|
| 1 |
|
| Omu bunaku obwo, obukama bw'Ow'omu iguru buryashushanisibwa n'abaishiki ikumi, abaagyenzire n'amatabaaza gaabo kuza kubugana kishwera. |
|
| 2 |
|
| Bataano ahari bo bakaba bari abashema, kandi abataano bari abanyabwengye. |
|
| 3 |
|
| Ahabw'okuba abashema ku baatwaire amatabaaza gaabo, tibaagyenda na gandi majuta; |
|
| 4 |
|
| kwonka abanyabwengye bo baatwara amatabaaza gaabo hamwe n'ecupa zirimu amajuta. |
|
| 5 |
|
| Kishwera ku yaatwireho kwija, boona baahungira, baagwejegyera. |
|
| 6 |
|
| Mbwenu omu itumbi haabaho okwamuza bati: Reeba, kishwera yaija! Nimushohore tuze kumubugana. |
|
| 7 |
|
| Batyo abaishiki boona baimuka, baashemeza amatabaaza gaabo. |
|
| 8 |
|
| Reero abashema baagira abanyabwengye bati: Mutuhe aha majuta gaanyu, ahabw'okuba amatabaaza gaitu gaaza kuraara. |
|
| 9 |
|
| Abanyabwengye baabagarukamu bati: Nooshusha oti tigarikwija kutumarira, itwe naimwe; haakiri muze omu batunzi, mugeegurire. |
|
| 10 |
|
| Banu ku baabaire nibakiza kugagura, kishwera yaija, bari abaabaire beeteekateekire, baataaha nawe omu nju aha bugyenyi, orwigi rwakingwa. |
|
| 11 |
|
| Bwanyima abaishiki abo abandi baija, baagira bati: Mukama waitu, mukama waitu, twigurireho! |
|
| 12 |
|
| We yaabagarukamu ati: Buzimazima nimbagambira, tindikubamanya. |
|
| 13 |
|
| N'ahabw'ekyo nu, mugume nimureeba, ahabw'okuba timurikumanya kiro, nobu yaakuba eshaaha. |
|
| 14 |
|
| Kandi obukama bw'Ow'omu iguru buri nk'omuntu owaabaire naayenda kuza eihanga, akeeta abaheereza be, akabatsigira ebintu bye. |
|
| 15 |
|
| Omwe akamuha shilingi obukumi bushatu, ondi akakumi n'enkumi ibiri, n'ondiijo enkumi mukaaga, nka buri omwe oku yaabaire naabaasa; bwanyima atyo akagyenda. |
|
| 16 |
|
| Owaatungire shilingi obukumi bushatu tahwama, agyenda azishuubuza, ashaazyamu ezindi obukumi bushatu. |
|
| 17 |
|
| N'owaatungire akakumi n'enkumi ibiri nawe atyo ashaazyamu ezindi kakumi n'enkumi ibiri. |
|
| 18 |
|
| Kwonka owaatungire shilingi enkumi mukaaga agyenda, atimba ekiina, asherekamu ezo mpiiha za mukama we. |
|
| 19 |
|
| Mbwenu ku haahingwireho omwanya muraingwa, mukama w'abo baaheereza yaagaruka, yaabara nabo ebi yaabatsigiire. |
|
| 20 |
|
| Owaatungire shilingi obukumi bushatu, yaija omu maisho ge areetsire ezindi obukumi bushatu, yaamugira ati: Mukama wangye, okampa shilingi obukumi bushatu; mbwenu nzishaagizemu ezindi obukumi bushatu. |
|
| 21 |
|
| Mukama we yaamugarukamu ati: Yebare, muheereza murungi orikwesigwa! Obaire omwesigwa omu bikye, naanye ndyakuha obushoboorozi, otegyekye ebingi; shemererwa hamwe na mukama waawe. |
|
| 22 |
|
| N'owaatungire akakumi n'enkumi ibiri yaija omu maisho ge, yaamugira ati: Mukama wangye, okampa shilingi kakumi n'enkumi ibiri, mbwenu nzishaagizemu ezindi kakumi n'enkumi ibiri. |
|
| 23 |
|
| Mukama we yaamugira ati: Yebare, muheereza murungi orikwesigwa! Obaire omwesigwa omuri bikye, naanye ndyakuha obushoboorozi, otegyekye ebingi; shemererwa hamwe na mukama waawe. |
|
| 24 |
|
