Mawsi ta zawpizy hnohta, “Midia mo chô liata Abeipa phuh lana patlôsa awpa ta sie awpa ta, nama hry liata chapawzy cha adyuhna chariah chhaichhi ta tobi teh u.
Chatanachata Izarei saw sâh hluhpi hry tawhta chi kha tawhta sâh kha chyu papua ei ta, pheisaih thy kha nata sâh no cha, adyuhna lâta sie awpa ta chariah chhaichhi ta tobi ei ta.
Mawsi ta âmo cha adyuhna lâ pasiesa ta, chi to hry tawhta sâh kha chyu pua ei ta, theihthaipa Eliaza sawchapawpa Phinehâ chhao, hmobaoh pathaihpazy nata biepie nawpa ta chiahmiezy chabapa ta adyuhna lâ sie hra ta.
Midia beizy chhao, ama chyhsa thiepazy hry liata thie pâ hra ei ta, Midia bei papangawh, Ivi, Reke, Zuri, Hurâ nata Rebâ nata Beô sawchapawpa Bâlâma chhao zaozi ta ama thie haw.
Izarei sawzy ta Midia chanôzy nata ama hawtizy cha sei ta a chhi ei ta, ama viahchao zydua, ama mietaku zydua nata ama hmobaoh zydua hraona sôh ta la ei ta.
Seizy, sahrohzy nata hraopazy cha, Zerikô dady Zawdâh kiapâh ta Môabâ bypi riehmo liata a ypa Mawsi nata theihthaipa Eliaza nata Izarei zawpizy lâ vaw tlô khei ei ta.
Mawsi cha adyuhna chakaona rai lâ tawhta a vaw tlôpa pheisaih hyutuhpa, sâh kha chô liata hyutuhpazy nata za kha chô liata hyutuhpazy chô liata a pathi ia ta.
Pachâ teh u, âmo kha Bâlâma ryhraona ta Peô liata Izarei sawzy Abeipa chô liata paraona a pataosatuhpazy châ ei ta, âmo vâta Abeipa chyhsazy chô liata potlana a vaw tlôpa kha.
Riehmo khôtho lâ noh sari a rie aw ei chi ta, ahy rai chyhsa a thiepa nata ama thiepa a hriapa maih, nâmo chhao, nama seizy chhao, noh thôhna noh nata noh sarina noh ta namâ pathaisa aw.
mei ta a parao thei leipa maih cha, mei liata pasiesa aw ei chi ta, chatanachata a vaw pathaih aw. Cha thota pathaisana ti ta pathaisa pâ awpa a châ. Mei ta a parao theipazy deikua cha, ti liata nama pasiesa aw.
Adyuhna lâ a siepa pheisaihzy tawhta Abeipa châta thyuna khei aw ei chi ta, za pangawh liata miakha lymâ ta, chyhsapazy, viahchaozy, alâzy, mietakuzy nama khei aw.
Izarei sawzy ta khophie ama topa tawhta, sypangawh liata miakha lymâ ta, chyhsapazy, viahchaozy, alâzy, mietakuzy, miezy nata sahroh zydua khei aw ei chi ta, Abeipa achhyna byureih mohôhtuhpa Livai chizy nama pie aw,” tah ta.
Abeipa ta Mawsi bie a piepa hawhta, Izarei sawzy ta khophie ama topa tawhta, Mawsi ta chyhsapa nata sahrohzy tawhta, sypangawh liata miakha lymâ ta la ta, Abeipa achhyna byureih mohôhtuhpa Livai chizy hnohta a pie ei.
Chatanachata Mawsi nata theihthaipa Eliaza ta a sâh chô liata hyutuhpazy nata a za chô liata hyutuhpazy tawhta ngôh cha a hlâh ei ta, Izarei sawzy ta Abeipa hmiakô liata amâ thei thlâh ha nawpa ta, ahmaohna poh o chhôh liata a ngiakhei ei ta.