Sang isa ka Adlaw nga Inugpahuway si Jesus nagkadto sa pagkaon sa balay sang isa ka pangulo sang mga Fariseo, kag didto ang mga tawo maid-id nga nagpanilag sa iya.
Si Jesus naghambal kag nagpamangkot sa mga manunodlo sang Kasugoan kag mga Fariseo, “Ginatugot bala sang aton Kasugoan ang pagpang-ayo sa Adlaw nga Inugpahuway, ukon wala?”
Dayon nagsiling sia sa ila, “Kon may isa sa inyo nga may bata ukon baka nga mahulog sa bubon sa Adlaw nga Inugpahuway indi bala ninyo pagkuhaon sia gilayon sa sina gid nga Adlaw nga Inugpahuway?”
“Kon may mag-agda sa imo sa punsyon sang kasal, indi ka magpungko sa pinasulabi nga pulongkuan, kay basi may inagda sia nga labi pa ka dungganon sang sa imo,
kag ang nag-agda sa inyo nga duha magapalapit sa imo kag magsiling, ‘Sia ang papungkua dira.’ Ti, mahuy-an ka kag mapilitan sa pagpungko sa labing kubos nga pulongkuan.
Sa baylo, kon ginaagda ka, kadto ka kag magpungko sa labing kubos nga pulongkuan, agod nga kon mag-abot ang nag-agda sa imo magasiling sia sa imo, ‘Abyan, magsaylo ka sa mas maayo nga pulongkuan.’ Ini magapasidungog sa imo sa atubang sang tanan nga mga inagda.
Dayon si Jesus nagsiling sa nag-agda sa iya, “Kon ikaw nagahatag sing panyaga ukon panihapon, indi pag-agdaha ang imo mga abyan, ukon ang imo mga utod, ukon ang imo mga pariente, ukon ang imo mga kasilingan nga manggaranon, basi sila man magaagda sa imo, kag mabaton mo na ang imo balos.
Ang isa sang mga tawo nga nagakaon sa lamisa upod kay Jesus nakabati sini, nagsiling sia sa iya, “Daw ano ka malipayon yadtong mga magakaon sa punsyon sa Ginharian sang Dios.”
Pero ang tagsatagsa sa ila nagpamalibad. Ang nahauna nagsiling sa suloguon, ‘Nakabakal ako sing duta kag kinahanglan nga kadtuan ko kag tan-awon ini. Kon mahimo, pasayluhon mo ako.’
Ang suloguon nagpauli kag nagsugid sini tanan sa iya agalon. Ang agalon sang panimalay naakig kag nagsiling sa iya suloguon, ‘Dalidali ka sa pagkadto sa mga dalan kag sa mga hilithilit sang banwa kag dalha diri ang mga imol, ang mga pingkaw, ang mga bulag kag ang mga piang.’
Gani ang agalon nagsiling sa iya suloguon, ‘Kadto ka sa gwa sang banwa, malapad kag makitid nga mga dalan kag pilita ang mga tawo sa pagkadto agod nga mapuno ang akon balay.
“Ang bisan sin-o nga nagapalapit sa akon kag wala nagahigugma sa akon sing labi pa sang sa iya amay kag iloy, asawa kag kabataan, kautoran nga lalaki kag babayi, kag bisan pa sa iya kaugalingon indi mangin-akon gintuton-an.
Kon ang isa sa inyo nagaplano nga magpatindog sing tore, indi bala nga magapungko sia anay kag isipon ang bili, agod mahibaluan niya kon bala makaigo ang iya kwarta sa pagpahuman sini?
Kon ang hari nga may 10,000 ka mga soldado magpakigsumpong sa isa ka hari nga may 20,000 ka mga soldado nga nagapadulong batok sa iya, magapungko anay sia kag magabinagbinag kon bala may tuman sia nga kusog sa pag-atubang sa nagapadulong nga hari.
Kon indi sia makasarang, magapadala sia sing mga mensahero sa pagsugata sang nagapadulong nga hari samtang malayo pa sia sa pagpangayo sang mga kasugtanan sang paghidait.”
Sa katapusan si Jesus nagsiling, “Sa amo man nga bagay, wala sing isa sa inyo nga mangingintuton-an ko kon indi sia magbiya sang tanan niya nga mga pagkabutang.”
Wala na ini sing pulos para sa duta, bisan sa ginatipon nga higko nga inug-abuno, kundi ginapilak ini sang mga tawo. Gani, magpamati kamo kon may mga dulonggan kamo!”