|
| 1 |
|
| Yesuusi hoodesi daanni nooha lowo manna afe, ilaalu iimira fule ofolli. Rosaanosino isiwa martu. |
|
| 2 |
|
| Isino, |
|
| 3 |
|
| «Ayyaanunni buxxinori ba'raadhinoreeti; gordu gashshooti insahona. |
|
| 4 |
|
| Yaaddannori ba'raadhinoreeti; jawaante afidhannona. |
|
| 5 |
|
| Jooguullu ba'raadhinoreeti; baattono ragidhannona. |
|
| 6 |
|
| Keeraanchimmate daafira hudidhannorinna goodhannori ba'raadhinoreeti; kassino yitannona. |
|
| 7 |
|
| Wolu sao agurtannori ba'raadhinoreeti; insa saono agurranninsana. |
|
| 8 |
|
| Xalalu wodaniri ba'raadhinoreeti; Magano la'annona. |
|
| 9 |
|
| Araarsitannori ba'raadhinoreeti; Maganu oosooti yinanninsana. |
|
| 10 |
|
| Keeraanchimmate daafira xiiwantannori ba'raadhinoreeti; gordu gashshooti insahona. |
|
| 11 |
|
| Ane daafira mannu xoni'ne'ro, xiiwi'neronna kaphunni su'ma huni'nero tashshi yoo'ne. |
|
| 12 |
|
| Gordu gashshootira lowo waaga afidhinanni daafira tashshi yoo'ne; hagiidhe. Ki'nera albiidi himanaanono hatto xiiwamanna qarra iillishshinonsa» yaanni rosiisa hanafi. |
|
| 13 |
|
| Yesuusi qole, «Ki'ne tenne gobbara mannaho maxinete; maxine badduro galagalte hiitto ikkite coomma dandiitanno? Gobba fushshine tungeenna mannu kakkadannota agurranna mitturirano di"ikkitanno. |
|
| 14 |
|
| «Ki'ne alamete caabbichooti; ilaalu iima noo katami go'la didandaanno. |
|
| 15 |
|
| Caabbicho xawinse ka'ne mine wo'mankawa xawanno gede tuuqu aana usurranni ikkinnina aanaho gawate gombisannohu dino. |
|
| 16 |
|
| Mannu dancha looso'ne lae gordu Anna'ne galatanno gede, caabbichi'ne mannu albaanni xawo» yii. |
|
| 17 |
|
| Yesuusi lede, «Muse Seeranna himanaanote roso hunammora dayommoha lawoonke'ne. Ani wonshammora ikkinnina diigammora didayommo. |
|
| 18 |
|
| Halaale kuleemmo'ne; gordunna baatto sa'a geeshsha seeru baalu wo'manno ikkinnina, Seeru giddonni shiima fidale woy bicamme diba'anno. |
|
| 19 |
|
| Tenne hajajo giddonni mitte hooffayidita diigannohunna woleno hunanno gede rosiisannohu baalu, gordu Gashshootira hooffayidiha ikkanno. Hajajo baalanta wonshannohunna wolu mannino wonshanno gede rosiisannohu kayinni, gordu Gashshootira roore ikkanno. |
|
| 20 |
|
| Kunnira, keeraanchimma'ne Seeru rosiisaanonna Farisootu keeraanchimmawiinni roora hoogguro, gordu Gashshoote horonta e'inannikkita kuleemmo'ne. |
|
| 21 |
|
| «Albi mannira, ‹Shitinoonte; manna shaannohura yoo yinanni› yinoonnita macciishshitinoonni. |
|
| 22 |
|
| Ani yeemmo'neti kayinni: rodiisira hanqanno baalira yoo yinanni. Qoleno rodoosi, ‹Tidhoottori nookkihu› yee xonannohu baalu songote albira shiqeenna aanasi yoo yinanni. ‹Mullu gowwi› yee xonannohano gaannaamete giira agartannosi. |
|
| 23 |
|
| Fushshaatekki Maganoho shiqishi'ratto yannara giwamoottoha rodookki qaagittoro, |
|
| 24 |
|
| fushshaatekki hakko worte agurte hadhe balaxxe giwamootto rodiikki ledo araarami. Hatto assittohu gedensaanni dagge fushshaatekki Maganoho shiqishi'ri. |
|
| 25 |
|
| «Giwamootto manchi yekkeereennahe isi ledo yoote minira ha'ratto woyite, doogote aana heedhe rakke araarami. Araarama hoogittoro kayinni, yekkeerinohehu yoo yaannohuwa masseennahe, yoo yaannohu qole usurannohura sayise eennahe usuru mine tugamatto. |
