1
यहूदिआ मिनखा क अरामहाळा दिन ईसु अर बाकाळा चेला खेता क मांयनैऊँ जार्या हा जणा चेलानै भूख लागी इ ताँई बे खेत मऊँ ग्युं की बाळ्या तोड़-तो'ड़र खाबा लाग्या।
2
फरिसी बानै अंय्यां करता देख ईसुनै बोल्या, “थारा चेला अरामहाळा दिन बो काम क्युं करै जखो आपणा नेम-कायदा म बरजेड़ो ह।”
3
ईसु बाकी बाता सुणर बानै बोल्यो, “थे सास्तर म ओ कोनी बाच्या क जद दाऊद अर बिकाळा सिरी भूखा हा जणा बे काँई कर्या हा?
4
बो आपका सात्या क सागै परमेसर का तम्मू म जार परमेसर क चढाईड़ी रोट्या खाई जानै याजक सिवाय ओरनै बरजेड़ो हो।
5
थे मूसा का नेम-कायदा म ओ कोनी बाच्या क अरामहाळा दिन मनदर का याजकई बिमै अरामहाळा दिन का नियमनै तोड़ै ह जणा बी बानै कोई क्युंई कोनी बोलै।
6
पण म थानै खेऊँ हूँ अठै जखो ह बो मनदरऊँ बी बडो ह।
7
ज थे सास्तरा म जखो मांडेड़ो ह बिकै बारां म जाणता तो थे ओ बी जाणता की म मिनखाऊँ ओ चाऊँ हूँ क बे दया करीं नइ क ज्यानबरा की बलि चढावीं। जिऊँ थे बा मिनखानै जखा खरा हीं दोसी नइ बताओ।
8
क्युं क मिनख को बेटो अरामहाळा दिन को बी परबु ह।”
9
ईसु बठैऊँ चालर यहूदि मिनखा की अरदास करबाळी झघा गयो।
10
बठै एक मिनख हो बिकै एक हात क हवा भेगी ही, बठै क्युंक मिनख हा बे ईसु प दोस लगाबा ताँई बुज्या, “अरामहाळा दिन खिनै निरोगो करबो ठिक ह के?”
11
ईसु बानै बोल्यो, “म थानै बुजूँ हूँ जिकै कनै एक लल्डी हो अर बा खाडा म पड़ज्या जणा थे अरामहाळा दिन बिनै बारनै कोनी काडो के?
12
जदकी मिनख को मोल तो लल्डीऊँ बेत्ती ह। इ ताँई अरामहाळा दिन भलाई करबो चोखो ह।”
13
जणा ईसु बि हवा भेयड़ा मिनखनै बोल्यो, “तेरा हातनै सिदो करले।” बो हातनै सिदो कर लिओ अर बिको हात दुसरा हात की जंय्यां पेली हो बंय्यांई निरोगो होगो।
14
जणा बे फरिसी बठैऊँ चलेग्या अर ईसुनै कंय्यांसिक मारां इकी साजिस रचबा लाग्या।
15
ईसु बाकी चाल समजगो अर बठैऊँ चलेगो। पण भीड़ बाकै गेल होलिनी। ईसु सगळा रोगलानै निरोगो कर्यो।
16
ईसु बा मिनखानै चेतायो, “थे मनै परगट मना करो।”
17
ओ इ ताँई होयो जंय्यां क यसाया परमेसर की खेबाळो जखो बचन खया ह बे पूरा होवै,
18
“देखो ओ मेरो दास ह जिनै म टाळ्यो हूँ, ओ मेरो लाडलो ह, जिऊँ म बोळो राजी हूँ। म मेरी पबितर आत्मा इकै उपर उतारस्युं, अर ओ धरती का सगळा मिनखा म हेलो पाड़सी क परमेसर ईमानदारीऊँ बाको न्याय करसी।
19
ओ नइ तो खिऊँ लड़सी, अर नइ गळी-कुचळ्या म कूकसी।
20
जद ताँई बो धरती प धारमिक्ता नइ फेलादे बो खिनई नास कोनी करै। चाए कोई अटकेड़ी पान्नी की जंय्यां हो नहिस दिआ की बुत्तबाळी लोय की जंय्यां कमजोर हो।
21
अर धरती का सगळा मिनख बिका नाम पई आस लगासी।”
22
लोग ईसु कनै एक मिनखनै ल्याया जिमै फेंट होईड़ी ही जिकी बजेऊँ बो आँदो अर गुँगो हो अर ईसु बिनै निरोगो कर दिओ जिकी बजेऊँ बो देखबा अर बोलबा लागगो।
23
लोग इनै देखर ताजूब म पड़गा अर खेबा लाग्या क, “ओ दाऊद को बेटा मसी ह?”
24
पण फरिसी बाकी बातानै सुणर खेबा लाग्या, “ईसु भूता का नाथ बालजबुल की सक्तिऊँ बानै काडै ह।”
25
ईसु बाकी हिया की बातानै जा'णर बाऊँ बोल्यो, “जि राजपाट म फूट पड़ज्या जणा बिको नास होज्यावै ह। अर जि नगरी नहिस घर म फूट पड़ज्या जणा बो कंय्यां बस्यो रेह सकै ह?
26
अर ज सेतान सेतान कोई बेरी होबा लाग्यो जणा बिको राज कंय्यां बण्यो रेह्सी?
