×

現代台語譯本羅馬字版

馬太福音 14

1
Hit-sî, Ka-lī-lī hun-hong ê ông Hi-lu̍t thiaⁿ-tio̍h Iâ-so͘ ê miâ-siaⁿ,
2
chiū tùi i ê pō͘-hā kóng, “Chit-ê lâng sī Si-sóe-chiá Iok-hān, i í-keng tùi sí-lâng tiong koh-oa̍h, só͘-í chiah ū koân-lêng kiâⁿ chiah-ê sîn-jiah.”
3
Goân-lâi, Hi-lu̍t ūi-tio̍h i ê sió-tī Hui-le̍k ê bó͘ Hi-lô-tí ê iân-kò͘ ū lia̍h Iok-hān, kā i liān--khí-lâi, koaiⁿ-lo̍h kaⁿ.
4
In-ūi Iok-hān tiāⁿ-tiāⁿ tùi i kóng, “Lí chhōa chit-ê hū-jîn-lâng chòe bó͘ bô ha̍p-hoat.”
5
Hi-lu̍t siūⁿ-beh kā i thâi, put-kò kiaⁿ kûn-chiòng, in-ūi in lóng siūⁿ-kóng i sī sian-ti.
6
Hi-lu̍t choh-siⁿ-ji̍t ê sî, Hi-lô-tí ê cha-bó͘-kiáⁿ tī lâi-pin bīn-chêng thiàu-bú; Hi-lu̍t chin hoaⁿ-hí,
7
chiū chiù-chōa tah-èng hit-ê cha-bó͘ gín-á bô-lūn kiû sím-mi̍h lóng beh hō͘ i.
8
Cha-bó͘ gín-á hō͘ lāu-bú sái-lōng, chiū kóng, “Chhiáⁿ chiong Si-sóe-chiá Iok-hān ê thâu-khak khǹg tī pôaⁿ--ni̍h hō͘ góa.”
9
Ông ê sim chin kan-khó͘, put-kò in-ūi í-keng tī kùi-pin ê bīn-chêng chiù-chōa, chiū bēng-lēng chiàu só͘ kiû--ê hō͘ i.
10
Ông chhe lâng khì kaⁿ--ni̍h chām Iok-hān ê thâu,
11
chiong thâu-khak hē tī pôaⁿ--ni̍h, kau hō͘ cha-bó͘ gín-á, cha-bó͘ gín-á chiū phâng-khì hō͘ i ê lāu-bú.
12
Iok-hān ê bûn-tô͘ lâi siu i ê sin-si khì bâi-chòng, jiân-āu khì kā Iâ-so͘ pò-kò.
13
Iâ-so͘ thiaⁿ-tio̍h chit-ê siau-sit chiū lī-khui hia, kan-ta ka-kī chē-chûn thè-khì phian-phiah bô lâng tòa ê só͘-chāi. Chi̍t tōa-tīn lâng thiaⁿ--tio̍h chiū tùi ta̍k siâⁿ-chhī kiâⁿ-lō͘ tè I.
14
Iâ-so͘ chiūⁿ-hōaⁿ, khòaⁿ-tio̍h chi̍t tōa-tīn lâng chiū khó-lîn in, i-hó in ê pīⁿ.
15
Hông-hun-àm, bûn-tô͘ óa-lâi kā I kóng, “Chia sī phian-phiah ê só͘-chāi, thiⁿ mā teh àm ah; chhiáⁿ kā kûn-chiòng kái-sàn, hō͘ in thang ka-kī khì hù-kūn ê chng-siā bóe chia̍h-mi̍h.”
16
Iâ-so͘ ìn kóng, “In m̄-bián khì, lín hō͘ in chia̍h.”
17
Bûn-tô͘ tùi I kóng, “Lán chia chí-ū gō͘ ê piáⁿ, nn̄g bé hî.”
18
Iâ-so͘ kóng, “The̍h-lâi chia hō͘ góa.”
19
I chiū kiò chèng-lâng chē tī chháu-po͘, jiân-āu the̍h hit gō͘ ê piáⁿ kap nn̄g bé hî, ǹg thiⁿ kám-siā; piáⁿ peh-khui, the̍h hō͘ bûn-tô͘, bûn-tô͘ chiū pun hō͘ chèng-lâng.
20
Tāi-ke lóng chia̍h, chia̍h kàu pá. Bûn-tô͘ khioh chia̍h chhun ê chhùi-sut-á, móa cha̍p-jī nâ.
21
Chia̍h ê lâng, hū-jîn-lâng kap gín-á bô sǹg, iok ū gō͘-chheng ê ta-po͘-lâng.
22
Iâ-so͘ sûi-sî pek bûn-tô͘ chiūⁿ-chûn seng kè-khì tùi-bīn hōaⁿ, I ka-kī lâu teh kái-sàn kûn-chiòng.
23
Kûn-chiòng sì-sòaⁿ liáu-āu, I ka-kī chiūⁿ-soaⁿ kî-tó. Thiⁿ àm ê sî, I iáu ka-kī chi̍t ê tī hia.
24
Hit-sî, chûn í-keng lī hōaⁿ chin hn̄g, in-ūi chìⁿ-hong hō͘ éng poah-lâi-poah-khì.
25
Thiⁿ beh kng ê sî, Iâ-so͘ tī ô͘ ê téng-bīn ǹg bûn-tô͘ hia kiâⁿ--khì.
26
Bûn-tô͘ khòaⁿ-tio̍h I tī ô͘ ê téng-bīn teh kiâⁿ, chin tio̍h-kiaⁿ, kóng, “Sī kúi!” In kiaⁿ kah tōa-siaⁿ hoah--chhut-lâi.
27
Iâ-so͘ sûi-sî kā in kóng, “An-sim, sī góa, m̄-bián kiaⁿ!”
28
Pí-tek ìn kóng, “Chú ah, nā chin-chiàⁿ sī lí, bēng-lēng góa kiâⁿ chúi-bīn khì lí hia.”
29
Iâ-so͘ kóng, “Lâi!” Pí-tek chiū tùi chûn-téng lo̍h--lâi, kiâⁿ chúi-bīn khì Iâ-so͘ hia.
30
Pí-tek chi̍t-ē khòaⁿ-tio̍h hong hiah-ni̍h tōa chiū kiaⁿ, soah beh tîm--lo̍h-khì, tōa-siaⁿ hoah, “Chú ah, kiù--leh-o͘h!”
31
Iâ-so͘ sûi-sî chhun-chhiú kā i khiú--teh, kóng, “Sió-sìn ê lâng, sī-án-chóaⁿ teh giâu-gî?”
32
In chiūⁿ-chûn, hong chiū tiām--khì.
33
Chûn-téng ê lâng kūi lo̍h-khì pài I, kóng, “Lí chin-chiàⁿ sī Siōng-tè ê Kiáⁿ!”
34
Iâ-so͘ kap bûn-tô͘ kè ô͘ liáu-āu, tī Kek-nî-sat-le̍k chiūⁿ-hōaⁿ.
35
Hit só͘-chāi ê lâng chi̍t-ē jīn-chhut Iâ-so͘, chiū phài lâng khì sì-chiu-ûi kā só͘-ū ê pīⁿ-lâng lóng chhōa-lâi I hia.
36
In khún-kiû Iâ-so͘ hō͘ pīⁿ-lâng kan-ta bong I saⁿ-á-ku ê chhiu chiū hó; só͘-ū bong--tio̍h ê lâng lóng tit-tio̍h i-hó.
Chinese TTVR
The Bible Society in Taiwan
:
保存笔记