×

現代台語譯本羅馬字版

馬太福音 23

1
Āu-lâi, Iâ-so͘ tùi kûn-chiòng kap I ê bûn-tô͘ kóng,
2
“Keng-ha̍k-kàu-su kap Hoat-lī-sài-phài ê lâng chē Mô͘-se ê ūi kóe-seh Lu̍t-hoat.
3
Só͘-í, in só͘ kā lín kóng--ê, lín lóng tio̍h chòe, tio̍h chun-siú; put-kò m̄-thang o̍h in ê hêng-ûi, in-ūi in ōe-kóng bōe-chòe.
4
In chiong lâng taⁿ bô hoat ê tāng-tàⁿ khún hō͘ lâng taⁿ, ka-kī liân chi̍t ki chńg-thâu-á to m̄-khéng tín-tāng.
5
In só͘-ū ê hêng-ûi lóng sī beh chòe hō͘ lâng khòaⁿ, in-ūi in chiong ka-kī ê keng-bûn-tē chòe khah khoah, saⁿ-á-ku ê chhiu chòe khah tn̂g.
6
In ài tī iàn-hōe chē tōa-ūi, tī hōe-tn̂g chē koân-ūi,
7
tī chhī-tiûⁿ-kháu hō͘ lâng chhéng-an, hō͘ lâng chheng-ho͘ ‘lia̍p-pí’.
8
M̄-kú lín m̄-thang hō͘ lâng chheng-chòe ‘lia̍p-pí’, in-ūi lín chí-ū chi̍t ūi ‘Lāu-su’, lín lóng sī hiaⁿ-tī chí-bē.
9
Tī tōe-chiūⁿ, lín m̄-thang chheng-ho͘ lâng chòe ‘lāu-pē’, in-ūi lín chí-ū chi̍t ūi ‘Lāu-pē’, chiū-sī tī thiⁿ-téng Hit-ūi.
10
Lín mā m̄-thang hō͘ lâng chheng-chòe ‘kàu-su’, in-ūi lín chí-ū chi̍t ūi ‘Kàu-su’, chiū-sī Ki-tok.
11
Lín tiong-kan siōng-tōa--ê tio̍h chòe lín ê chhe-ēng.
12
Thê-ko ka-kī--ê, ōe siū kàng-kē; khut-kē ka-kī--ê, ōe siū ko-seng.”
13
“Ké-hó ê keng-ha̍k-kàu-su kap Hoat-lī-sài-lâng, lín chhám ah! Lín chiong Thian-kok ê mn̂g koaiⁿ--khí-lâi, m̄ hō͘ lâng ji̍p--khì; lín ka-kī m̄ ji̍p--khì, liân beh ji̍p--khì ê lâng mā m̄ hō͘ in ji̍p--khì.
14
15
“Ké-hó ê keng-ha̍k-kàu-su kap Hoat-lī-sài-lâng, lín chhám ah! Lín ūi-tio̍h beh hō͘ chi̍t ê lâng kái-chong ji̍p-kàu, thiⁿ-piⁿ-hái-kak kiâⁿ-thàu-thàu. Hit-ê lâng ji̍p-kàu liáu-āu, lín soah hō͘ i pìⁿ-chòe tōe-ge̍k ê kiáⁿ, pí lín têng-pē pháiⁿ.
16
“Chhiⁿ-mî chòe chhōa-lō͘--ê, lín chhám ah! Lín kóng, ‘Lâng kí Sèng-tiān chiù-chōa bô chún-sǹg, m̄-kú nā kí tiān-lāi ê kim-khì chiù-chōa chiū tio̍h siú.’
17
Lín chiah-ê tòng-gōng koh chhiⁿ-mî ê lâng ah, tó chi̍t hāng khah tiōng-iàu? Sī kim-khì á-sī hō͘ kim-khì chiâⁿ-chòe sîn-sèng ê Sèng-tiān?
18
Lín koh kóng, ‘Lâng kí chè-tôaⁿ chiù-chōa bô chún-sǹg, nā kí chè-tôaⁿ téng ê chè-mi̍h chiù-chōa chiū tio̍h siú.’
19
Lín chiah-ê chhiⁿ-mî ê lâng ah, sī chè-mi̍h á-sī hō͘ chè-mi̍h chiâⁿ-chòe sîn-sèng ê chè-tôaⁿ, tó chi̍t hāng khah tiōng-iàu?
20
Só͘-í, lâng kí chè-tôaⁿ chiù-chōa, chiū-sī kí chè-tôaⁿ kap hit téng-bīn só͘-ū ê chè-mi̍h chiù-chōa.
21
Lâng kí Sèng-tiān chiù-chōa, chiū-sī kí Sèng-tiān kap tiàm tī hit lāi-bīn ê Siōng-tè chiù-chōa.
22
Lâng kí thiⁿ chiù-chōa, chiū-sī kí Siōng-tè ê pó-chō kap chē tī hit téng-bīn ê Siōng-tè chiù-chōa.
