×

Bibilia Ilagano Lya Kale 2019

Kūbala 30

1
Hūna ū Musa ūbawīla a batongeeji ba Baisilaeli, Ū SEEBA wafunije shilagīlo alīhaya gīkī,
2
“Ūlū munhū ūfunya shilahīlo shose shose kūlī SEEBA, nūūlū witunga wei ng'wenekīlī mu mhayo nebe, atizūgalūcha maganiko, alīyo shing'wigeleelilwe kwīshikīlīja pyī īyo walahīla kwīyīta.
3
Ūlū munhya ūfunya shilahīlo kūlī SEEBA, nūūlū witunga wei ng'wenekīlī mu mhayo nebe, alīyo ūbiza ataalī ha ng'wawe,
4
hūna ū ise ūng'wigwa, gwike ūleka kūng'wīla mhayo gose gose, ū būlahīji wakwe ūbo wabūfunije īkūng'wigeleelwa kūbūshikīlīja; nūūlū ī mihayo īyo witungile wei ng'wenekīlī.
5
Alīyo ū ise ūlū wīyigwa ī mihayo īyo walahīlaga nūūlū witungaga wei ng'wenekīlī muyo, hūna ūnemeja, ītūbiza na nguzu; ū SEEBA akūntaligūla nguno ū ise wang'hamaga.
6
Ūlū ūtoolwa alīyo amalile kūfunya shilahīlo, nūūlū amalile kūhaya mhayo gose gose gwa kūntunga aho atamanile,
7
hūna ū kū shikū ja kū būtongi ū ngoshi ūlū wīyigwa ī yenīyo alīyo ūhuumūla dūhū, ūleka kūhaya nūūlū mhayo gose gose; a henaho akwigeleelwa kūshishikīlīja ī shilahīlo shakwe, nūūlū ī mihayo īyo yītungile.
8
Alīyo ū ngoshi ūlū wigwa hūna ūnemeja, ī shilahīlo shenīsho nūūlū ū mhayo ūyo witunga gwenūyo gūkūbiza gwamalagwa ī nguzu. Ū SEEBA akūntaligūla ū mu shilahīlo shenīsho.
9
Ū nkīma ūyo atī na ngoshi kūlwa kūchīlwa, nūūlū kūlwa kūbūlaga numba, ūlū ūfunya shilahīlo shose shose, nūūlū mhayo gwa kūntunga, ī yenīyo īkūntunga wei ng'wenekīlī.
10
Nū nkīma ūyo atoolilwe ūlū ūfunya shilahīlo, nūūlū ūhaya mhayo gose gose gwa kūntunga,
11
hūna ū ngoshi wīyigwa īyo walahīlile nūūlū īyo witungile yenīyo, alīyo ūneka gīko dūhū yaya nūūlū kūng'wīla mhayo gwa kūng'hūgūla, nūūlū gwa kūnemeja, a henaho ī shilahīlo nūūlū ī mihayo īyo witungile īkwigeleelwa kūshikīlījiwa.
12
Alīyo ū ngoshi ūlū wīyigwa ī mihayo yenīyo hūna wīlema nūūlū ūng'hūgūla, a henaho shilahīlo shose shose īsho shafuma ū mu nomo gwakwe shitūbiza na ngunzu, nguno ū ngoshi wang'hūgūlaga, na lūūlū ū SEEBA akūntaligūla.
13
Ū nkīma ūyo atoolilwe ūlū ūlahīla, nūūlū ūhaya mihayo ya kūntunga, ū ngoshi adūgije kwīyinha nguzu ī mihayo yenīyo nūūlū adūgije kwībūlaga yūgaya ī nguzu.
14
Gwike ū ngoshi ūlū wīyigwa ī mihayo yenīyo alīyo wikala ahuumūlile dūhū shikū jose, a henaho akūbiza aloolecha gīkī ī shilahīlo shakwe nī mihayo īyo yīntungile ni yongejage ū kūntunga. Ūlū wīyigwa ī mihayo yenīyo alīyo ūhuumūla dūhū, akūbiza alizunīlīja nayo.
15
Alīyo ūlū nose ūūkahaya mhayo kū kale, hū kūhaya akūbiza wa kūsayīlwa ūlū ūbiza wingīlile mu būhūbi ū nke wakwe.”
16
Ī shilagīlo shenīshi ū SEEBA akanagīīla ū Musa nguno ya koolecha ī mihayo īyo īng'wigeleelilwe munhū kwīmana kūlwa nke wakwe; nūūlū myaji kūlwa nshīke wakwe ūyo alī ha kaya, atatoolilwe.
Sukuma Bible 2019
Sukuma Bible Society of Tanzania, 2019
:
Save Notes