Sogodi von keren kamen te dikhel le o narodo. Kadia, le vorbi svintsi kai si pe lengo čikat ai pe lengo vast si le kuti pria bare, ai si len lunzi čukuri ka lenge tsalia.
Nasul t'avel tumenge, zakonaria ai Farizianuri, athaitoria! Ke tume phandaven le manušenge e amperetsia le čereski, tume inke či dena andre, ai tume či muken te den andre kudalen kai kamen te den andre. [
Nasul t'avel tumenge, zakonaria ai Farizianuri, athaitoria! Ke tume xan sa o mištimos le phivliango, ai ke naročno keren but řudjimata te sikaven ke laše san; anda kudia, tume avena dine pe kris mai zurales.]
Nasul t'avel tumenge, zakonaria ai Farizianuri, athaitoria! Ke tume našen e maria ai e phuv te roden manušes te pařuven les sar tumende; ai, kana arakhen les, tume keren anda leste du-var mai nasul sar tumende.
Nasul t'avel tumenge, kai ningeren le kořen ai phenen: T'avela varekon ke solaxal pa o templo, nai khanči; numa, t'avela varekon ke solaxal pa o sunakai le templosko, vo thodias pe te ninkerel so solaxadias.
Te si varekon, mai phenen tume, solaxal pa o altari, nai khanči; numa, t'avela varekon kai solaxal pa so si pe o altari, vo thodias pe te ninkerel so solaxadias.
Nasul t'avel tumenge, zakonaria ai Farizianuri, athaitoria! Ke tume pokjinen deš pala jekh šel anda e menta, anda o anel ai anda o kumin, numa tume muken so si o mai baro ande o zakono, e kris, e mila ai o čačimos; kudia sas te keren angla savořende, bi te bustren le kaver dieli.
Nasul t'avel tumenge, zakonaria ai Farizianuri, athaitoria! Ke tume miazon sar le groapoševuri parniarde, kai miazon šukar avrial, ai andral si pherde kokala mulenge ai sako fialo mahrime.
Nasul t'avel tumenge, zakonaria ai Farizianuri, athaitoria! Ke tume vazden le groapoševuri le profetonge ai uriaven le groapoševuri kudalenge kai sas vorta,
Sa anda kudia, eta, me tradav tumenge profeton, manuš godiaver ai zakonaria. Tume mudarena ai amblavena le unen, tume marena řaiasa le kavren ande le khangeria židovitsko, ai tume mesaina len foro forostar.
Eta ke te perel pe tumende o rat bi-došalo dino muial pe e phuv, de katar o rat katar o Abel o vorta ži ka o rat katar o Zakaria, šiav katar o Barakia, kai tume mudardian maškar o templo ai o altari.
Jerusalem, Jerusalem, kai mudarel le profeton ai kai mudaren bařensa kudalen kai si tute tradine, sodivar me kamlem te kjidav tjire šiaven, sar e khaini kjidel peske puien tela peske phaka, ai tume či kamlian!