Soke o lio gale foroko cherdilo zuralo, ta pe kanenchar asunen phare, ta phangle pe akha te na dikhen, ta phangle pe kan te na asunen cherde le te na acharen te na irinpe mande te sastarav len.
Chachimaia phenav tumenge, kai but poraukura ta i chache manusa mangle te dikhen so tumen dikhen ta ni dikhle, ta te asunen so tumen asunen ta ni asunde.
Kana vareko asunel e orba katar e charoina ta ni acharel la, avel o bilacho ta lel so saia thodo ande leko lio, gaia si e simicha kai pelitar pasa o drom.
A e simicha kai peli maskar e karrne si sargo gola llene kai asunen e Devleki orba, a e briga te cheren love ande gava sueto, ta o volipe kai si len po barvalipe kojaven len ta sa gala ezgode tasaven e orba e Devleki, ta ni muken len te den septelie ande lende.
A e simicha kai peli pe lachi phuv, si sargo gola llene kai asunen e orba e Devleki ta acharen la ta den septelie, ta den stotina, sovardes, ta tranda pe iek.
Mai sukar muken te barion e dui pe iek than lligo ni ka avel o vreme te chiden o lliu, ondaka ka phenav e eslugenge: mai anglal chiden e bilache patra ta phanden len pe umpe ta phabaren len, a o lliu chiden le ande mi soba.
O Jesus ande aver paramichi phenda lenge gia: E charoina e milosoki si sargo e simicha katar e mostasa kai iek manus lia la ta thoda la ande chik katar pi umal.
Chachimaia voi si e mai minoni katar sa e simiche, a kana bariol cherdol e mai bari katar o vostano, ta cherdol sargo iek kas, gia baro kai e chiriklia llan ta cheren pe kuibura pe leke krangura.
O Jesus ande aver paramichi phenda lenge gia: E charoina e Devleki si sargo e levadura kai lia iek diskinia ta thoda la ande iek umpa arina ta sa goia arina phukhili.
Ondaka kana o Jesus mukla e llenen ta dia ando cher, avile pasa le leke disipulura ta phende leke: Sikau amen so phenel e paramichi katar e patra e bilache.
O dusmano kai chudia e bilachi simicha si o llavolo, o vreme kana chidelpe o lliu si kana ka avel o son e phuviako, a e llene kai chiden o lliu si e suechura.
Ta i e charoina e milosoki si sargo iek barvalipe gurudino ande iek umal kai iek lleno malavel ta guruvel le pale, ta llal veselimaia ta bichinel sa so si le ta chinel goia umal.
O Jesus phenda lenge: Goleke suako kovachi e zakonoko llanglo ande charoina e milosoki si sargo iek dad kai si le porodo kai ikanel katar po barvalipe ezgode neve ta i purane.
Ta avilo kai pi phuv, ta sikavela ande khanllira e judionenge kai sea kote. Ta e llene chudinape ta phenena: ¿Katar lel gua bizaipe ta cherel gala bare ezgode Devlikane?