|
| 1 |
|
| Tú hit-ê sî, ū kúi-nā ê lâng lâi, tùi Iâ-so͘ kóng-khí Pí-lia̍p-to thâi-sí tī chè-tôaⁿ hiàn-chè ê Ka-lī-lī -lâng ê tāi-chì. |
|
| 2 |
|
| Iâ-so͘ ìn kóng, “In-ūi chiah-ê Ka-lī-lī -lâng siū chit-khoán ê chai-lān, lín chiū siūⁿ-kóng in pí kî-tha ê Ka-lī-lī -lâng ū hoān khah-tāng ê chōe sī--bô? |
|
| 3 |
|
| Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông. |
|
| 4 |
|
| Kiám-chhái lín mā siūⁿ-kóng, Se-lô-a ê thah tó--lo̍h-khì ê sî, hō͘ i teh-sí hit cha̍p-poeh ê lâng pí tòa tī Iâ-lō͘-sat-léng lóng-chóng ê lâng ū hoān khah-tāng ê chōe. |
|
| 5 |
|
| Góa kā lín kóng, m̄-sī, lín nā bô hóe-kái, lóng ōe chhin-chhiūⁿ in án-ni bia̍t-bông.” |
|
| 6 |
|
| Āu-lâi, Iâ-so͘ kā in kóng chit-ê phì-jū. I kóng, “Ū chi̍t ê lâng tī i ê phû-tô-hn̂g chèng chi̍t châng bû-hoa-kó-chhiū. I lâi hit-châng chhiū chhē ké-chí, m̄-kú chhē lóng bô. |
|
| 7 |
|
| I chiū tùi kò͘-hn̂g ê lâng kóng, ‘Lí khòaⁿ, góa liân-sòa saⁿ nî lâi chit-châng bû-hoa-kó-chhiū chia chhē ké-chí, chhē lóng bô. Kā i chhò--khí-lâi! Ná tio̍h lâu-teh tìn só͘-chāi?’ |
|
| 8 |
|
| Hit-ê kò͘-hn̂g--ê ìn kóng, ‘Chú-lâng ah, koh kā i lâu chi̍t nî, góa lâi ku̍t sì-piⁿ ê thô͘, koh lo̍h-pûi; |
|
| 9 |
|
| mê-nî nā ū kiat ké-chí chiū hó, nā bô, chiah kā i chhò--khí-lâi.’” |
|
| 10 |
|
| Ū chi̍t ê An-hioh-ji̍t, Iâ-so͘ tī chi̍t ê hōe-tn̂g lāi teh kà-sī lâng. |
|
| 11 |
|
| Ū chi̍t ê hū-jîn-lâng hō͘ siâ-sîn hū-sin, phòa-pīⁿ cha̍p-poeh nî, seng-khu oan-khiau chhun bōe ti̍t. |
|
| 12 |
|
| Iâ-so͘ chi̍t-ē khòaⁿ--tio̍h, chiū kiò i lâi, kā i kóng, “Hū-jîn-lâng, lí ê pīⁿ í-keng hó lah!” |
|
| 13 |
|
| Iâ-so͘ ēng siang-chhiú kā i hōaⁿ; i ê seng-khu sûi-sî chhun-ti̍t, chiū kui êng-kng hō͘ Siōng-tè. |
|
| 14 |
|
| Put-kò hōe-tn̂g ê chú-koán, in-ūi Iâ-so͘ tī An-hioh-ji̍t kā lâng i-pīⁿ, chiū chin siū-khì, tùi chèng-lâng kóng, “Lán ū la̍k ji̍t thang chòe kang, beh i-pīⁿ tio̍h tī chit tiong-kan lâi i, m̄ eng-kai tī An-hioh-ji̍t.” |
|
| 15 |
|
| Chú ìn kóng, “Ké-hó ê lâng, lín ta̍k-ê lâng kiám bô tī An-hioh-ji̍t tùi tiâu--ni̍h tháu gû á-sī lû, khan-khì lim-chúi? |
|
| 16 |
|
| Chit-ê hū-jîn-lâng sī A-pek-la-hán ê kiáⁿ-sun, í-keng siū Sat-tàn sok-pa̍k cha̍p-poeh nî kú, tī An-hioh-ji̍t kā i tháu-pàng kiám m̄ eng-kai?” |
|
| 17 |
|
| Iâ-so͘ kóng chiah-ê ōe ê sî, I ê tùi-te̍k lóng kám-kak kiàn-siàu; só͘-ū ê kûn-chiòng in-ūi I só͘ chòe it-chhè kî-biāu ê tāi-chì lóng chin hoaⁿ-hí. |
|
| 18 |
|
| Iâ-so͘ kóng, “Siōng-tè-kok chhin-chhiūⁿ sím-mi̍h? Góa tio̍h ēng sím-mi̍h lâi pí-phēng? |
|
| 19 |
|