27
अर ज म बालजबुल की मददऊँ ओपरी बलायानै भगाऊँ, जणा थाकाळा चेला बी बालजबुल की सक्तिऊँ भगाता होगा? जणा इ बात ताँई बेई थानै गळत साबित करसी।
28
अर ज म परमेसर की पबितर आत्माऊँ ओपरी बलायानै भगाऊँ, जणा इऊँ आ साबित होवै ह क परमेसर को राज थारै सांकड़ैई ह।
29
ज कोई मिनख कोई तगड़ा मिनख को घर लूटबो चावै ह जणा पेली बि घर का तगड़ा मिनखनै बांदसी बिकै पाछैई बि घरनै लूट सकै ह।
30
जखो मेरै सागै कोनी बो मेरै खिलाप अर जखो मिनखानै मेरा चेला होबा ताँई भेळो कोनी करै बो बानै मेरूँ दूर लेज्यावै ह।
31
इ ताँई म थानै खेऊँ हूँ मिनखा का मुंडाऊँ करेड़ी सगळी बुराई अर पाप माफ हो सकीं हीं, पण जखो पबितर आत्मा की बुराई करै ह बिनै माफी कोनी।
32
अर ज कोई मिनख का बेटानै भलो-बुरो खेवै ह जणा बिनै परमेसर माफ कर सकै ह। पण जखो मिनख पबितर आत्मा क खिलाप क्युं खेवै ह जणा बिनै नइ तो इ जुग म अर नइ आबाळा जुग म माफी ह।
33
“थे जाणो हो ज थानै फळ खाणो ह तो थानै फळ कोई दरख्त लगाणो पड़सी, क्युं क हर दरख्त क खाबाळा फळ कोनी लागै। अर दरख्त आपका फळाऊँ पिछाण्यो जावै ह।
34
हे सपोलो! जद थेई बुरा हो जणा थारै मुंडाऊँ चोखी बाता कंय्यां बोलस्यो? क्युं क जखो मांयनै होसी बोई बारनै आसी।
35
चोखो मिनख आपका चितऊँ चोखी बात काडै अर बुरो बुरीई चितै।
36
पण न्यायहाळै दिन सगळा मिनखानै आपकी खेईड़ी बुरी बाता को लेखो देणो पड़सी।
37
क्युं क तेरी खेईड़ी बाता की बजेऊँई तनै दोसी नहिस निरदोस साबित कर्यो ज्यासी।”
38
सास्तरानै सीखाबाळा अर फरिसी ईसु कनै आया अर बे ईसुऊँ बोल्या, “ओ गरूजी थे म्हानै कोई ईस्बर नगरी की सेलाणी दिखाओ।”
39
पण ईसु बाऊँ बोल्यो, “इ जुग की बुरी अर कुकरमी पिडी ईस्बर नगरी की सेलाणी माँगै ह। पण म थानै खेऊँ हूँ योना परमेसर की खेबाळा की बातानै छोडर कोई सेलाणी आ लोगानै कोनी दिखाई ज्यासी
40
जंय्यां योना तीन दिना ताँई मछी क पेट म रिह्यो हो बंय्यांई मिनख को बेटो बी तीन दिना ताँई धरती तळै रेह्सी।
41
जद न्याय होसी बि दिन निनवे नगरी का मिनख इ जुग का मिनखा क सागै खड़्या होसी अर आपै दोस लगासी क्युं क निनवे का मिनख योना को परचार सुणर पापऊँ तौबा कर लिआ हा। पण अठै जखो ह बो योनाऊँ बी बडो ह।
42
सिबा की राणी न्यायहाळै दिन इ पिडी प दोस मंढसी क्युं क बा धरती का इ कूणाऊँ बि कूणा म सुलेमान कनै ज्ञान लेबा गई ही पण अठै जखो ह बो सुलेमानऊँ बी बोळो बडो ह।
43
“जद कोई सूगली ओपरी बलाय मिनख मऊँ निकळै ह। जणा बा अराम ढुंढती उजाड़ म डोलै अर जद बिनै बठैबी अराम कोनी मिलै।
44
जणा बा खेवै ह म मेरा पुराणीया घर म जिमैऊँ म आई हूँ पाछी चली जास्युं। अर बा पाछी आवै जणा बो बिनै भार्यो-झाड़्यो अर जच्यो-जचायो लाधै।
45
जणा बा जार खुदऊँ बी सात बुरी ओपरी बलायानै आपकै सागै कर बिकै मांयनै बड़ जावै। अर बि आदमी की दसा पेलड़ीऊँ घणी बुरी होज्यावै। इ जुग का मिनखा की दसा बी अंय्यांई होसी।”
46
जद ईसु भीड़ऊँ बतळार्यो हो जणा बठै बाकी माँ अर भाईड़ा आर बारनै खड़्या होगा। बे ईसुऊँ बातचित करबा ताँई बिनै उडिकबा लाग्या।
47
जणा भीड़ मऊँ कोई मिनख ईसुनै बोल्यो, “थारी माँ अर भाईड़ा बारनै खड़्या हीं बे थारूँ बाताचिता करबो चावै ह।”
48
ईसु बिकी इ बातनै सुणर बिनै बोल्या, “कूण मेरी माँ ह अर कूण मेरो भाई ह?”
49
अर ईसु आपका चेला कानि हात कर बोल्यो, “देखो अ मेरी माँ अर भाईड़ा हीं।
50
क्युं क जखा बी मिनख मेरा ईस्बर नगरी परम-पिता की इंछ्या गेल चालै ह बेई मेरा सागे भाई-भाण अर माँ ह।”
Shekhawati Bible 2010
(c) 2010-2017, New Life Computer Institute.