Niadtong higayona may mga tawo didto nga misugilon kang Jesus mahitungod sa mga taga-Galilea nga gipamatay ni Pilato samtang naghalad sila ngadto sa Dios.
Apan miingon si Jesus kanila, “Nagtuo ba kamo nga labaw pa sila ka makasasala kay sa ubang Galileanhon tungod kay gipamatay kining mga tawhana sa maong paagi?
Mahitungod niadtong 18 nga nangamatay didto sa Siloam kay natumpagan sa tore, naghunahuna ba kamo nga kadto sila mas daotan pa kay sa tanang lumolupyo sa Jerusalem?
Unya misulti si Jesus kanila niining sambingaya: “May usa ka tawo nga may kahoyng igera diha sa iyang parasan. Miadto siya aron pagpangita ug bunga niini apan wala siyay nakaplagan.
Busa miingon siya sa iyang hardinero, ‘Tan-awa ra, tulo na karon ka tuig nga nag-anhian ako dinhi aron pagpangitag bunga niining kahoya, apan wala gayod akoy nakaplagan bisag usa. Busa putla kini kay nag-usik lamang sa katambok sa yuta.’
Ang opisyal sa sinagoga nasuko nga si Jesus nag-ayo sa masakiton sa Adlawng Igpapahulay ug miingon siya sa mga tawo, “May unom ka adlaw nga kita makatrabaho. Anhi kamo nianang mga adlawa kon gusto kamong mamaayo, apan dili sa Adlawng Igpapahulay!”
Mitubag ang Ginoo kaniya, “Mga tigpakaaron-ingnon kamo! Dili ba nga sa Adlawng Igpapahulay bisan kinsa kaninyo mobadbad man sa inyong baka o asno gikan sa kuwadra ug dad-on ninyo kini ngadto sa gawas aron paimnon?
Kini sama sa usa ka liso sa mustasa nga gipugas sa usa ka tawo sa iyang uma. Miturok kini ug nahimong kahoy ug nagsalag ang mga langgam diha sa mga sanga niini.”
Mobangon ang pangulo sa panimalay ug sirhan niya ang pultahan. Unya magtindog kamo didto sa gawas ug magsugod kamo pagtuktok sa pultahan ug moingon, ‘Sir, ablihi intawon ang pultahan!’ Ug motubag siya kaninyo, ‘Wala ako mahibalo kon taga diin kamo!’
Maghilak unya kamo ug magkagot ang inyong mga ngipon inigkakita ninyo kang Abraham, kang Isaac ug kang Jacob ug sa tanang mga propeta didto sa Gingharian sa Dios samtang kamo adto ra sa gawas!
Daghang mga tawo ang mangabot gikan sa sidlakan ug sa kasadpan ug gikan sa amihanan ug sa habagatan nga motambong sa kan-anan didto sa Gingharian sa Dios.
Niadtong higayona, may pipila ka mga Pariseo nga miabot kang Jesus ug miingon kaniya, “Kinahanglan nga mopahawa ka dinhi ug moadto sa ubang dapit kay si Herodes buot mopatay kanimo.”
Si Jesus mitubag, “Adtoa ug suginli kanang mananap nga milo: ‘Naghingilin ako sa mga yawa ug nag-ayo sa mga masakiton karon ug ugma ug sa ikatulo ka adlaw akong taposon ang akong buluhaton.’
“Jerusalem, O Jerusalem! Imong gipamatay ang mga propeta ug gibato ang mga sinugo nga gipadala sa Dios kanimo! Pagkadaghang higayon nga buot ako mogakos sa tanan mong mga anak, ingon sa usa ka himungaan nga nagtigom sa iyang mga piso ilalom sa iyang mga pako apan dili ka buot nga buhaton ko kini!