Khat vei, Jesuh in mun khatah thu a ngen hi. A thunget a mankhit ciangin a nungzuite khat in, “Topa aw, Johan in a nungzuite a hilh bangin kote zong thungetzia hong hilh in,” a ci hi.
Kote tungah a hong mawhte mawh maisakna ka neih bangun ko’ mawhna zong hong maisak in. Ze-etna lian hong thuaksak ke’n,’ ci-in na ngen ding uh hi,” a ci hi.
Tua ciangin Jesuh in a nungzuite kiangah, “Note khatpeuh, na lawmte uh khat inn-ah zankim laitakin pai-in, ‘Lawm aw, anlum lum thum khawng hong leitawi sak in.
amah in a innsung panin, ‘Hong nawngkaisak dah in. Kong ka kalhkhin uh a, ka naupangte tawh ka lum khinzo uh hi. Kong thokhia thei kei a, bangmah kong pia thei kei ding hi,’ ci-in hong dawng ding hi.
Tua ahihleh ke’n kong cihin-ah, a lawm ahihna hangin amah tho tuan loin bangmah a piak loh hangin, a nget teiteina hangin amah tho-in a kisapna teng a pia ding hi.
Note mihoih lo hinapi-in na tate uh tungah a hoih piak ding theithei na hih uhleh, vantung a om na Pa un a ngente tungah Kha Siangtho piazaw kan ding hi lo ahi hiam?” a ci hi.
Ke’n Beelzebul’ vangliatna tawh dawi hawlkhia ka hih leh, na mipihte un kua’ vangliatna tawh hawlkhia ahi uh hiam? Na ngaihsut khialhna uh amaute in hong langsak ding hi.
Tua ciangin Jesuh in, “Mi khatpeuh sung panin dawi a kihawlkhiat khit ciangin a ten nading mun keuna zongin a vak kawikawi hi. A om nading mun a muh loh ciangin, ‘Hong kihawlkhiatna inn mahah lutkik ning,’ ci hi.
Tua ciangin amah paikhia kikin, amah sangin a siazaw dawi sagih hong paipih a, a sungah lutin a teng uh hi. Tua mipa’ pianzia pen a masa sangin hong siazaw hi,” a ci hi.
Jesuh in hih thu a genkhit ciangin mihon lak panin numei khat hong paukhia a, “Nang hong paii numei, a nawi na teep numei, mi hampha mahmah ahi hi,” a ci hi.
Mihonte in Jesuh hong neh semsem uh a, Jesuh in zong a thugen zomlai-in, “Tuhun mite gilo mahmah uh hi. Amaute in lim lamdang ngen uh a, ahi zongin Jonah lim simloh a dang kipia lo ding hi.
Thukhen Ni ciangin leitaw lam gam pana hong pai Kumpinu hong dingin tuhun mite mawhsakna thu hong gen ding hi. Bang hang hiam cih leh Solomon’ pilna thu a za dingin leimong khat panin amah hong pai a, ahi zongin Solomon sangin a lianzaw khat hih lai-ah om hi.
Thukhen Ni ciangin Nineveh khuamite hong dingin note mawhsakna thu hong gen ding uh hi. Bang hang hiam cih leh amaute in Jonah’ thuhilhna a zak uh ciangin a mawhnate uh kisik uh a, ahi zongin Jonah sangin a lianzaw khat hih lai-ah a om hi,” a ci hi.
Tua ciangin Jesuh in, “Kuamah in meivak a vakkhit ciangin a munbu ah koih lo a, lawh zong khuhlo hi. Innsungah a lut mi khempeuh in khua a muhtheih nadingin meivak koihna tungah a koihzaw hi.
Na mittang uh note’ pumpi a dingin meivak tawh kibang hi. Na mit uh ciim leh na pumpi khempeuh un hoihtakin mu thei a, na mit uh maang leh na pumpi uh a dingin khuamial ahi hi.
Tua bang hi peuh leh, meivak a taan ciangin khua na muh uh mah bangin na pumpi uh a dingin khuamialna mun om loin a vekpi-in a taangkim ding hi,” a ci hi.
Tua ciangin Topa in ama kiangah, “No Farisi mite in hai leh kuangte a pualam na siangsak uh a, ahi zongin note na lungsim sung uhah huaihamin na gi kei uh hi.
“No Farisi mite in gimna na thuak ding uh hi. Note in Pasian tungah lengmasel, thuambuak a kipan anteh theipuam dongin sawm-ah-khat pia napi-in, mite tungah thuman ding le Pasian it ding na donkha kei uh hi. Hihte khempeuh na hihkim ding uh hi a, paihkhiat na neih ding uh hi lo hi.
Jesuh in, “No Thukham hilh siate in zong gimna na thuak ding uh hi. Note in a puak hak mahmah ding van, mite tungah na suan uh a, ahi zongin tua van a puakpih dingin na khutmeno khat nangawn uh na tangsak nuam kei uh hi.
Tua ahih manin na pu na pate uh gamtatnate a thukimpih, a tecite na hi uh hi. Bang hang hiam cih leh amaute in kamsangte thatin, note in a han na bawl uh hi.
Tua thu hangin Pasian’ Pilna a kici laibu sungah, ‘Amaute kiangah kamsangte le sawltakte ka sawl ding a, amaute in tua mite pawlkhat bawlsia-in na that ding uh hi,’ ci-in kigelh hi.
Abel a kithah a kipan biakna tau le siangtho mun kikalah a kithat Zekhariah a sihna ciang dong, tua mi thahna hangin gimna a thuak ding uh hi. Ke’n kong cihin-ah, hih thute khempeuh hangin tuhuna mite gim hong kipia taktak ding hi.
No Thukham hilh siate in gimna na thuak ding uh hi. Note in pilna ngah theih nading konghonna tawhtang nei napi-in a sungah note na lut tuan kei uh a, a tum dingin a paite zong lah na khaktan uh hi,” a ci hi.