Jesus lalu bejaku enggau sida murid Iya, “Siku orang kaya bisi siku pemesai ke ngemataka reta iya. Orang bisi bejaku madahka pemesai nya masau duit tuan iya.
Orang kaya nya lalu ngangauka pemesai nya, lalu bejaku ngagai iya, ‘Nama utai tu ti didinga aku pasal nuan? Padahka ngagai aku jalai nuan udah ngemataka reta tengkira aku, laban nuan enda tau agi ngemataka reta tengkira aku.’
Pemesai nya lalu bejaku dalam ati diri, ‘Tuan aku deka muai aku ari pengawa. Nama utai ti patut dikereja aku? Aku enda kering nyangkul, lalu aku malu minta sedekah.
Udah nya pemesai nya nanya siku ti bukai, ‘Berapa pemayuh utang nuan?’ Orang nya lalu nyaut, ‘Seribu pikul gandum.’ Pemesai nya lalu bejaku, ‘Ambi surat utang nuan tu, lalu tuliska lapan ratus.’
Tuan iya lalu muji pemesai ke enda betul ati nya ketegal pemintar iya ngereja utai, laban orang dunya tu pintar agi ngatur utai ti mai penguntung ngagai sida empu ari nembiak penampak.
Lalu Aku madah ngagai kita, gaga orang nyadika pangan kita ngena pengaya dunya, ngambika lebuh utai nya udah abis, kita deka diterima ke dalam rumah ti meruan belama iya.
Barang sapa tau dikarapka ngemataka utai ti mimit, tau mega dikarapka ngemataka mayuh utai, lalu orang ke enda tau dikarapka ngemataka pekara ti mit, enda mega tau dikarapka ngemataka pekara ti besai.
“Nadai orang ulih betuaika dua iku tuan, laban iya deka begedika siku lalu rinduka siku, tauka angkunka siku, lalu mechat siku. Kita enda ulih betuaika Allah Taala enggau duit.”
Nya alai Iya lalu bejaku ngagai sida, “Kita tu orang ke belurus diri empu di mua orang mayuh, tang Allah Taala nemu ati kita; laban utai ti dikangkunka mensia, nya utai ti dipegedika Allah Taala.
“Adat enggau jaku ti ditulis sida nabi mengkang dikena nyentuk ngagai maya John. Tang berengkah ari maya John, Berita Manah pasal Perintah Allah Taala dipadahka ngagai orang mayuh, lalu semua orang bela majakka diri tama ngagai Perintah nya.
Orang kaya nya lalu ngangau, ‘Apai Abraham! Kasihka aku, lalu asuh Lasarus datai kitu ngambika iya nyepuhka ujung tunjuk iya ngagai ai, lalu ngenyelapka dilah aku, laban aku pedis amat merinsa dalam api tu!’
Tang ku Abraham bejaku, ‘Ingat, anak, lebuh nuan agi idup, nuan diberi semua utai ti manah, tang Lasarus diberi semua utai ti jai. Tang diatu iya lantang diau ditu, tang nuan pedis merinsa.
Nambahka nya, ba entara kitai bisi siti darung ti dalam, ngambika orang ke deka meraka ari tu ngagai kita, enda ulih, lalu orang ke deka meraka ari endur kita ngagai kami, pen enda mega ulih.’
Ku orang kaya nya bejaku, ‘Ukai baka nya, apai Abraham! Enti siku orang ke angkat ari mati mansang ngagai sida, nya baru sida deka nesal ati ke dosa sida.’