Ak ki mwa kalewenoni, koleenji, “Ki mi chiito age ne ki tinyei mogoywet ne kiga minji mbareennyi ne po sabibuk; ak ki nyo kocheeng' logoegap keetoto, amanyoorchi kiy.
Koleenji riibindetap mbareetap sabibuk, ‘Keero, kenyini ko ne po somok anyoone acheeng'e logoek eng' mogoywoni amanyoorunee kiy: ep koluul; amu nee si koamei ng'ung'unyek puch?’
Ak ogeero, kobogoryot age ne ki tinyei tamirmiryet ne po nyalulet kenyiisyek taman ak sisiit; ak kigarigak, ak ki ma kota komuuchi kochuulgei agot kitigin.
Ki nereech anyun pounindetap sinagogit, amu ki isoop `Jeso chiito eng' peetuutap sabato, ak komwachi tuiyet koleenji, “Miitei peetuusyek lo che nyolu koboisyee piik; obwa anyun eng' peetuusyechooto si kisaabok, ama eng' peetuutap sabato.”
Ago ki wolji Kiptaiyat, koleenji, “Okweek chombilik, tos ma yaatei age tugul eng' okweek eitonyi anan sigiryennyi eng' piiy eng' peetuutap sabato, ak kokweri koe peek?
Ak ye tuun kang'eet chiitap ko po koot, ak koger kurgeet, ak otau anyun otononse eng' saang', ak ogonygony kurgeet, ole, “Kiptaiyat, yaatwech.” Ak kowolwok ineendet kole, “Mangenok, ak ole obunu.”
Koek anyun riirek ak nyeetap kelek, ye tuun ogeer Abraham, ak Isak, ak Jakobo, ak maotik tugul, eng' laitornatetap Kamuktaindet, ak kewiirchok okweeget saang'.
“Ee, Jerusalem, Jerusalem, inyee ne ibare maotik, ak ilage koik che kiyogun! Ki amach konyil ata ayum lagoguk, ko uu ngokyet ne iyumjin aarekyik kebebaikyik, ago ki ma ocham!