|
| 1 |
|
| Yesu, ku yaarugire omuri ekyo kyanga, yaaza omu ky'owaabo; abatendekwa be baagyenda nawe. |
|
| 2 |
|
| Sabato ku yaahikire, yaatandika kwegyesa omu iteeraniro; baingi munonga ku baamuhuriire, baamutangaarira, nibagira bati: Ogu muntu ebi byona akabiiha hi? Ni bwengye ki obu yaahairwe obumubaasisa kukora eby'amaani ebi? |
|
| 3 |
|
| Beitu ogu t'omubaizi, mutabani wa Mariya, mukuru wa Yakobo na Yose na Yuda na Simooni? Na banyaanya tibari aha, titubaine? Batyo baamuteeraho entsibo. |
|
| 4 |
|
| Yesu nikwo kubagira ati: Omurangi, ahandi hoona aheebwa ekitiinwa, kureka omu kyanga ky'owaabo, omu baabo n'omu ka ye. |
|
| 5 |
|
| N'ahabw'ekyo tiyaabaasa kukorerayo by'amaani, kureka okukiza abarwaire bakye naabataho engaro. |
|
| 6 |
|
| Yaatangaara ahabw'okutaikiriza kwabo. Mpaho yaagyenda naaraba omu byaro naayegyesa. |
|
| 7 |
|
| Bwanyima yaayeeta eikumi na babiri, yaatandika kubatuma babiri babiri, naabaha obushoboorozi bw'okubinga ebyago. |
|
| 8 |
|
| Yaabaragiira okutatwara kintu kyona omu rugyendo, yaaba ntanda, yaaba ndyanga, nobu zaakuba empiiha omu mifuko yaabo, kureka enkoni; |
|
| 9 |
|
| kandi bagyende bajwaire enkaito, kwonka batajwara ekanzu ya kabiri. |
|
| 10 |
|
| Yaagaruka yaabagira ati: Enju ei muraataahemu, mugigumemu okuhitsya obu murirugayo. |
|
| 11 |
|
| Kandi ahi baraayangye kubaakiira n'okuhurira ebi murikugamba, ku muraaze kurugayo, mukunkumure omucuucu gw'aha bigyere byanyu, gube akamanyiso k'okubashinja. |
|
| 12 |
|
| Batyo baagyenda, baarangirira eby'okwegarukamu, |
|
| 13 |
|
| baabinga ebyago bingi, kandi baasiiga amajuta abarwaire baingi, baabakiza. |
|
| 14 |
|
| Omugabe Herode akahurira ebya Yesu, ahabw'okuba eiziina rye rikaba nirirangaanwa. Obwo abamwe nibagira bati: Yohaana Omubatizi azookire omu bafiire; nikyo eby'amaani ebyo birikukorerwa omuriwe. |
|
| 15 |
|
| Abandi bati: Ni Eliya. Kandi abandi bati: N'omurangi nk'omwe aha barangi aba ira. |
|
| 16 |
|
| Kwonka Herode ku yaakihuriire, yaagira ati: Manya ogwo ni Yohaana ou naatemireho omutwe, azookire omu bafiire. |
|
| 17 |
|
| Herode ogwo niwe yaaragiire bakakwata Yohaana, bakamubohera omu kihome ahabwa Herodiya muka Filipo mwene ishe, ou Herode ogwo yaabaire ahindwire omukazi we. |
|
| 18 |
|
| Ahabw'okuba Yohaana akaba agambiire Herode ati: Omu iteeka tikihikire, iwe okushwera muka mwene sho. |
|
| 19 |
|
| Okwiha obwo Herodiya yaamugirira enziika, yaayenda kumwita kwonka tiyaabaasa; |
|
| 20 |
|
| ahabw'okuba Herode akaba naatiina Yohaana, ahabw'okumumanya ku ari omuntu ohikiriire kandi orikwera; yaaguma amurinzire kutaitwa. Kandi ku yaabaire ahurira ebi arikumugambira, acuramirirwa, kwonka shi amuhurira ashemereirwe. |
|
| 21 |
|
| Bwanyima Herodiya akabona oburyo bw'okukikora, ahabw'okuba Herode aha izooba rw'okwijuka okuzaarwa kwe, akateekyera abaami b'omu kikaari kye n'abakuru b'amahe n'abakungu b'omuri Galilaaya obugyenyi. |
|
| 22 |
|
| Muhara wa Herodiya ogwo, ku yaizire, yaazina, yaasiimwa Herode n'abagyenyi be. Omugabe nikwo kugambira ogwo mwishiki ati: Nshaba kyona eki orikwenda, niinyija kukikuha. |
|
| 23 |
|
| Yaarahira naamugira ati: Niinyija kukuha kyona eki oraashabe, nobu kyakuba ekicweka ky'obugabe bwangye. |
|
| 24 |
|
| Omwishiki yaashohora, yaabuuza nyina ati: Mmushabe ki? Onu ati: Omushabe omutwe gwa Yohaana Omubatizi. |
|
| 25 |
|
| Omwishiki yairuka, yaagaruka ow'omugabe, yaamushaba ati: Niinyenda hati obu, ompe omutwe gwa Yohaana Omubatizi omu rucuba. |
|
| 26 |
|
| Ekyo kyasaasa munonga omugabe; kwonka ahabw'okushangwa yaarahiire n'ahabw'abagyenyi be, yaashoberwa oku araarekye kukora eki yaamugambira. |
|
| 27 |
|
| Omugabe nikwo kutuma ahonaaho omwe aha barinzi, akamuragiira kureeta omutwe gwa Yohaana. Omuserukare atyo agyenda, amutemeraho omutwe omu kihome, |
