|
| 1 |
|
| Iâ-so͘ koh tùi bûn-tô͘ kóng chi̍t ê phì-jū, kà-sī in tio̍h siông-siông kî-tó, m̄-thang hoe-sim. |
|
| 2 |
|
| I kóng, “Bó͘ chi̍t ê siâⁿ ū chi̍t ê phòaⁿ-koaⁿ, i bô kèng-ùi Siōng-tè, mā bô chun-tiōng lâng. |
|
| 3 |
|
| Tī hit-ê siâⁿ ū chi̍t ê kóaⁿ-hū it-ti̍t lâi chhē i, kóng, ‘Góa ū chi̍t ê sò͘-siōng ê tùi-thâu, chhiáⁿ lí thòe góa chú-chhî kong-tō.’ |
|
| 4 |
|
| Chit-ê phòaⁿ-koaⁿ chin kú lóng m̄ tah-èng, āu-lâi i ka-kī siūⁿ-kóng, ‘Góa sui-jiân m̄ kiaⁿ Siōng-tè, mā bô chun-tiōng lâng, |
|
| 5 |
|
| m̄-kú in-ūi chit-ê kóaⁿ-hū it-ti̍t lâi kā góa chhá, góa beh thòe i chú-chhî kong-tō, chiah bián i it-ti̍t lâi kô-kô-tîⁿ.’” |
|
| 6 |
|
| Chú koh kóng, “Lín tio̍h thiaⁿ chit-ê put-gī ê phòaⁿ-koaⁿ só͘ kóng ê ōe! |
|
| 7 |
|
| Siōng-tè só͘ kéng-soán ê lâng mî-ji̍t tùi I ai-kiû, I kiám bōe thòe in chú-chhî kong-tō? I kiám ōe thoa-iân chin kú? |
|
| 8 |
|
| Góa kā lín kóng, I chin kín chiū ōe thòe in chú-chhî kong-tō. Chóng-sī, Jîn-chú lâi-lîm ê sî, I tī tōe-chiūⁿ kiám ōe khòaⁿ-tio̍h chit-khoán ê sìn-sim?” |
|
| 9 |
|
| Iâ-so͘ tùi hiah-ê khòaⁿ ka-kī chòe gī-lâng koh khòaⁿ-khin pa̍t-lâng ê lâng ū kóng chit-ê phì-jū: |
|
| 10 |
|
| “Ū nn̄g ê lâng chiūⁿ Sèng-tiān kî-tó; chi̍t ê sī Hoat-lī-sài-phài ê lâng, lēng-gōa chi̍t ê sī ba̍uh-sè--ê. |
|
| 11 |
|
| Hoat-lī-sài-lâng khiā-thêng-thêng ka-kī kî-tó kóng, ‘Siōng-tè ah, góa kám-siā lí, in-ūi góa bô chhin-chhiūⁿ kî-tha ê lâng khióng-hat chhú-châi, put-gī, îm-loān, mā bô chhin-chhiūⁿ chit-ê ba̍uh-sè--ê. |
|
| 12 |
|
| Góa chi̍t lé-pài kìm-chia̍h nn̄g piàn, koh hōng-hiàn choân-pō͘ siu-ji̍p ê cha̍p-hūn-chi̍t.’ |
|
| 13 |
|
| M̄-kú hit-ê ba̍uh-sè--ê khiā tī hn̄g-hn̄g ê só͘-chāi, liân gia̍h-thâu khí-lâi khòaⁿ thiⁿ to m̄-káⁿ, chí-ū tûi-heng kóng, ‘Siōng-tè ah, lîn-bín góa chit-ê ū-chōe ê lâng!’ |
|
| 14 |
|
| Góa kā lín kóng, chōe tit-tio̍h sià-bián tńg-khì in tau--ê sī chit-ê lâng, m̄-sī hit-ê Hoat-lī-sài-lâng; in-ūi thê-ko ka-kī--ê, ōe siū kàng-kē; khut-kē ka-kī--ê, ōe siū thê-ko.” |
|
| 15 |
|
| Ū lâng liân eⁿ-á mā phō-lâi Iâ-so͘ hia, beh hō͘ I hōaⁿ-chhiú chiok-hok; bûn-tô͘ khòaⁿ--tio̍h chiū kā in chek-pī. |
|
| 16 |
|
| M̄-kú Iâ-so͘ kiò in lâi, kóng, “Hō͘ gín-á lâi góa chia, m̄-thang kā in chó͘-tòng, in-ūi Siōng-tè-kok sī chit-khoán lâng ê. |
|
| 17 |
|
| Góa si̍t-chāi kā lín kóng, lâng nā bô chhin-chhiūⁿ gín-á án-ni chiap-siū Siōng-tè-kok, choa̍t-tùi bōe-tàng ji̍p--khì.” |
|
| 18 |
|
| Ū chi̍t ê Iû-thài -lâng ê léng-tō-chiá lâi mn̄g Iâ-so͘ kóng, “Hó ê lāu-su, góa tio̍h chòe sím-mi̍h chiah ōe-tàng sêng-siū éng-oán ê oa̍h-miā?” |
|
| 19 |
|
| Iâ-so͘ kā i kóng, “Lí ná ōe kóng góa sī hó? Siōng-tè í-gōa, bô chi̍t ê sī hó. |
|
| 20 |
|