23
“Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín liân phang-liāu, po̍k-hô, poeh-kak, sió-hôe-hiong to hiàn cha̍p-hūn-chi̍t hō͘ Siōng-tè, Lu̍t-hoat só͘ tiōng-sī ê chèng-gī, jîn-chû, kap sìn-si̍t, lín tian-tò hut-lio̍k. Chiah-ê chiah sī lín eng-kai si̍t-hêng--ê; téng-bīn hiah-ê mā m̄-thang hut-lio̍k.
24
Lín chiah-ê chhiⁿ-mî chòe chhōa-lō͘--ê, chi̍t chiah sòe chiah báng-thâng lín to kā lū--chhut-lâi, lo̍k-tô tian-tò kui-chiah kā thun--lo̍h-khì.
25
“Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chiong poe kap pôaⁿ ê gōa-bīn sóe chheng-khì, lāi-bīn khiok tóe-móa tham-io̍k kap hòng-chhiòng.
26
Lín chiah-ê chhiⁿ-mî ê Hoat-lī-sài-lâng ah, tio̍h seng kā poe ê lāi-bīn sóe chheng-khì, gōa-bīn chū-jiân chiū chheng-khì.
27
“Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chhin-chhiūⁿ chhat pe̍h-pe̍h ê bōng, gōa-bīn hó-khòaⁿ, lāi-bīn khiok tóe-móa sí-lâng ê kut-thâu kap ta̍k-hāng ê ù-òe.
28
Lín mā chhin-chhiūⁿ án-ni, gōa-bīn hō͘ lâng khòaⁿ-chòe gī-lâng, lāi-bīn khiok chhiong-móa ké-hó kap put-hoat.
29
“Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chō sian-ti ê bōng, chéng-siu gī-lâng ê kì-liām-pi,
30
koh kóng ‘Goán nā oa̍h tī goán chó͘-sian ê sî-tāi, it-tēng bōe kap in chòe-hé sat-hāi sian-ti’.
31
Án-ni, lín sī teh chèng-si̍t lín ka-kī sī sat-hāi sian-ti ê lâng ê kiáⁿ-sun.
32
Lín chó͘-sian chòe ê pháiⁿ-tāi, chòe lín khì oân-sêng hó lah!
33
Lín chiah-ê to̍k-chôa ê kiáⁿ-sun, kan-kúi ê lâng ah, lín kiám ōe-tàng tô-siám tōe-ge̍k ê hêng-hoa̍t?
34
Só͘-í, góa beh chhe sian-ti, tì-hūi ê lâng, kap keng-ha̍k-kàu-su khì lín hia; in ū-ê ōe hō͘ lín sat-hāi á-sī tèng si̍p-jī-kè, ū-ê ōe hō͘ lín tī lín ê hōe-tn̂g piⁿ-phah, hō͘ lín tùi chit-ê siâⁿ kóaⁿ kàu hit-ê siâⁿ.
35
Án-ni, lín tī tōe-chiūⁿ thâi-sí gī-lâng ê huih-chè lóng kui tī lín sin-chiūⁿ; chiū-sī tùi gī-lâng A-pek lâu ê huih kàu Pí-lī-ka ê kiáⁿ Sat-ka-lī-a tī sèng-só͘ kap chè-tôaⁿ ê tiong-kan lâu ê huih, lóng kui tī lín sin-chiūⁿ.
36
Góa si̍t-chāi kā lín kóng, chiah-ê chè lóng ōe kui tī chit sè-tāi ê lâng.”
37
“ Iâ-lō͘-sat-léng ah, Iâ-lō͘-sat-léng ah, lí thâi-sí sian-ti, koh ēng chio̍h-thâu tìm-sí Siōng-tè chhe-lâi lí chia ê sù-chiá. Góa jōa-chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài!
38
Lín khòaⁿ, lín ê chhù ōe hong-hòe, bô lâng tòa.
39
Góa kā lín kóng, tùi taⁿ í-āu lín choa̍t-tùi khòaⁿ bōe tio̍h góa, ti̍t-kàu lín kóng, ‘Hōng Chú ê miâ lâi Hit-ūi eng-kai siū chheng-chàn!’”
Chinese TTVR
The Bible Society in Taiwan
:
保存笔记