Phenel lenge: Žian ande o gav kai si angla tumende; sar tume dena andre, tume arakhena jekhe magaritsos phanglo, pe savo inke či jekh manuš či bešlo, puter les, ai anen les.
Dikhlias de dural jekh kopači figengi kai sas la patria, vo gelo te dikhel te arakhel vareso; ai, pašilo, vo arakhlias ferdi patria, ke nas inke e vramia t'avel figi.
Von aresle ande o Jerusalem, ai o Jesus dias andre ande o templo. Vo lias pe te gonil kudalen kai bikjinen ai kjinen ande o templo; vo dias muial le skafidia kudalenge kai pařuven love, ai le skamina kudalenge kai bikjinen le gulumbon.
Ai vo sikiarelas ai phenel: Nai ramome: Muřo kher avela akhardo jekh kher řudjimasko sa le themenge? Numa tume, tume kerdian anda leste jekh groapa čorengi.
Me phenav tumenge čačimasa, t'avel varekon ke phenel kakale plaieske: Le tu kothar ai šiude tu ande e maria, ai te patial ande pesko ilo, ai patiala pe ke kudia si t'avel, dikhela ke aresel.
Ai, kana san opre te řudjin tume, te si tume vareso pe varekaske, jertin leske, eta ke tumaro Dad kai si ande o čeri jertil tumenge vi vo tumare bezexa.