अर यूं बातों का बाद प्रभु यीशु ल अन्य चेला और मनिख चुणिनि अर जै-जै शहर अर जगह कु जख वेल जांणै की योजना बंणै छै उख ऊं तैं द्वी-द्वी कैरी कै अपड़ा अगनैं भेजि।
हाय खुराजीन शहर अर बैतसैदा नगर का लुखुं पर जु चमत्कार का काम तुम मा करे गैनी जु उ सूर अर सीदोन शहर मा करे जांदा त उ टाट ओड़िके अर छारा मा बैठी के भौत पैली बट्टी मन फिरै दींदां।
वीं बगत यीशु पवित्र आत्मा मा हवे के खुशी से भरि गै अर बोलि, “हे पिता आसमान अर धरती का प्रभु मि तेरु धन्यवाद करदु कि तिल यूं बातों तैं ज्ञानियों अर समझदार बट्टी छिपै के रखि अर बालकों पर प्रगट कैरी हां, हे पिता किलैकि त्वे तैं यु ही अच्छो लगि।”
किलैकि मि तुम मा बुल्णु छौं की भौत सा परमेश्वर का तरपां बट्टी बुल्ण वलो ल अर राजाओं ल चै कि जु बात तुम दिख्दां ऊं तैं दिखुनु पर नि देखि अर जौं बातों तैं तुम सुणदा छा ऊं तैं सुणुनु पर नि सुणि।
एक दिन जब यीशु लुखुं तैं शिक्षा दींणु छों त एक आदिम मूसा की व्यवस्था तैं सिखांण वलो उठि अर यु बोलि के यीशु की अजमैश कन लगि गै कि, “हे उत्तम गुरु जी अनन्त जीवन पर मेरू हक हो यांको मि तैं क्य कन चयणु च?”
वेल जवाब दींनि, कि तु अपड़ा प्रभु परमेश्वर तैं अपड़ा सैरा मन अर अपड़ी सैरा प्राण अर अपड़ी सैरी शक्ति अर अपड़ी सैरी बुद्धि का दगड़ी प्रेम रख अर अपड़ा पड़ोसी से अपड़ा समान प्रेम रख।
यीशु ल एक मिसाल दे के जवाब दींनि, कि एक मनिख यरूशलेम शहर बट्टी यरीहो शहर कु जांणु छो कि इथग मा कि डाकुओं ल वे पर हमला कैरी के वेका कपड़ा अर हर चीज जु वेमा छा वे तैं लुछी दींनि अर मारि पीटि के वे तैं अध्मोरयूँ छोड़ी के चलि गै।
अर वेका संमणी ऐ के अर वेका घावों पर जैतून को तेल अर दाखमधु डाली अर फिर वेका घावों पर पट्टी बंधि अर अपड़ी सवारी पर चड़ै के धर्मशाला मा लीगि अर वेकी सेवा टहल कैरी।
दुसरा दिन वेल द्वी दीनार द्वी दिन की मजदूरी निकाली के भटियारा तैं दींनि अर बोलि, ये कि सेवा टहल कैरी अर जु कुछ तेरु और लगलो उ मि लौटण पर त्वे तैं दे दयुलु।
पर मार्था खांणु पकै-पकै के घबरै गै अर वेका संमणी ऐ के बुल्ण लगि गै “हे प्रभु क्य त्वे तैं कुछ भि चिंता नि च कि मेरी बैंण सभि काम कनु कु यखुली च? त वीं कु बोल कि मेरी मदद कैर।”