| Siōng-tè-kok chhin-chhiūⁿ chi̍t lia̍p kòa-chhài-chí, ū lâng the̍h-khì iā tī ka-kī ê hn̂g--ni̍h. Kòa-chhài chiām-chiām tōa-châng, chiâⁿ-chòe chhiū, khong-tiong ê chiáu-á mā tī chhiū-ki chòe siū.” |
|
| 20 |
|
| Iâ-so͘ koh kóng, “Góa beh ēng sím-mi̍h lâi pí-phēng Siōng-tè-kok? |
|
| 21 |
|
| Siōng-tè-kok chhin-chhiūⁿ kàⁿ-bú, ū chi̍t ê hū-jîn-lâng the̍h-khì lām tī saⁿ táu mī-hún chòe-hé chhiau, chòe-āu kui-ê lóng hoat--khí-lâi.” |
|
| 22 |
|
| Iâ-so͘ keng-kè siâⁿ-chhī kap chng-kha khì Iâ-lō͘-sat-léng, iân-lō͘ kà-sī lâng. |
|
| 23 |
|
| Ū lâng mn̄g I kóng, “Chú ah, ōe tit-tio̍h kiù ê lâng chin chió sī--bô?” Iâ-so͘ kā in kóng, |
|
| 24 |
|
| “Tio̍h chīn-la̍t tùi oe̍h ê mn̂g ji̍p--khì. Góa kā lín kóng, ū chin chōe lâng siūⁿ-beh ji̍p--khì ia̍h bōe-tàng ji̍p. |
|
| 25 |
|
| Chú-lâng khí-lâi koaiⁿ-mn̂g liáu-āu, lín chiah khiā tī mn̂g gōa phah-mn̂g, kóng, ‘Sian-siⁿ, chhiáⁿ kā goán khui-mn̂g!’ I ōe ìn kóng, ‘Góa m̄ chai lín sī tó-ūi lâi ê lâng.’ |
|
| 26 |
|
| Hit-sî, lín ōe kóng, ‘Goán bat kap lí chòe-hé lim-chia̍h; lí mā bat tī goán ê koe-lō͘ kà-sī.’ |
|
| 27 |
|
| M̄-kú I ōe kóng, ‘Góa kā lín kóng, góa m̄ chai lín sī tó-ūi lâi ê lâng. Lín chiah-ê choh-pháiⁿ ê lâng lóng lī-khui góa!’ |
|
| 28 |
|
| Lín khòaⁿ-tio̍h A-pek-la-hán, Í-sat, Ngá-kok, kap só͘-ū ê sian-ti tī Siōng-tè-kok ê lāi-bīn, ka-kī khiok siū kóaⁿ chhut-khì gōa-bīn, hit-sî lín ōe tī hia thî-khàu, kā-gê-chhiat-chhí. |
|
| 29 |
|
| Lâng ōe tùi tang sai lâm pak lâi, tī Siōng-tè-kok chē-toh chham-ka iàn-hōe. |
|
| 30 |
|
| Án-ni, siōng lō͘-bé--ê ōe chòe tē-it; tē-it--ê ōe chòe siōng lō͘-bé.” |
|
| 31 |
|
| Tú hit-ê sî, ū chi̍t-kóa Hoat-lī-sài-phài ê lâng óa-lâi kā Iâ-so͘ kóng, “Lí tio̍h lī-khui chia khì pa̍t-ê só͘-chāi, in-ūi Hi-lu̍t siūⁿ-beh thâi lí.” |
|
| 32 |
|
| Iâ-so͘ kā in kóng, “Lín khì kā hit-chiah hô͘-lî kóng, ‘Lí khòaⁿ, kin-á-ji̍t, bîn-á-chài góa kóaⁿ-kúi, i-pīⁿ, tē-saⁿ ji̍t oân-sêng góa ê kang-chok. |
|
| 33 |
|
| Sui-jiân sī án-ni, kin-á-ji̍t, bîn-á-chài, kap āu--ji̍t, góa it-tēng tio̍h kè-sio̍k kiâⁿ góa ê lō͘, in-ūi sian-ti bô eng-kai tī Iâ-lō͘-sat-léng í-gōa ê só͘-chāi hō͘ lâng thâi-sí.’ |
|
| 34 |
|
| “ Iâ-lō͘-sat-léng ah, Iâ-lō͘-sat-léng ah, lí thâi-sí sian-ti, koh ēng chio̍h-thâu tìm-sí Siōng-tè chhe-lâi lí chia ê sù-chiá. Góa jōa-chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài. |
|
| 35 |
|
| Lín khòaⁿ, lín ê chhù ōe hong-hòe! Góa kā lín kóng, tùi taⁿ í-āu lín choa̍t-tùi khòaⁿ bōe tio̍h góa, ti̍t-kàu lín kóng ‘Hōng Chú ê miâ lâi Hit-ūi eng-kai siū chheng-chàn!’” |
|
|
|
|