Ani erawh chuan a chhâng a, an hnênah, “Hêng zawng zawng hi in hmu maw? Thu dik ka hrilh a che u, lung intiang rêng rêng hi pakhat mah tihchim lohva hnutchhiah a awm lo vang,” a ti a.
Tin, Oliv tlânga a ṭhut laiin zirtîrte chu anmahni chauhvin a hnênah an lo kal a, “Chûng chu engtikah nge a lo awm ang a, i lo kal lehna leh khawvêl tâwp chhinchhiahna thil mak eng eng nge awm ang, min hrilh teh,” an ti a.
Indo ri te, indo chanchin te pawh in hria ang a, thlaphâng lo tûrin fîmkhur rawh u; chûng chu lo thleng tûr rêng a ni; hun tâwp erawh chu a la ni rih lo ve.
Chumi hun chu a hrehawm êm êm dâwn a ni; chutianga hrehawm chu leilung pian tirh ata tûn thlengin a la awm ngai lo va, awm pawh a awm leh tawh hek lo vang.
Krista der leh zâwlnei derte an lo chhuak dâwn si a; thei ang se thlante meuh pawh an hruai bo theih nân chhinchhiahna leh thil mak ropui tak tak an ti ang.
Chutichuan, in hnênah, ‘Thlalêrah a awm e,’ an tih chuan kal chhuak suh u, ‘En teh u, pindan chhûngrilah a awm,’ an tih pawhin awih duh hek suh ang che u.
“Tin, chûng hun hrehawm chu a liam veleh ni a thim ang a, thla a êng hek lo vang; vân aṭangin arsite a tla ang a, vân thiltihtheihnate chu tihnghîn a ni ang.
Chutih hunah chuan Mihring Fapa chhinchhiahna chu vânah a lo lang ang a, chumi hunah chuan leia chi tinrêngin ṭapin an âwm an chûm ang a, Mihring Fapa hi thiltihtheihna leh ropuina nasa tak nên vân chhûm zînga a lo kal an hmu ang.
Vântirhkohte chu tawtawrâwt ri ruai ruai nên a tîr chhuak ang a, anni chuan thlante chu kâwlkil li ata vân tâwp aṭanga a tâwp lehlam thlengin an lâwr khâwm ang.