| Chiah-ê kài-bēng lí lóng bat: ‘M̄-thang kan-îm; m̄-thang hāi-sí lâng; m̄-thang thau-the̍h; m̄-thang choh gūi-chèng; tio̍h hàu-kèng pē-bú.’” |
|
| 21 |
|
| Hit-ê lâng kóng, “Chiah-ê kài-bēng góa tùi sòe-hàn chiū it-ti̍t ū teh chun-siú.” |
|
| 22 |
|
| Iâ-so͘ thiaⁿ-tio̍h chiah-ê ōe, chiū kā i kóng, “Lí iáu khiàm chi̍t hāng. Khì bōe só͘-ū--ê, tit--tio̍h ê chîⁿ lóng pun hō͘ sàn-chhiah-lâng, lí tī thiⁿ-téng chiū ū châi-pó, jiân-āu lâi tè góa.” |
|
| 23 |
|
| Hit-ê lâng chi̍t-ē thiaⁿ-tio̍h chiah-ê ōe, chin siong-sim, in-ūi i hui-siông hó-gia̍h. |
|
| 24 |
|
| Iâ-so͘ khòaⁿ hit-ê lâng chiū kóng, “Ū-chîⁿ-lâng ji̍p Siōng-tè-kok jōa-á-ni̍h khùn-lân! |
|
| 25 |
|
| Lo̍k-tô chhng-kè chiam-phīⁿ mā pí hó-gia̍h-lâng ji̍p Siōng-tè-kok koh-khah kán-tan!” |
|
| 26 |
|
| Thiaⁿ-tio̍h chiah-ê ōe ê lâng mn̄g I kóng, “Nā án-ni, sím-mi̍h-lâng ōe-tàng tit-tio̍h kiù?” |
|
| 27 |
|
| Iâ-so͘ ìn kóng, “Lâng chòe bōe kàu--ê, Siōng-tè lóng ōe.” |
|
| 28 |
|
| Pí-tek kóng, “Goán í-keng pàng-sak goán só͘-ū--ê lâi tè lí lah.” |
|
| 29 |
|
| Iâ-so͘ kā in kóng, “Góa si̍t-chāi kā lín kóng, lâng nā ūi-tio̍h Siōng-tè-kok pàng-sak chhù-the̍h, bó͘, hiaⁿ-tī, pē-bú á-sī kiáⁿ-jî, |
|
| 30 |
|
| tī kim-sè it-tēng ōe tit-tio̍h koh-khah chōe, tī lâi-sè tit-tio̍h éng-oán ê oa̍h-miā.” |
|
| 31 |
|
| Iâ-so͘ chhōa cha̍p-jī sù-tô͘ khì piⁿ--á, kā in kóng, “Taⁿ lán beh chiūⁿ Iâ-lō͘-sat-léng, sian-ti só͘ kì-chài koan-hē Jîn-chú ê it-chhè lóng ōe èng-giām. |
|
| 32 |
|
| I ōe siū chhut-bōe hō͘ Gōa-pang-lâng; in ōe kā I hì-lāng, bú-jio̍k, phùi-nōa. |
|
| 33 |
|
| In ōe ēng piⁿ kā I phah, kā I hāi--sí, tē-saⁿ ji̍t I ōe koh-oa̍h.” |
|
| 34 |
|
| M̄-kú sù-tô͘ tùi chiah-ê tāi-chì lóng bô liáu-kái; chiah-ê ōe ê ì-sù ū tùi in khàm--teh, in m̄ chai Iâ-so͘ teh kóng sím-mi̍h. |
|
| 35 |
|
| Iâ-so͘ teh-beh kàu Iâ-lī-ko ê sî, ū chi̍t ê bông-jîn chē tī lō͘-piⁿ teh kiû-khit. |
|
| 36 |
|
| I thiaⁿ-tio̍h kûn-chiòng tùi hia keng-kè, chiū mn̄g lâng khòaⁿ sī sím-mi̍h tāi-chì. |
|
| 37 |
|
| In kā i kóng, “ Ná-sat-le̍k -lâng Iâ-so͘ teh-beh tùi chia keng-kè.” |
|
| 38 |
|
| I chiū tōa-siaⁿ hoah, “ Tāi-pi̍t ê Kiáⁿ Iâ-so͘, lîn-bín góa!” |
|
| 39 |
|
| Tī thâu-chêng teh kiâⁿ ê lâng kā i chek-pī, kiò i tiām-tiām, m̄-kú i jú tōa-siaⁿ hoah, “ Tāi-pi̍t ê Kiáⁿ, lîn-bín góa!” |
|
| 40 |
|
| Iâ-so͘ chiū thêng-kha, kiò lâng chhōa i lâi. I óa--lâi ê sî, Iâ-so͘ mn̄g i kóng: |
|
| 41 |
|
| “Lí ài góa kā lí chòe sím-mi̍h?” I kóng, “Chú ah, góa ài koh khòaⁿ--kìⁿ!” |
|
| 42 |
|
| Iâ-so͘ kā i kóng, “Hó, hō͘ lí koh khòaⁿ--kìⁿ! Lí ê sìn-sim hō͘ lí tit-tio̍h i-hó!” |
|
| 43 |
|
| I sûi-sî koh ōe khòaⁿ--kìⁿ, chiū tè Iâ-so͘, kui êng-kng hō͘ Siōng-tè. Chèng-lâng khòaⁿ-tio̍h chit-ê tāi-chì, lóng chheng-chàn Siōng-tè. |
|
|
|
|