| Reero owaatungire shilingi enkumi mukaaga yaija omu maisho ge, yaamugira ati: Mukama wangye, nkakumanya ku ori omuntu ogumire, ogyesha ebi otabibire, kandi ohunika ebi otaheheerize; |
|
| 25 |
|
| n'ahabw'ekyo nkatiina, naagyenda naashereka shilingi zaawe enkumi mukaaga omu itaka. Mbwenu shilingi zaawe nzizi, ozitware. |
|
| 26 |
|
| Mukama we nawe amugarukamu ati: Iwe muheereza mubi 'we, kandi omweremwa! Okamanya ku ngyesha ebi ntarabibire, nkahunika ebi ntaheheerize? |
|
| 27 |
|
| Okaabaire obiikize empiiha zangye abashuubuzi b'empiiha, haza nkiija ntunga ezangye hamwe n'amagoba gaazo. |
|
| 28 |
|
| N'ahabw'ekyo mumwakye ezo mpiiha, muzihe oine obukumi mukaaga. |
|
| 29 |
|
| Manya weena oine aryaheebwa, kandi atungye bishaagaane; kwonka otaine, n'aku aine aryakaakwa. |
|
| 30 |
|
| Haza ogu muheereza otaine mugasho, mumunagye aheeru omu mwirima, ah'abantu bariririra bakanena enshaya. |
|
| 31 |
|
| Omwana w'omuntu ku ariizira omu kitiinisa kye aine baamaraika be boona, aryashutama aha kitebe kye eky'obugabe eky'ekitiinwa. |
|
| 32 |
|
| Reero ab'amahanga goona baryateeranirwa omu maisho ge, abashoroore nk'oku omuriisa ashoroora entaama omu mbuzi. |
|
| 33 |
|
| Haza entaama azite aha rubaju rwe rwa buryo, kwonka embuzi azite aha rwa bumosho. |
|
| 34 |
|
| Bwanyima omugabe aryagira abari aha rubaju rwe rwa buryo, ati: Imwe, abu Tata yaahaire omugisha, nimwije murye obukama obwabateekateekyeirwe okwiha ensi yaaba kuhangwa; |
|
| 35 |
|
| ahabw'okuba nkaba nyine enjara, mwampa ekyokurya; nkaba nyine eiriho, mwampa ekyokunywa; nkaba ndi omugyenyi, mwankunira; |
|
| 36 |
|
| nkaba njwaire busha, mwanjweka; nkaba ndwaire, mwantaayaayira; nkaba ndi omu kihome, mwanshuura. |
|
| 37 |
|
| Mpaho abahikiriire baryamugarukamu bati: Mukama waitu, tukakureeba ryari oine enjara, haza tukakuriisa; nainga oine eiriho, haza tukakuha ekyokunywa? |
|
| 38 |
|
| Tukakureeba ryari ori omugyenyi, tukakukunira; nari ojwaire, busha, tukakujweka? |
|
| 39 |
|
| Kandi tukakureeba ryari orwaire, nari ori omu kihome, haza tukakushuura? |
|
| 40 |
|
| Omugabe nawe aryabagarukamu ati: Buzimazima nimbagambira nti: Nk'oku mwabikoreire omwe aha banyaruganda abarikuhereerukayo, biri niinye mwabikoreire. |
|
| 41 |
|
| Bwanyima aryagambira abari aha rubaju rwe rwa bumosho, ati: Mundugyeho, imwe abakyeenirwe, muze omu muriro ogutahwaho, ogwateekateekyeirwe Sitaane na baamaraika be; |
|
| 42 |
|
| ahabw'okuba nkaba nyine enjara, timwampa kyokurya; nkaba nyine eiriho, timwampa kyokunywa; |
|
| 43 |
|
| nkaba ndi omugyenyi, timwankunira; nkaba njwaire busha, timwanjweka; nkaba ndwaire kandi ndi omu kihome, timwanshuura. |
|
| 44 |
|
| Nabo baryamugarukamu bati: Mukama waitu, tukakureeba ryari oine enjara, nari oine eiriho, nari ori omugyenyi, nari ojwaire busha, nari orwaire, nainga ori omu kihome, haza tutagire eki twakukorera? |
|
| 45 |
|
| Reero nawe aryabagarukamu ati: Buzimazima nimbagambira nti: Nk'oku mutarabikoreire omwe ahari abo abarikuhereerukayo biri timurabinkoreire. |
|
| 46 |
|
| Mpaho abo baryaza omu kubonabonesibwa okutarihwaho, kwonka abahikiriire bo baze omu magara agatahwaho. |
|
|
|
|