“Mpfundzisi, Mozesi asiya amala kutilembera mwambo wa kuti, mamuna angafa mbasiya nkazi mbadzati kubala na iye, m'bale wace wa mamuna asatongwa kuti acite banja na manferwa wa nkazi, toera ansiyire dzindza.
Penepo m'bale wace waciwiri akwata manferwa mbampitisa n'nyumba. Mbwenye iye afambo, mbakhonda kubala na iye ana. Pibodzi-bodzi pyacitikambo na wacitatu.
Pa thangwi ya kulamuka kwa anyakufa, imwe mudzati kupiona pidalembwa m'bukhu ya Mozesi, pidalonga Mulungu pa thundudzi yakugaka mbampanga kuti: ‘Ine ndine Mulungu wa Abharaamu, ndine Mulungu wa Izaki, pontho ndine Mulungu wa Djakobo? ’
Pontho kufuna Mulungu na ntima wathu onsene, na ndzeru zathu zonsene, na mphambvu zathu zonsene, pontho na kufuna ndzako ninga iwe ene, mphyadidi kakamwe kupiringana kupisa ntsembe za pinyama na kucita ntsembe zinango.”
Yezu na kuona kuti nyakudziwisa wa Mwambo atawira mwa ndzeru, ampanga kuti: “Iwe uli dhuzi na Umambo wa Mulungu.” Bulukira penepo kwenda kutsogolo, hadaonekabve tayu munthu akhali na cipapu ca kum'bvundzisa.
Mukhapfundzisa Yezu mu Nyumba ya Mulungu, abvundzisa tenepa: “Kodi ndi thangwi yanji anyakudziwisa a Mwambo asalonga kuti, Kirixtu ndi mwana wa Dhavidhi?
Thangwi iye ene Dhavidhi, alonga na mphambvu za Nzimu Wakucena kuti: ‘Mbuya alonga kuna Mbuya wanga kuti: Khala ku nkono wanga wa madyo, mpaka panaikha ine anyamalwa ako pantsi pa manyalo ako. ’
Pa kupfundzisa, Yezu akhalonga tenepa: “Citani mphole na anyakudziwisa a Mwambo. Iwo asafuna kufamba na nguwo zakulapha, asafuna kumwanyikwa na anthu m'mphambano,
Iwo ndi anthu ana nsambo wa kukwata n'dzidzi ukulu na kuphembera m'manyumba mwa akazi adaferwa na amuna awo, toera kuatapata na kuabera pinthu pyawo. Enewa anadza kaoneswa nyatwa zikulu.”