Tanyarau Yesu ngirukitos keng lutomon ka ngiarei tochunak wapei, sodi kitogogong kesi topedoreta akitwarakin ngipean ka akitangalekin ngidekesinei ka ngilekesinei daang.
Ngirora a ngimeanara alutomon ka ngiarei kesi lu: lo ekingaren ngesi Simon (lo anyaritae Petero) ka lokaatokeng Andirea, Yakobo ka lokaatokeng Yoana lu araakasi ngide a Sebedayo,
Nakaneni ani keya ngitunga a awi kori ere lu nyikitepeyonete kori nyikipupokinete esi, torotokisi kaneni tokurwosi ngalup a ngakejen akamaluwot kidodiu ibore ngini atamar esechito kesi.
“Topupokisi, kamearit ayong esi loger a ngamesekin ana eya kiding ngipeei. Ejoikinit esi iliworosi lukachwaak loger a ngimunio nabo lukaalimok loger a ngakurio.
Ani kiboliatar kesi esi alore a eche, toloto lore loche. Kalimokinit iteni dir atamar, nyirumorete etich kus alorerea a Isirael kadaang eringa Lokookeng a Itwaan nyebonguno.
Itemokino ni itatamio ikwaanikin ka eketataman keng, kori ekasuban etich ikwaanikin ka ekapolon keng. Ani kenyaritae ekapolon a awi Beelsebul, enyarao ngitunga a awi kangina a ngirora aluaronok noi.
Nakaneni itwaan cha daang ni epegi alongaren ngitunga atamar meere ngesi itwaan kang, apegi ayong dang alongaren Apa kang lo eyei nadis atamar nyayeni ngesi.
“Nyitemokino itwaan ni emina apakeng ka itiokeng noi akidwang ayong eliwor erukitos kang. Nyitemokino ni emina lokookeng kori nakookeng kesidwang ayong eliwor erukitos kang.
Itwaan cha daang ni itepeyoni emeanara a Akuj ani eraakar ngesi emeanara a Akuj, emorete ka ngesi ebachit keng. Itwaan cha daang ni itepeyoni itwaan niajokon ani ejokia ngesi, emorete ka ngesi ebachit keng.