k'a fɔ u ye ko: «Aw ye taga aw ɲafɛ dugu nin na. Aw dontɔ, aw bena faliden dɔ sirinin ye, mɔgɔ si ma deli ka yɛlɛ min kan fɔlɔ. Aw k'a foni ka na n'a ye.
Yezu donna Zeruzalɛmu kɔnɔ tuma min na, a tagara don Alabatosoba kɔnɔ ka fɛɛn bɛɛ filɛ. O kɔ, tilekun tun be ɲini ka don minkɛ, a n'a ka kalanden tan ni fila bɔra ka taga Betani.
K'a to yɔrɔjan, a ye torosun dɔ ye, furaburu tun b'a la. A tagar'a filɛ yala n'a bena deen sɔrɔ a la. Nga a gwɛrɛla a la tuma min na, a ma foyi sɔrɔ a la furaburu kɔ, bari toro denwaati tun tɛ.
Yezu n'a ka kalandenw sera Zeruzalɛmu tuma min na, a donna Alabatosoba kɔnɔ. Jagokɛla ni sannikɛla minw tun be yen, a y'a daminɛ k'olu gwɛn, ka warifalenbagaw ka tabaliw ni tubani feerebagaw ka sigilanw ɲɔti k'u benben.
Sarakalasebagaw kuntigiw ni sariya karamɔgɔw y'o mɛn tuma min na, u y'a daminɛ ka fɛɛrɛ ɲini Yezu fagako la. U siranna Yezu ɲa, bari a ka kalan tun diyara mɔgɔ caaman ye.
Tiɲɛ na, ne b'a fɔ aw ye ko ni mɔgɔ dɔ y'a fɔ kulu nin ye ko: ‹Wili ka bɔ yan ka taga ben kɔgɔji kɔnɔ,› n'o tigi ma sigasiga a dusu la, n'a lara a la ko a ye min fɔ, k'o bena kɛ, o bena kɛ a ye.
Yezu n'a ka kalandenw segira Zeruzalɛmu tuguni. Ka Yezu to yaalayaala la Alabatosoba kɔnɔ, sarakalasebagaw kuntigiw ni sariya karamɔgɔw ani cɛkɔrɔbaw tagar'a sɛgɛrɛ.