Mon badha paraban se gi' apolong bengko ban eppa'na aneyat ka PANGERAN, ban eppa'na ta' alarang e bakto ngedhing parkara jareya, paraban buru kodu neptebbi neyadda ban janjina jareya.
Tape mon e bakto eppa'na ngedhing parkara jareya pas ta' magi ana'na aneyat kantha jareya, paraban jareya ta' wajib neptebbi neyadda ban janjina. Bi' PANGERAN babine' jareya bakal esapora'a sabab ta' ebagi bi' eppa'na.
Mon badha babine' se gi' ta' alake andhi' neyat otaba andhi' janji, ban se aneyat otabana ajanji jareya la epekker gallu otabana ta' kalaban epekker gallu, neyat otabana janji jareya kodu elakone. Mon e budhi are babine' jareya alake, gi' wajib neptebbi neyat otaba janjina, sokor lakena ta' arassa berra' e bakto ngedhing parkara jareya.
Tape mon e bakto se lake' ngedhing parkara jareya pas ta' magi binena aneyat kantha jareya, babine' jareya ta' wajib neptebbi neyat otaba janjina jareya. Bi' PANGERAN babine' jareya tanto esapora.
Tape mon e bakto lakena ngedhing parkara jareya pas ta' magi binena aneyat kantha jareya, babine' jareya ta' wajib ngessa'agi neyadda otabana neptebbi janjina. Bi' PANGERAN babine' jareya tanto esapora, sabab babine' jareya ta' ebagi se lake'.
Tape mon e baktona ngedhing parkara jareya lakena ta' alarang, babine' jareya kodu ngessa'agi sakabbinna neyadda ban janjina. Lakena ngedine binena andhi' neyat otabana janji jareya sabab e bakto ngedhing parkara jareya ta' alarang.
Mon e budhi are lakena maburung neyat otabana janjina binena jareya, lakena jareya se kodu nanggung okomanna Pangeran polana se maburung neyat ban janjina binena jareya.