Sa tapos sini ang Ginoo nagpili sing setentay dos pa gid ka mga tawo kag iya sila ginpadala sing tagduhaduha sa pag-una sa iya sa tagsa ka banwa kag lugar nga madali na lang niya pagakadtuan.
Nagsiling sia sa ila, “Malapad ang alanyon, pero diutay lang ang mga mangangani. Gani magpangamuyo kamo sa tag-iya sang alanyon nga magpadala sia sing mga mangangani sa iya alanyon.
Kon ang nagaestar dira tawo nga mahidaiton, ibilin sa iya ang inyo panamyaw sang paghidait. Pero kon indi sia mahidaiton, bawia ninyo ang inyo panamyaw sang paghidait.
Magdayon kamo sa sina nga balay, magkaon kag mag-inom sang bisan ano nga ginahanda nila sa inyo, kay ang manugpangabudlay dapat hatagan sang iya suhol. Indi kamo magsagad saylusaylo sing dalayunan.
‘Bisan ang yab-ok sang inyo banwa nga nagatapik sa amon mga tiil amon nga tatakon batok sa inyo. Pero dumdoma ninyo ini, ang paghari sang Dios malapit na sa inyo.’
“Makaluluoy ka man, Corazin! Makaluluoy ka man, Betsaida! Kay kon ang gamhanan nga mga buhat nga ginhimo sa inyo ginhimo sa Tiro kag Sidon, dugay na kuntani ang mga tawo didto nagpungko, nagabayo sing sako kag nagbutang sing abo sa ila mga ulo sa pagpakita nga mag-untat sila sa pagpakasala.
Nagsiling si Jesus sa iya mga gintuton-an, “Ang bisan sin-o nga nagapamati sa inyo, nagapamati sa akon, ang bisan sin-o nga nagasikway sa inyo, nagasikway sa akon. Kag ang bisan sin-o nga nagasikway sa akon, nagasikway sa iya nga nagpadala sa akon.”
Ang setentay dos nagbalik nga may daku nga kalipay. Nagsiling sila, “Ginoo, bisan pa ang mga demonyo nagtuman sa amon sang ginmanduan namon sila sa imo ngalan!”
Pamati kamo! Ginhatag ko sa inyo ang gahom sa pagtapak sa mga man-og kag mga iwiiwi, kag paglutos sa tanan nga gahom sang Kaaway, kag wala sing bisan ano nga makahalit sa inyo.
Pero indi kamo magkalipay tungod kay ang malaut nga mga espiritu nagatuman sa inyo, kundi magkalipay kamo tungod kay ang inyo mga ngalan nasulat sa langit.”
Sa amo nga takna si Jesus nga puno sing kalipay sang Espiritu Santo nagsiling, “O Amay, Ginoo sang langit kag duta, nagapasalamat ako sa imo tungod kay ang imo gintago sa mga maalam kag may mga tinun-an imo ginpakita sa indi mga maalam. Huo, Amay, kay amo ini ang imo nahamut-an nga matabo.
“Gintugyan sa akon sang akon Amay ang tanan nga mga butang. Wala sing may nakakilala sa Anak luas sa Amay, kag wala sing may nakakilala sa Amay luas sa Anak kag sa ila nga mga pinili sang Anak, nga ipahayag ang Amay.”
Dayon si Jesus nagliso sa mga gintuton-an kag nagsiling sa ila nga silahanon lang, “Daw ano ka malipayon sa inyo nga makakita sang mga butang nga inyo ginatan-aw!
Nagasiling ako sa inyo nga madamo nga mga propeta kag mga hari ang naghandom nga makita ang inyo ginatan-aw, pero wala sila makakita, kag nga makabati sa inyo ginapamatian, pero wala sila makabati.”
May isa ka manunodlo sang Kasugoan nga nagtindog sa pagdakupdakop kay Jesus. Nagpamangkot sia, “Manunodlo, ano bala ang dapat ko himuon agod maangkon ko ang kabuhi nga wala sing katapusan?”
Ang tawo nagsabat, “‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga kusog, kag sa bug-os mo nga hunahuna,’ kag, ‘Higugmaa ang imo isigkatawo subong sang imo kaugalingon.’”
Si Jesus nagsabat, “May isa ka tawo nga nagdulhog halin sa Jerusalem pakadto sa Jerico nga ginbanggaan sang mga buyong. Ginkuha nila ang iya tanan nga pagkabutang pati ang iya bayu, ginbakol sia kag ginbayaan nga daw sa patay na.
Ginpalapitan niya ang tawo, ginhaplasan niya sing lana kag bino ang iya mga pilas kag ginbugkosan ini. Dayon ginpasakay niya sia sa iya kaugalingon nga hayop, gindala sa dalayunan kag gin-atipan niya sia.
Sang madason nga adlaw nagkuha sia sing duha ka denario kag ginhatag niya ini sa tag-iya sang dalayunan. Nagsiling sia sa iya, ‘Tatapa sia, kag sa akon pagbalik bayaran ko ikaw sang tanan nga magasto mo sa iya.’”
Sang nagpadayon si Jesus kag ang iya mga gintuton-an sang ila pagpanglakaton, nakaabot sia sa isa ka barangay. May isa ka babayi nga ginahingalanan kay Marta nga nagbaton kay Jesus sa iya balay.
Pero si Marta nagpalibog sang tanan nga mga obra nga iya himuon, gani nagpalapit sia kay Jesus kag nagsiling, “Ginoo, wala ka bala nagakabalaka nga ginapabayaan ako nga nagaisahanon sang akon utod sa paghimo sang tanan nga mga hilimuson? Singgana sia nga magbulig sa akon!”