Dhabuna PANGERAN ka Mosa, “Kabala ka Harun mon nyaba' damar se papetto' e ko'-tongko'na, soro saba' pateppa' me' olle nyonare bagiyan adha'na ko'-tongko'na damar jareya.”
kalaban cara se kantha reya: reng-oreng jareya ketesse aeng kaangguy opacara panyocceyan, saellana pas soro acokor sabalattrana badanna ban nyassa kalambina. Kalaban cara se kantha jareya reng-oreng jareya berse.
Saellana pas soro ngala' sape lake' se gi' ngodha settong sarta kurban sasajin dhari teppong se paleng bagus ecampore mennya'. Bariya keya sape lake' laen settong kaangguy kurban pangamponanna dusa.
Reng-oreng Isra'il jareya pas kodu nompangngagi tanangnga ka attassa cethagga sape lake' se dhadhuwa' jareya; se settong kodu eatorragi menangka kurban palebbaranna dusa, ban settonganna kaangguy kurban obbaran. Kalaban upacara se kantha jareya oreng Lewi esocce'e.
ban reng-oreng Lewi jareya bi' Sengko' epassra'agi ka Harun ban na'-ana'na, menangka tor-atorra bangsa Isra'il me' olle ngenneng ngalakone kawajiban kaangguy oreng Isra'il e dhalem Tang Kemah. Bariya keya sopaja reng-oreng jareya nyo'onnagi sapora kaangguy bangsa Isra'il sopaja bangsa jareya ta' ekennenga balai mon nyander tasemma' gallu ka kennengngan se socce jareya.”
Oreng Isra'il ngalakone sabarang se edhabuwagi PANGERAN ka Mosa parkara oreng Lewi. Kalaban cara se kantha jareya oreng Lewi narema ha' kaangguy alako e dhalem Kemah Socce, se epimpin bi' Harun ban tra-pottrana.