Zeisu in mun khatah thu ngen a, a tawp khit ciangin a nungzuite khat in, “Topa aw, Johan in ama nungzuite thunget nading ahilh mah bangin, kote zong hong hilh in,” ci-in a ngen hi.
A lawmpa in inn sung panin, ‘Kei hong bawlsia kei in. Tu-in kong kikhak zo hi. Ka tate tawh ka lum khin zo uh hi. Kei thoin nang kong pia zo kei ding hi,’ a ci ding hiam?
“Khatvei ka cih-inah, ngen un. Na nget uh leh, hong pia ding hi. Zong un, Na zon’ uh leh, na mu ding uh hi. Kongkhak kiu un. Na kiuh uh leh, hong kihon’ ding hi.
Bang hang hiam na cih uh leh, a ngente khempeuh in a ngah ding uh hi. A zongte khempeuh in a mu ding uh hi. A kiute khempeuh ading kongkhak a hon’ ding hi.
Note in mi gilo na hi napi-un na tate uh a hoih na piak uh leh, tua sangin vantungah a om na Pa un a ngen mite Kha Siangtho hong pia zaw ding hilo ahi hiam?” ci-in a gen hi.
Zeisu in amau lungsim ngaihsutna thei-in, “Gam sung mi kilem loin a kikhen gam khempeuh in kisia ding hi. Inn khat zong inn dang tawh kilem loin a kikhen leh, a puk ding hi.
Keimah in Beelzebub suangin dawite ka hawlkhia hi, ci-in note’n nong gen man-unah Satan in amah leh amah kilem loin a kikhen leh, ama gam bangci a kip zo ding hiam?
Keimah in Beelzebub suangin dawite hawlkhia leng na tate un kua suangin dawite a hawlkhia ding uh hiam? Tua ahih ciangin, amaute in note tungah thukhen dingte ahi uh hi.
Tua ciangin pai a, amah sangin a gilo zaw dawi sagih va sam a, tua pa sungah a lut uh hi. Tua ahih ciangin, tua pa a pian’ nunung pen in a pian’ masak sangin a sia zaw hi,” a ci hi.
Mihonpite in Zeisu kiangah a kikhop lai takun amah in, “Hih khang mite in mi gilote ahi uh hi. Amau in lim a zon’ uh hangin Jonah lim longal, lim dang amau tungah a kilak kei ding hi.
Khanglam gam kumpinu in thu a khen ciangin tu-a khang mite langkhat ah ding a, amaute a mawhsak ding hi. Bang hang hiam na cih uh leh, amah in Solomon’ lungpilna thu ngai dingin, leimong panin a hong pai hi. Hih lai takah Solomon sangin a lianzaw mi khat a om hi.
Thu a khen ni ciangin Nineveh khua mite in tu-a khang mite langkhat ah ding-in a mawhsak ding uh hi. Bang hang hiam na cih uh leh, Jonah in thu a hilh manin amau mawhna a kisikkik uh hi. Hih lai takah Jonah sangin a lianzaw mi khat a om hi.”
Tua ahih ciangin, mun khat beek mial loin, na pumpi a vak leh, meivak’ vang tang in nang khuavak a hong pia bangin, na pumpi in khuavak tawh a kidim ding hi,” a ci hi.
“Farisaite aw, note in gimna na thuak ding uh hi. Bang hang hiam na cih uh leh, leengmasel leh anis leh meh namkim sehsawm suah sehkhat na piak uh hangin, aman thukhenna leh Pasian itna na nusia uh hi. Adangte tang lo tuan loin, hihte zong tan’ ding kilawm hi.
Farisaite aw, note in gimna na thuak ding uh hi. Bang hang hiam na cih uh leh, kikhopna inn sungah tokhom sang bel ahi zongin, sumbuk ah zahtakna tawh hopihna ahi zongin na deih uh hi.
Note in gimna na thuak ding uh hi. Bang hang hiam na cih uh leh, a kilang lo hankhuk tawh kibang na hi uh hi. A tungah a pai mite in han om ci-in a thei kei uh hi,” ci-in a gen hi.
Zeisu in, “No thukham siate aw, no zong gimna na thuak ding uh hi. Bang hang hiam na cih uh leh, a puak hak van midangte na suat uh hangin, na khutme khat nangawnun na lawng nuam kei uh hi.
Note in gimna na thuak ding uh hi. Bang hang hiam na cih uh leh, na pu na pate un a thah Pasian’ kamsangte’ han na bawl uh a, tua ahih ciangin na pu na pate’ hihsa nate thei-in na awi uh hi.
Tua ahih ciangin, Pasian’ lungpilna in, ‘Kamsangte leh sawltakte amaute kiangah ka sawl ding hi. Amau in tuate kimkhat that uh a, a bawlsia ding uh hi!’
Tua ahih ciangin Abel’ si akipan biakna tau leh biakna innpi kikal a, kithat Zekhariah’ si dongin, leitung pian’ akipan a kibuasa Pasian’ kamsangte khempeuh’ si in hih khang mite tungah a kingen ding hi.
No Thukham siate aw, gimna na thuak ding uh hi. Bang hang hiam na cih uh leh, note in lungpilna’ konghon’na na lakhia uh hi. No lah lut loin, a lut nuamte zong na kham uh hi,” a ci hi.