ta phenda lenge: Llan ando forichi kai si angla tumende ta oma ka malaven iek magarcha phangli ta iek magarchichi laia. Mukliaren la ta anen len mande,
Ta o sueto kai llala anglal katar o Jesus ta i o sueto kai llala palal urkina ta phenena: ¡Osana Chavo e Davideko! ¡Blagosime gua kai avel ando anav e Devleko! ¡Osana upre ando miloso!
O Jesus dia andre ando cher e Devleko ta tradia avri sa golen kai chinena ta bichinena ta dia tele moia e stalia golenge kai pharruvena e love e suetoke, ta i e estoliche golenge kai bichinena e gulubura,
A e mai preche popura ta i e kovacha e zakonoke jolaile kana dikhle e bare ezgode kai cherela ta sar blagosina le e ternorre ando cher e Devleko ta sar phenena: ¡Osana e Chaveke katar o David!.
Ta phende e Jesuseke: ¿Asune so phenen gala? O Jesus phenda lenge: Ea ¿a tumen nikada ni chitisarden?: Katar o mui e ternorrengo ta katar o mui e minonengo kai pien chuchi, tu thodan o blagosipe.
Ta kana dikhla iek kas simochinengo pasa o drom, avilo pasa le ta dikhla kai ni saia niso po kas samo patrina, ondaka phenda e kasteke: ¡Te na barion nikada pe tute septelie!
Ondaka o Jesus phenda lenge: Chachimaia phenav tumenge kai te avela tumen pachape ta te na avela tumen o mislo kai nasti cherdol, ni ka cheren samo gava katar o kas simochinengo, soke ka phenen gale burdoke: Le tut ta chude tut ande mora ta gia ka avelpe.
Mapalal katar gala ezgode o Jesus dia ando cher e Devleko. Ta kana vou sikavela e llenen, e mai preche popura ta e phure katar o foro avile pasa le ta puchle le: ¿Save gazdarimaia chere gala ezgode? ¿Ta ko dia tut gava gazdaripe?
¿Ko bichalda e Juane te kristil, o Del, o e manusa? Von thode te janpe maskar pete, ta phenena: Te phendam, katar o del, ka phenel amenge: ¿A soke ni pachaien le?
O Jesus puchla len: ¿So mislin tumen katar gaia paramichi? iek manus saia le dui chaurre ta avilo pasa iek ta phenda leke: Chaurrea lla allive te radi ande mo vostano drakhako.
¿Savo chaurro katar e dui cherda e volia pe dadeki? Von phende: O purvo. O Jesus phenda lenge: Chachimaia phenav tumenge kai e publikanura ta i e kurvichke llan mai anglal tumendar ande charoina e Devleki.
Soke avilo tumende o Juan po drom chachimako ta ni pachaien le, a e publikanura ta e kurvichke pachaie le. A tumen i kana dikhlen sa gala ezgode ni keisailen te sai pachan le.
Asunen aver paramichi: saia iek manus kai saia dad katar iek familia kai thoda te barion drakha ande iek vostano, ta phangla o vostano truial ta lacharda iek than te cherel mol ta vazdia iek cher ta mukla gua vostano drakhako kai iek manus te cheren buchi ta llelotar dur.
A e llene kai radina ando vostano drakhako kana dikhle leke chaurre, phende maskar pete: Gava si o lleno kai ka achel leke sa e love leke dadeke, aide, mundara le ta la sa leke love.
Ondaka o Jesus puchla len: ¿Nikada ni chitisarden so phenel o Pisipe? O barr kai ni thode leke sama e llene kai vazden chera cherdilo o barr mai preche. Gava cherda o Del, ta amen chudi amen.