जस यशायाह परमेश्वरो को संदेश दिनवालान की किताब में लिखीना छै, की परमेश्वर ले अपून च्योलो मसीह थैं क्योछ, “देख, मैं अपूनो दूतस त्यारा अघिल भेजछूँ, जो तैखिन बाटो सुधारोलो।
उ बिरान जागा में रौलो और लोगून धध्या-धध्याभेरन यो बतालो, ‘कि प्रभु परमेश्वरा का ऊँन खिन तुम तैयार हो ज्या, और उ बाँटान तैयार करा जैमें भटे हो भेरन उ उनवालो छै।’”
यो दूत यहूना परमेश्वरो को संदेश दीन वाला छ्यो, उले बिरान जागा यरदन नदी का किनार में अपूनो काम शुरू करछै। जो लोग उक पास आयान उले उनूनथैं क्योछ, “अपून पापून खिन पश्चताप करा और बपतिस्मा ली तब परमेश्वर तुमार पापून माफ कराला।”
यहूदिया प्रदेश और यरूशलम शैहरा का रूनवाला भौत लोग बिरान जागा में यहूना को प्रचार सुणन खिन आयान, और उक बाद उन लोगून ले यो मानभेरन कि हम पापी छा, यहूना का हात ले यरदन नदी में बपतिस्मा लीछ।
और जब यहूना प्रचार करछ्यो, उले लोगून थैं क्योछ, “म्यारा बाद जो उनवालो छै, उ मैं है महान छै, और उ म्यारा बाद जल्दी उनवालो छै और मैं इसो लाकारी को ले नाहातिनू कि उको सेवक बनभेरन झुकभेरन उको जूताक फित्तो खोलि सकू।
थ्वाड़ा बखत का बाद जब राजा हेरोदेस ले यहूना स जेल खान में डलवा दीछ, तब यीशु गलील प्रदेश में ग्यान और लोगून का बीच में परमेश्वरो को राज्य को सुसमाचार प्रचार करछ्य।
एक दिन जब यीशु गलील प्रदेशा का झील का किनार-किनार भटे जानमरेछ्या, तब उनूनले शमौन और उक नान भाई अन्द्रियास झील में जाल ले माछा पकड़ून देखछ्य, किलैकी उन मछुवारा छ्या।
लोग यीशुक उपदेश सुणिभेरन हैरान रैग्या, क्याखिनकि उ मूसा का नियम सिखून वाला नियाती नै, बल्कि उ उनून एक इसा गुरू की नियाती सिखूछ्यो, जैका पास सच्चो अधिकार छ्यो।
उले जोर-जोरले चिल्ला भेरन क्योछ, “हे यीशु नासरी, तैं हमून किलै परेशान करून मरेछै? क्या तैं हमून नाश करून खिन आ रैछै? मैं तैंस जाणछूँ कि तैं को छै? तैं परमेश्वरो को पवित्र च्योलो छै।”
यो देखिभेरन यहूदी सभाघरा का सबै लोग भौतै हैरान हो भेरन, एक-दुसारा थैं पुछून लाग्यान, “यो कसो उपदेश छै? यो तैं कोई नय्या उपदेश छै, उ सच्चा अधिकारा का दगाड़ भूतून ले हुकुम दीछो, और भूत उको हुकुम स मान्नान।”
और यीशु ले भौत लोगून जो कई प्रकारा का बिमारीन ले दुखी छ्या, उनून चंगो करछ्य, भौत लोगून में है भूतून ले निकालछ्य, और यीशु ले भूतून बोलून नी दीछ्या क्याखिनकि भूत यीशु स पछ्याण छ्या कि उ परमेश्वरो को च्योलो छै।
यीशु ले उथैं क्योछ, “सुण, कैंथैं के जन कये, कि मैंले तैंस चंगो करछ्य, पर जाभेरन अपूनास याजक स दिखाये, और कोढ़ भटे ठीक हुना का बारिमें, जेले मूसा ले ठैरा राखछ्य, उ भेंट चढ़ाये, ताकि लोग जाण सकून की तैं चंगो है गैछै।”
पर उ भ्यार, जाभेरन यो बात स भौत सारा लोगून यो बतून लागछ्य कि यीशु ले मैंस चंगो करछ्य, यो कारण ले यीशु फिर सरे आम गौंन में नै जा सक्या, पर भ्यार बिरान जागा में रून लाग्यान; फिरले चारू तरफ भटे लोग उक पास ऊँन लाग्यान।