Achena dui llive te avel e Paskua, kana jalpe o marrno kai inai le levadura. Ta e gazda e poponenge ta e kovacha e zakonoke rodena sar te phanden e Jesuse kojaimaia, ta te mundaren le.
O Jesus lleloia ande Betania, kai o cher e Simonoko, gua kai phenena leke o leproso. Kana beslo pe sinia, avili iek diskinia kai inllarela iek taso alabastroko pherdo meriso kai molale but, phagla o taso ta mukla te perel o meriso pe Jesuseko soro.
Chachimaia phenav tumenge kai ande varesavi phuv kana ka phenen e lachi viasta, ka den orba i katar so cherda gaia diskinia, ta gia ka denpe golli latar.
O purvo llive katar e Paskua kana jalpe o marrno kai inai le levadura, ta kana mundardol o bakro katar e Paskua, e disipulura puchle e Jesuse: ¿Kai mange te chera o jape katar e Paskua?
ta kote kai ka del, phenen e lleneke kai si gazda katar gua cher, kai o Kovachi phenel gia: ¿Savi si e soba kai ka jau me disipulonenchar o jape katar e Paskua?
O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura, e gazda katar e kovacha e zakonoke, ta e phure.
Suako llive sema maskar tumende ta sikavava ando cher e Devleko, ta nikada ni inllarden man phanglo. A sa gala ezgode nakhen te sai cherdol so si pisime ando Pisipe.
O Pedro llelo pala le duratar llik andre ande bar katar o cher e mai bare popoko, ta achilo besindo e llenenchar kai arakhena o cher e Devleko, ta thodepe pasa e iag te lelpe lendar o sil.
O Jesus phenda leke: Ea, me sem. Ta tumen ka dikhen sar o Chavo e Manuseko besel pe rig e chachi katar o Del kai si le sa e zor, ta ka dikhen le sar ka avel pe oblakura e milosoke.
Nesave llene thode te chungarden le, ta phandena leke akha ta chalavena le dumukhenchar ta phenena leke: ¡Apogodisar ko chalada tut! Ta gola kai arakhen o cher e Devleko chalade le pe leko mui.
A o Pedro pale phenda kai ni pinllarel e Jesuse. Mapalal, e llene kai sea kote pale phende e Pedroke: Chachimaia tu san iek lendar, soke i tu san katar e Galilea.
Ondaka isto kote baslo pale o duito o basno, ta o Pedro diape golli kana o Jesus phendaia leke: Trin droma ka phene kai ni pinllare man, ta mapalal ka basel o basno pale o duito. Ta vou thoda te rovel.