|
| 28 |
|
| agureeta omu rucuba, aguha omwishiki; omwishiki nawe aguha nyina. |
|
| 29 |
|
| Abatendekwa ba Yohaana ku baakihuriire, baija, baatwara omutumbi gwe, baaguta omu kituuro. |
|
| 30 |
|
| Abatendekwa bakagaruka ahari Yesu, baamugambira byona ebi baakozire n'ebi baayegyeise. |
|
| 31 |
|
| Nawe yaabagira ati: Nimwirooko, muze omu mwanya gwehereire, muhuumureho; ahabw'okuba obwo abantu baingi bakaba nibaija kandi nibagyenda, abatendekwa bataine mwanya nobu gwakuba ogw'okurya. |
|
| 32 |
|
| Batyo baatemba obwato, baaza omu mwanya gwekiikire kwehereera. |
|
| 33 |
|
| Kwonka abantu baingi baabareeba nibagyenda, baabamanya; baaruga omu birorero byona, bairuka baabatangayo. |
|
| 34 |
|
| Ku yaarugire omu bwato, yaareeba ekimbuuro ky'abantu, yaabagirira esaasi, ahabw'okuba bakaba bari nk'entaama zitaine muriisa; atyo yaatandika kubeegyesa bingi. |
|
| 35 |
|
| Mbwenu obwo bukaba buri haihi kwira, abatendekwa be baija ahu ari, baamugira bati: Aha n'eihamba, kandi buri haihi kwira, |
|
| 36 |
|
| n'ahabw'ekyo boohereze, baze kweshakira ebyokurya omu byanga n'omu byaro ebyehinguririizeho. |
|
| 37 |
|
| Yesu yaabagarukamu ati: Mube niimwe mwabaha ebyokurya. Nabo baamugira bati: Mbwenu shi, tugyende tubagurire emigaati ya shilingi magana abiri, tugibahe, bagirye? |
|
| 38 |
|
| Nawe ati: Mwineho emigaati engahi? Nimwirooko mugireebe. Ku baayetegyereize, baamugira bati: Twine etaano n'ebyenyanja bibiri. |
|
| 39 |
|
| Mpaho Yesu yaabaragiira kubashutamya boona aha kanyaatsi kabisi omu miteeko. |
|
| 40 |
|
| Batyo baashutama omu miteeko y'abantu igana igana, n'eya makumi ataano ataano. |
|
| 41 |
|
| Atyo akwata egyo migaati etaano, n'ebyo byenyanja bibiri, aimutsya amaisho, areeba ahaiguru, asiima; egyo migaati agicwamu ebicweka, agiha abatendekwa be kugigaburira abo bantu; n'ebyenyanja byombi abibaganisiza atyo boona. |
|
| 42 |
|
| Boona barya, bahaaga. |
|
| 43 |
|
| Bwanyima batorotoora oburagarika bw'emigaati n'obucweka bw'ebyenyanja, bwijuza ebitenga ikumi na bibiri. |
|
| 44 |
|
| Boona abaariire egyo migaati bakaba bari abashaija enkumi itaano. |
|
| 45 |
|
| Ahonaaho Yesu yaaragiira abatendekwa be kuza omu bwato kumubandiza seeri Beetisaida; obwo we naakiragiira ekimbuuro ky'abantu kugyenda. |
|
| 46 |
|
| Ku yaaherize kubaraga, yaaza omu rushozi kushaba. |
|
| 47 |
|
| Omwabazyo ku gwakiikire, obwato bwashangwa bwagiire hare omu nyanja, kandi we atsigaire wenka aha nkungu. |
|
| 48 |
|
| Ku yaabareebire nibafa kubi nibagoya obwato, omuyaga gubareetsirwe omu maisho, nk'aha kisisiimuko kya kana eky'ekiro, yaabaizira naagyendesa amaguru aha nyanja. Akaba naayenda kubahingura, |
|
| 49 |
|
| kwonka ku baamureebire naagyendera aha nyanja, baateekateeka ngu n'omuzimu, baaborooga; |
|
| 50 |
|
| ahabw'okuba boona bakamureeba, baatiina munonga. Kwonka we ahonaaho yaabaakura naabagira ati: Muhuumure, niinye; mutatiina! |
|
| 51 |
|
| Atyo yaaza omu bwato, yaabashangamu; omuyaga gwatuuza. Baatangaarira kimwe, |
|
| 52 |
|
| ahabw'okuba bakaba batakashoboorokyeirwe eby'egyo migaati; manya emitima yaabo ekaba ekikingiirwe. |
|
| 53 |
|
| Ku baaherize kwambuka, baahika Genesareeti; baatsibika obwato aha nkungu. |
|
| 54 |
|
| Ku baabaire baaruga bati omu bwato, ahonaaho abantu baamumanya, |
|
| 55 |
|
| baatandika kwegaba ebirari omu byanga byona ebiherereireho, baareeta abarwaire babaheekire aha butanda, nibabamushangisa hoona ahi baabaire bahurira ari. |
|
| 56 |
|
| Kandi ei yaabaire aza yoona, yaaba mu byaro, yaaba mu birorero, yaaba mu byanga, bakaba babyamya abarwaire ahu abantu baateeranira, bamweshengyereza ngu nangwa bakore aha mukugiro gw'ekijwaro kye; haza boona abaabaire bagukoraho bakira. |
|
|
|
|