Wakat kãnga, neb tus tus tigma taaba, n sẽbg taaba, tɩ ya wa b na n fẽda taaba. A Zezi deng n goma ne b karen-biisã n yeel-b yaa: Gũus-y y mens ne Fariisẽ-dãmbã rã-bɩllã sẽn ya zãmbã.
Yaa woto yĩng tɩ bũmb ning fãa yãmb sẽn na gom lik bida pʋgẽ, b na n wʋm-a-la vẽenemẽ. La bũmb nins yãmb sẽn na n walem tʋbẽ, rot pʋsẽ, b na n moon-b-la rot zutu.
Mam na n wilga yãmb y sẽn tog n zoe a soaba. Zoe-y soab ning sẽn tõe n kʋ, la b tõe n kẽes bug-tẽngẽ me wã. N-ye! Mam yeta yãmb tɩ yaa soab kãng la yãmb tog n zoe.
Mam yeta yãmb tɩ ned ning fãa sẽn na n kɩs kaset nebã taoor t'a yaa mam neda, Ninsaal Bi-riblã me na n kɩsa kaset Wẽnnaam malegsã taoor tɩ soab kãng yaa bãmb neda.
B sã n tall yãmb n kẽng karen-dotẽ wall bʋ-kaoodba la pãn-soaadbã taoore, bɩ y da maan yɩɩr ne yãmb sẽn na n gom to-to n yiis y menga, wall y sẽn na n yet tɩ bũmb ning ye.
Dẽ poore, a Zezi yeela b karen-biisã yaa: Yaa woto yĩng tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, wall ne y yĩngã yelle, y sẽn na n yeelg bũmb ning ye.
Ges-y rulg-lɛlem sẽn bɩt to-to. B ka tʋmda, la b ka wĩid lamdo. Baoosgo, mam yeta yãmb t'a Salomo mengã ne a naamã fãa ka tõog n maneg a meng ne fut n yɩ neer wa rulg-lelemd a yembr ye.
Yãmb tẽeb bilf rãmba, sã n yaa tɩ Wẽnnaam nagsa mood sẽn be weoogẽ rũnna, tɩ b na n tugl-b bugum beoogã a woto, bãmb kõn ges yãmb fut yell n yɩɩda?
Koos-y yãmb sẽn tarã n dɩk a ligdã n kõ naong rãmba. Bao-y kord sẽn ka sãamda, la paoong sẽn ka sat arzãn pʋga, zĩig ning wagdr sẽn ka kolgda, la mogd sẽn ka sãamda.
Bark bee tʋmtʋmd kãens zutu, b zu-soabã sẽn na n wa n ta n mik tɩ b neeme. Mam yeta yãmb sɩd-sɩd tɩ b zu-soabã na n sẽba a sẽbdga, n kɩt tɩ b zĩnd rɩɩb zĩigẽ, t'a wa n kõ-b rɩɩbo.
T'a Zezi leok yaa: Dẽ, ãnna n ya tʋmtʋmd sẽn maand sɩda la a tar yam, t'a zu-soabã yeel-a t'a ges a tʋmtʋmdbã yelle, n kõt-b rɩɩb wakat fãa sẽn zemse?
tʋmtʋmd kãng zu-soabã na n waa daar ning yẽ sẽn ka gũud-a, la wakat ning a sẽn ka mi. A zu-soabã na n sɩbga yẽ sõama, n kɩt tɩ bũmb nins sẽn paamd neb nins sẽn ka maand sɩdã paam yẽnda me.
La ned ning sẽn ka mi a zu-soabã raabo, n maan tʋʋmd sẽn tog ne sɩbgre, b na n pãba yẽ bilfu. B sã n kõ ned bũmb wʋsgo, b na n sok-a-la bũmb wʋsgo. La b sã n gũnug ned bũmb wʋsgo, b na n sok-a-la wʋsg n yɩɩda.
Ba na n welga ne a bi-ribla, tɩ bi-ribl welg ne a ba. Ma na n welga ne a bi-pugla, tɩ bi-pugl welg ne a ma. Sɩd ma na n welga ne a bi-paga, tɩ bi-pag welg ne a sɩd ma.
Fo sã n dabd bʋʋd zĩigẽ ne f zabd-n-taaga, bɩ f modg n maneg f yellã ne-a, yãmb sẽn ket sorã zug wakate, tɩ yẽ ra wa tall foom n kẽng bʋ-kaoodba taoore, tɩ bʋ-kaoodbã yõk foom n kõ bi-bees roog gũud t'a kẽes-f bi-bees roog ye.