Mu matuku onso a tshijila tshiandi kabateki dihaya ha mutu nʼandi, neikale mundi wa tshijila tô ne hashikisheye matuku adiye musue kubijidila kudi Yehowa; nsuki ya ha mutu nʼandi neyikale mile.
Bikala muntu mukusuke tshituha tshibi hehi nʼandi, ne bikala mutu wa tshijila tshiandi muonyibue, nunku yeye neabeye nsuki ya ha mutu nʼandi mu dituku didiye mudilengeshe, neadibeye nsuki dituku dia muanda mutekete.
muakuidi neafile umue bu mulambu wa kubuikila nʼau bubi ne mukuabo bu mulambu wa kuosha ha kahia, neamubuikidile bubi buandi buakenzeye bua muntu mufue, neajidile mutu wandi dituku adi mene.
Yeye neujidile Yehowa matuku a tshijila tshiandi, nealue biandi ne muana mulume wa mukoko wa tshidimu tshimue bu mulambu wa kubuikila nʼau bihanga diandi, kadi matuku a diambedi adi hatuhu bualu bua tshijila tshiandi tshiakadi tshionyibue.
neafile mulambu wandi kudi Yehowa, muana mulume wa mukoko udi kayi ne tshilema wa tshidimu tshimue bu mulambu wa kuosha ha kahia, ne muana mukashi wa mukoko udi muakane wa tshidimu tshimue bu mulambu wa kubuikila hau bubi, ne tshimpanga tshidi tshiakane bu mulambu wa kuvuisha nʼau ditalala,
ne tshisaka tente ne mampa adi kayi ne luevene, ne mikata yakenzabo ne bukula bubotesha ne manyi, ne mikata idi kayiyi ne luevene ne manyi mela ha mutu hai, ne mulambu wa bukula ne mulambu wa bintu bia kunua.
neafile tshimpanga bu mulambu wa kuvuisha nʼau ditalala kudi Yehowa ne tshisaka tshia mampa adi kâyi ne luevene, muakuidi neafile kabidi mulambu wa bukula ne mulambu wa bintu bia kunua.
Munazi neabeye nsuki ya ha mutu ku mbelu kua ntenta wa kusambakena neangate nsuki, neayiteke ha kahia kadi kuinshi kua mulambu wa kuvuisha nʼau ditalala.
Muakuidi neangate diboko dia tshimpanga diakalambabo, ne mutanda wa mampa adi kâyi ne luevene mu tshisaka, ne mukata udi kauyi ne luevene, neabiteke mu bianza bia Munazi hashikisheye kubeya mutu wandi,
Eu udi mukenji wa Munazi udi uditshiha, ne mulambu wa tshijila tshiandi kudi Yehowa, ha mutu ha bintu bidiye mumanye mua kufila bu kuditshiha kuakaditshiheye nʼaku mbudiye nʼabu mbua kuenza bu mudi mukenji wa tshijila tshiandi.