banyeni wẹ femẹ Baalụ ndị Pioru; Osolobuẹ nọ gi olulu sọn wẹ.
4
Osolobuẹ nọ sị Mozizi, “Weri ndị-isi ndị Izrẹlụ ile, n'i nọ ihun Osolobuẹ hogbu wẹ ebe eki rị elu, kẹni olulu Osolobuẹ rọ ebe ndị Izrẹlụ rị.”
5
Ya Mozizi nọ kpọ ndị-isi Izrẹlụ, sị, “Onyẹ-onyẹ imẹ ụnụ ya gbu ndị nke ẹ sọn wẹ rụa Baalụ alị Pioru.”
6
Ogẹn ahụn hụra, onyẹ Izrẹlụ ohu nọ webanhan okpoho onyẹ Midianị iwe wẹ idẹnya Mozizi lẹ igunrun ndị Izrẹlụ ile ebe wẹ ile rị Ọnụ-mgbọn Ọdụ-ozuzu a kwan.
7
Ogẹn Finẹhasị nwa Ẹliẹza nwa Ẹrọnụ onyẹ nchụn-ẹjan gi hụn ihiẹnni, ọ nọ gha imẹ igunrun ahụn pụha, buru obo,
8
sọnmẹ okẹnnyẹ Izrẹlụ ahụn, jẹn d'e kunrun ẹ imẹ ọdụ o bi. Ọ nọ gi obo ahụn zupu wẹ ẹbụbụọ: ọ gha ẹhụ hụn okẹnnyẹ wụ onyẹ Izrẹlụ banye d'e zupu hụn okpoho ẹfọ. Ebahụn kẹ ọnwụn gbumẹgụ ndị Izrẹlụ nọ kụsị —
9
kanị ọnwụn hụ e gbuọlẹ madụ nnụ-uku ẹnọ kwasị ọgụn (24,000).
10
Ya Osolobuẹ nọ sị Mozizi,
11
“Finẹhasị nwa Ẹliẹza nwa Ẹrọnụ onyẹ nchụn-ẹjan a rọgụọ olulu m rị e busọn ndị Izrẹlụ, makẹni o giọlẹ ụdị ẹnya rị a ụfụnị m shi ọnwụn kẹni wẹ ye m ọghọ m; ịya haịn m gizilẹni gi ẹnya-ụfụ gbupụ wẹ.
12
Gwa a nwan nị m rị e kwe ẹ nkwa m pụ-ichẹn n'o jẹnkọ d'a rịn'a mma.
13
Ya lẹ ebozo ẹ sikọ nwan d'e nwọnrin ọrụn ndị nchụn-ẹjan jẹnrin ejẹn, makẹni ẹnya a fụghọ a n'e yeni wẹ Chuku ẹ ọghọ, ihiẹn ahụn o mẹ k'o gi gbarị isi ndị Izrẹlụ.”
14
Ẹfan onyẹ Izrẹlụ hụ wẹ gbugbama ya lẹ okpoho Midianị wụ Zimri nwa Salu, hụn wụ onyẹ-chẹn ikpụlọ imẹ ebọn Simiọnụ.
15
Ẹfan okpoho Midianị hụ wẹ gbu wụ Kọz'bi nwa Zọ. Zọ nẹdi ẹ wụzị onyẹ-ndu ebọn imẹ ndị Midianị.
16
Osolobuẹ nọ sị Mozizi,
17
“Mẹmẹ ni ndị Midianị kẹ ndị-iṅẹnrẹn; e gbu ni wẹ —
18
makẹni wẹ mẹ ụnụ kẹ ndị-iṅẹnrẹn ebe wẹ nọ dufie ụnụ d'e fe mmọn-Baalụ alị Pioru lẹ imẹ oku Kọz'bi nwẹnẹ wẹ, hụn nẹdi ẹ wụ onyẹ-ndu alị wẹ Midianị, okpoho hụ wẹ gbu ogẹn hụ ọnwụn gi rị e gbu ndị Izrẹlụ yeni oku Pioru.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc