اُوں اُنہاں کُوں آکھیا، ”ایجھیاں حیران نہ تھیؤ۔ تُساں یسُوع ناصری کُوں گولھیندیاں ہیوے جیہڑا مصلُوب تھیّا ہا۔ او زندہ تھی گئے۔ او اِتھاں کائنی۔ ڈیکھو ایہ او جاہ ہے جِتھاں اُنہاں اُونکُوں رکھیا ہا۔
او جلدی نال قبر کنُوں باہر نِکل تے بھج پئیاں کیوں جو کمبڑیں تے ہیبت اُنہاں اُتے غالب آ گئی ہئی، تے اُنہاں کہیں کُوں کُجھ نہ آکھیا کیوں جو او ڈردیاں ہَن۔
وَل یسُوع اُنہاں یارہاں شاگرداں اُتے جِیں ویلے او کھانڑا کھاوݨ بیٹھے ہَن ظاہر تھیّا۔ اُوں اُنہاں دی بےاعتقادی تے سخت دِلی اُتے اُنہاں کُوں ملامت کیتی، کیوں جو جِنہاں اُوندے زندہ تھیوݨ تُوں بعد اُونکُوں ڈِٹھا ہا اُنہاں، اُنہاں دا یقین نہ کیتا ہا۔
وَل شاگرداں نِکل تے جاہ جاہ تبلیغ کیتی، تے خُداوند اُنہاں دے نال کم کریندا ریہا، تے اُنہاں معجزیاں دے وسیلے نال جیہڑے نال نال تھیندے ہَن کلام کُوں ثابت کریندا ریہا۔