A y'a fɔ jama ye k'u ka sigi duguma. A ye burukun wolonwula ta ka barika la Ala ye. O kɔ, a y'o karikari k'u d'a ka kalandenw ma k'u k'a tilan. U y'a tilan jama cɛ.
Yezu bɔra u ka kuma kala ma, a y'u ɲininga ko: «Mun na aw b'a fɔra ɲɔgɔn ye ko: ‹Buru t'an fɛ minkɛ,› k'o le y'a to ne be kuma ten? Aw te faamuli kɛ halibi wa? Aw hakili ka dɔgɔ wa?
Ne ye burukun duuru karikari k'a di cɛɛ waa duuru ma tuma min na, aw hakili t'o la wa? Aw ye segi joli fa n'a tɔɔ ye?» U y'a jaabi ko segi tan ni fila.
A y'u ɲininga tugu ko: «Ne ye burukun wolonwula tilantilan k'u di mɔgɔ waa naani ma tuma min na, aw ye segi joli fa n'a tɔɔ ye?» U y'a jaabi ko segi wolonwula.
Yezu n'a ka kalandenw tagara Bɛtisayida. Mɔgɔ dɔw tagara Yezu sɛgɛrɛ ni fiɲɛntɔ dɔ ye. U ye Yezu daali ko a ka sabali ka maga o fiɲɛntɔ nin na k'a kɛnɛya.
O kɔ, Yezu ye kuma ta k'a ka kalandenw kalan. A y'a fɔ u ye ko: «Wajibi lo Mɔgɔ Dencɛ ka tɔɔrɔ kosɔbɛ. Cɛkɔrɔbaw ni sarakalasebagaw kuntigiw, ani sariya karamɔgɔw bena ban a la, u ben'a faga, nga tile sabanan loon a faganin kɔ, a bena kunun.»
Nga Yezu y'a ɲaa yɛlɛma k'a ka kalanden tɔw filɛ k'a fɔ Piyɛri ye ko: «E Sutana nin, taga ka bɔ n kɔrɔ, bari i ka miiriya ni Ala ta te kelen ye, i be miiri i n'a fɔ adamaden tɔw.»
O kɔ, Yezu y'a ka kalandenw ni jama wele k'a fɔ u ye ko: «Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A k'a ka gwengwenlɔgɔ ɲun ka tugu ne kɔ.
Bii mɔgɔw banna Ala la, u be hakɛ kɛ. Ni mɔgɔ min maloyara olu ɲana ka ne koo fɔ, ne bena na n Faa ka sebagaya la tuma min na ni mɛlɛkɛ senumanw ye, Mɔgɔ Dencɛ fana bena maloya k'a fɔ k'o tigi ye a ka kalanden ye.»