|
| 26 |
|
| Halaale kuleemmohena, yinoonnihere mitte saante nafa gattukkinni baaxxite gudittokkinni hakkiichinni difulatto» yii. |
|
| 27 |
|
| Yesuusi qole, «‹Foortinoonte› yinoonnita macciishshitinoonni. |
|
| 28 |
|
| Ani kayinni, ‹Meyata lae yorinoha baala wodanisinni ise ledo foorinohu gede assine kiirranni› yeemmo'ne. |
|
| 29 |
|
| Kunnira qiniiticho illekki cubboho massitannoheha ikkiro fushshite huni. Mannimmakki baala gaannaamete giirara tugantantenni mannimmakki giddonni mitte ille ba'uro woyyate. |
|
| 30 |
|
| Qiniiticho angakki cubboho eessitannoheha ikkiro murte huni. Mannimmakki baala gaannaamete giirara tugantantenni mannimmakki giddonni mitte anga hoogittoro woyyate» yiinsa. |
|
| 31 |
|
| Yesuusi qole, «‹Galtesi mininni fushshe ha'risannohu ha'risate woraqata oose› yinoonni. |
|
| 32 |
|
| Ani kayinni, ‹Foorretenni kainohunni ikkiro ikkinnina, hakkuyi ka'a galtesi fushshe ha'risannohu baalu ise foortanno gede assanno. Galtese agurte hadhinota adhannohu baaluno foorinoho› yeemmo'ne» yii. |
|
| 33 |
|
| Yesuusi lede, «Albi mannira, ‹Kaphu xano xa'nitinoonte; ikkollana Mootichaho xa'nitinoonni xano tidhe› yinoonnita macciishshitinoonni. |
|
| 34 |
|
| Ani kayinni, ‹Horontanni xaartinoonte; Gordu Maganoho ayirrinyu barcima ikkino daafira, gordunnino xaartinoonte. |
|
| 35 |
|
| Baattono Maganu lekkasinni kaxxinotena baattotennino xaartinoonte. Yerusaalame jawu Moote katamaatina Yerusaalametennino xaartinoonte. |
|
| 36 |
|
| Umikki danancho mitto nafa waajjo woy kolishsho assa didandaattona umikkinni xaartooti. |
|
| 37 |
|
| Kunnira, coyidhinanniri addahoro «Ee», kaphohoro «Dee'ni» yiiyye. Hakkuyi ka'i coyi bushuwiinni daannoho› yeemmo'ne» yiinsa. |
|
| 38 |
|
| Yesuusi qole, «‹Ille huninohura illesi hunnona; hinko hiiqqinohura hinkosi hiiqqinona› yinoonnita macciishshitinoonni. |
|
| 39 |
|
| Ani kayinni, ‹Bunshe assanno'ne manchira bado qo'litinoonte. Qiniiticho baqqaalla qawaadannohehura guracho baqqaalla qolisi. |
|
| 40 |
|
| Mittu manchi shamisekki adhara yee yoote minira massihero, kootekkino adhona agurisi. |
|
| 41 |
|
| Qoleno mittu manchi, «Kai ane ledo mito geeshsha ha'nona» yee qarrisihero, ati kayinni ero ledde ledosi ha'ri. |
|
| 42 |
|
| Huucci'rannohehura uyi; liqoo xa'mi'rannohehura liqiissi› yeemmo'ne» yii. |
|
| 43 |
|
| Yesuusi lede, «‹Jaalakki baxi; baarigaarakki giwi› yinoonnita macciishshitinoonni. |
|
| 44 |
|
| Ani kayinni, ‹Baarigaara'ne baxxe; xiibbanno'nerira Magano huuccensa. |
|
| 45 |
|
| Hatto assitiniro gordoho hee'ranno Anni'nera oososi ikkitinanni. Isi bushuullehonna danchuulleho arrishsho fushshanno; keeraanotenna cubbaataammaho xeena gananno. |
|
| 46 |
|
| Baxxanno'nere calla baxxine ma afidhinanni? Qaraxaasine nafa hatto diassitanno? |
|
| 47 |
|
| Roduuwa'ne calla keere haadhinanniha ikkiro ma roorsitiniyya? Daga nafa hatto diassitanno? |
|
| 48 |
|
| Kunnira, gordu Anni'ne guuta ikkinohura, ki'neno guuta manna ikke!› yeemmo'ne» yii. |
|
|
|
|