1
Kana o Jesus dia gala orbe llelotar katar e Galilea ta avilo ande phuv katar e Judea kai si pe o goia rig katar o Jordan.
2
Llelo pala le baro sueto, ta sastarda len isto kote.
3
Ondaka nesave fariseura avile pasa o Jesus ta te zumaven le puchle le: ¿Sai o manus mukelpe katar pi rromi pala varesavi ezgoda?
4
O Jesus phenda: ¿Ni chitisarden kai mai anglal kana o Del cherda e manusen, cherda len murus ta diskinia?
5
Ta phenda: Goleke o murus ka mukel pe dade ta pe da te avel pe rromiaia, ta e dui ka aven sargo iek manus
6
Goleke von inai dui, akana von si iek, Goleke o manus morabi te na fulavel so o Del thoda ande iek than.
7
Ondaka e fariseura phende leke: ¿A soke o Moises mukla amenge e alava kai o murus sai tradel pe rromia te dela la iek lil kai mukelpe latar?
8
O Jesus phenda lenge: Isto soke tumaro lio si zuralo, o Moises mukla te muken tumare rromien, a mai anglal ni saia gia.
9
A me phenav tumenge kai gua kai mukelpe katar pi rromi, te na avelape kai voi lleli avere rromea, i vou cherel kurvaluko te zinilape averiaia.
10
Leke disipulura phende leke: Te si gia gala ezgode maskar e zinime, avela mai sukar e muruseke te na zinilpe.
11
Ondaka o Jesus phenda lenge: Nesave llene ni acharen gala ezgode, samo gola kai si lenge dino sai acharen len.
12
Pala but ezgode nesave manusa nasti zininpe, nesave biandon eunukura, averen cheren len eunukura a aver pala e charoina e Devleki ni zininpe. Ko sai acharel gaia ezgoda te acharel la.
13
Ondaka ande kai o Jesus nesave minonen te thovel pe va pe lende ta te molilpe, a e disipulura die pe llene kai anena e minonen.
14
Ondaka o Jesus phenda: Muken e minonen te aven mande ta na achaven len, soke lengi si e charoina e milosoki.
15
Ta kana thoda pe va pe lende, llelotar kotar.
16
Ondaka avilo pasa o Jesus iek manus ta puchla le: Kovachi lachea, ¿Savi ezgoda lachi morabi te cherav te avel man o zivoto ostade?
17
O Jesus phenda leke: ¿Soke ikhare man lacho? Niko inai lacho samo iek: O Del. A te mangea te de ando zivoto, guruv e zakonura.
18
O terno puchla le: ¿Save zakonura? O Jesus phenda leke: Na mundar, na cher kurvaluko, na chor, na ikan bune,
19
de liubao che dade ta che da, ta volisar avere sar voli tu tut.
20
O terno phenda leke: Sa gola ezgode ia cherdemlen sar kana sema ternorro. ¿So ios trubul man te cherav?
21
O Jesus phenda leke: Te mangea te ave chachimaia orta, lla bichin so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.
22
Kana o terno asunda gaia orba, llelotar zalbaia, soke saia but barvalo.
23
Ondaka o Jesus phenda pe disipulonenge: Chachimaia phenav tumenge kai si but trudno iekhe barvaleke te del ande charoina e milosoki.
24
Pale o duito phenav tumenge kai mai lesno si iekhe devake te nakhel katar e iak iekhe suviaki, neko te del iek barvalo ande charoina e Devleki.
25
Kana e disipulura asunde gaia orba chudisaile ios mai but, ta phenena: A te si gia, ¿ko ka avel braduime?
26
O Jesus dikhla pe lende ta phenda lenge: E manusa nasti cheren gava, a o Del sa sai cherel.
27
Ondaka o Pedro phenda leke: Amen muklam sa so saia amen, ta llelam pala tu. ¿So ka avel amen?
28
O Jesus phenda lenge: Chachimaia phenav tumenge, kai kana ka avel o vreme kana sa ka avel nevipe, kana o Chavo e Manuseko ka besel po trono barimako, tumen kai llelen pala ma, ka besen pe desudui tronura barimake te chinen e kris pe desudui viche katar o Israel.
29
Ta sa gola kai pala ma mukle cher, phlalen, phiorren, dade o dea, o chaurren o phuvia, ka len stotina droma mai but, ta i ka len o zivoto ostade.
30
A but llene kai akana si mai anglal, ka aven e mai palal, a but llene kai akana si mai palal, ka aven e mai anglal.
Romani Ursari Bible 2018
Biblia ande chib Romani Sociedad Bíblica Chilena, 2018