“Byela Vaisraele leswaku ndzi ri: Etindhawini leti ti nga ta va ndzhaka ya n'wina, mi fanele ku nyika Valevhi miti leyi va nga ta tshama eka yona, mi va tsemela ni madyelo ya swifuwo ku rhendzeleka ni miti ya kona.
Miti leyi Valevhi va nga ta tshama eka yona, yi ta va ya vona, ni madyelo ya kona ma ta va ya mintlhambi ya vona ya tihomu, ni ya swifuwo leswin'wana hinkwaswo.
Kutani madyelo lawa ma nga ta rhendzela miti ya Valevhi, ma ta va ni matlhelo lama ringananaka, ma va 1 km; Valevhi va ta dyisela kona swifuwo swa vona.
Miti leyi nga ta nyikiwa Valevhi eka ndzhaka ya nyimba yin'wana ni yin'wana, yi fanele ku fambelana ni ntalo wa vanhu va nyimba yoleyo; eka nyimba leyi nga ni vanhu lavo tala, Valevhi va ta nyikiwa miti leyo tala, kasi eka nyimba leyi nga ni vanhu vatsongo, Valevhi va ta nyikiwa miti yitsongo.”
Miti leyi, vadlayi va ta ya tumbela eka yona loko va chava ku dlayiwa hi varihiseli; hikowalaho munhu loyi a dlayeke un'wana, a nga ka a nga fi a nga si avanyisiwa hi ntshungu.
Miti leyi ya 6 yi ta va vutumbelo bya n'wina ni vaendzi va n'wina ni lava luveleke exikarhi ka n'wina; munhu un'wana ni un'wana loyi a dlayaka un'wana, kambe ku nga ri ha vomu, ú ta tsutsuma a ya tumbela emitini ya kona.
kumbe loko a ba nala wa yena hi xibakele a n'wi dlaya, munhu loyi ú ta va ri mudlayi, kutani ú fanele ku dlayiwa na yena. Murihiseli ú ta dlaya mudlayi loyi siku a n'wi kumaka.
Kumbe a nga hoxa ribye leri ringaneke ku dlaya munhu, a nga swi vonanga leswaku ku ni munhu, kutani ribye ri ba munhu loyi a fa, kasi a a nga ri nala wa yena, naswona mudlayi a a nga tiyimiselanga ku n'wi vavisa.
Eku avanyiseni ka wona, ntshungu wu ta sirhelela mudlayi eka murihiseli, kutani wu tlherisela mudlayi emutini wo tumbela eka wona, laha a a tsutsumele kona, leswaku a ya tshama kona, ku kondza loko ku lova Muprista lonkulu loyi a vekiweke entirhweni hi ku cheriwa mafurha layo hlawuleka enhlokweni.
a ya hlangana ni murihiseli ehandle ka xivandla xa muti lowu, kutani murihiseli a dlaya mudlayi, murihiseli a a nga vi na nandzu wa ku va a dlayile munhu.
Mudlayi ú fanele ku tshama emutini lowu a nga ya a ya tumbela eka wona, Muprista lonkulu a kondza a lova. Loko Muprista lonkulu a lovile, mudlayi a nga ha timukela.
Mudlayi un'wana ni un'wana ú ta dlayiwa ntsena loko ku ri ni timbhoni; ku nga tshuki ku va ni munhu ni un'we loyi a dlayiwaka hikwalaho ka vumbhoni bya munhu un'we ntsena.
Mi nga tshuki mi nyamisa tiko leri mi tshamaka eka rona, hikuva ngati yi nyamisa tiko, naswona ku hava mhamba leyi yi nga basisaka tiko ehandle ka ku halata ngati ya mudlayi loyi a halateke ngati ya munhu un'wana.