जब यीशु और उनार शिष्य यरूशलम शैहर आयान, त उन बैतफगे और बैतनियाह गौं में पुजनान, यो गौं जैतून पहाड़ा का पास छ्या। तो यीशु ले अपून शिष्यून में भटे द्वी शिष्यून यो कैभेरन भेजछ्य,
“कि सामुनि वाला गौं में जा, और उ गौं में पुजनै तुमून एक किल में गधीक बच्चा बाँदिना को मिलोल, जैमे ऐल तलक कोई नै बैठि र्यो। तुम ऊस खोलभेरन म्यारा पास ल्या।
तब भौत लोगून ले यीशु का स्वागत करून खिन बाँट में अपून-अपून शौल और पंखि बिछा दीयान, और थ्वाड़ा लोगून ले त गाड़ान में भटे खजूर का हांगान काटि-कटि भेरन बाँट में बिछा दीयान।
फिर यीशु यरूशलम शैहर में पुजभेरन मन्दिर में आछ, और चारू तरफ चीजून देखछ्य, अपून बार शिष्यून का दगाड़ वापिस बैतनियाह गौं खिन न्हैजाछो, क्याखिनकि भौत ब्याल हो गैछी।
तब वाँ थ्वाड़ा दूर में उ एक हरिया-भरिया तिमूला का रूख स देखिभेरन उक पास ग्यो, कि उमें भटे खान खिन के फल मिलज्यौ, लेकिन पातून का अलावा और केले नै पायो, क्याखिनकि उ फलो को बखत नै छ्यो।
येक बाद यीशु और उनार शिष्य यरूशलम शैहर में आयान, और उन मन्दिर का खाला में ग्यान; वाँ जो लोग बैठभेरन ब्यापार करून रेछ्या, यीशु उनून वाँ भटे भ्यार निकालून लागछ्य, और उनूनले रूपयान बदलून वालान का मेज और कबूतर बेचन वालान का तखता पलट दीयान।
फिर यीशु ले लोगून थैं क्योछ, “पवित्र-शास्त्र इसो कुंछो, म्येरो मन्दिर सबै जातिन का लोगून खिन प्रार्थना को घर होलो, पर तुमून ले यो प्रार्थना घर स डाकून को अड्डा बना रैछ।”
जब प्रधान याजकून ले और मूसा का नियम सिखून वाला लोगून ले सुणछ्य, कि यीशु ले की करछ्य और की क्योछ, तो उन ऊस मारना का मौका खोजून लाग्यान, पर उन इसो करून खिन डर छ्या, क्याखिनकि भीड़ का सब लोग उकी शिक्षा ले हैरान छै।
दुसारा दिन रातैनि यीशु और उक शिष्य फिर यरूशलम शैहर खिन, उई बाँट भटे वापस जानमरेछ्या, जै बाँट भटे उन आ रै छ्या, तब उनेरि नजर उई तिमूला का रूख में पड़छ्य, जैस यीशु ले श्राप दी रेछ्यो, उ रूख जाड़ तक सुख ग्यान।
मैं तुमूनथैं सच्ची कुंछूँ, जो ले विश्वास ले यो पहाड़ थैं कौलो, ‘तैं याँ भटे उखड़ भेरन समुद्र में जा पड़,’ और उ अपून मन में शक जन करो, बल्कि यो विश्वास करो कि जो उले माँ रैछ परमेश्वर ऊस पुरो करोलो, तब परमेश्वर उ खिन कर द्योलो।
येक कारण मैं तुमूनथैं कुंछूँ, कि जो तुम प्रार्थना में मांगछा, तो विश्वास करा कि परमेश्वर ले पैलि है तुमेरि बिनती सुण है छ्य, और परमेश्वर तुमून खिन कर द्योलो।
इसीकैं यीशु ले फिर क्योछ, कि प्रार्थना करून बखत अगर तुमार मन में के खिनै कोई शिकायत छै; तो पैलि ऊस माफ कर दी, तब तुमोरो पिता जो स्वर्ग में छै, तुमार पाप ले माफ करोलो।
एक बार फिर यीशु और उक शिष्य यरूशलम शैहर में वापस आयान, जब उ मन्दिर में घुमून मरेछ्यो, तब उ बखत प्रधान याजक और मूसा का नियम सिखून वाला लोग और यहूदी अगुवा यीशु का पास आभेरन पुछून लाग्यान,
तब उन लोग आपस में यो बात करून लाग्यान, “अगर हम कुंनू, कि यहूना परमेश्वरा का अधिकार ले बपतिस्मा दीछ्यो, तो उ हमून थैं पुछोलो, फिर तुमूले यहूना में विश्वास किलैं नै कर्यो?
और हम यो ले नै के सकना, कि यहूना स अधिकार लोगून का तरफ भटे छयो, उन डर छ्या कि अगर हम इसी कुंनू, तो लोग गुस्सा हो ज्याला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”