Sida lalu belabuh bedawaka Iya, ku sida, “Kami nemu orang tu nesatka bansa kami, nagang kami mayar chukai ngagai Raja Besai, lalu ngumbai Diri Kristus, reti nya raja.”
Indah Herod enggau bala soldadu iya deh beduan sereta ngeleseka Jesus. Udah nya iya ngerasukka baju panjai ti manah ba Jesus, lalu ngirumka Jesus pulai baru ngagai Pilate.
lalu bejaku ngagai sida, “Kita udah mai orang tu ngagai aku, madahka Iya udah nesatka orang mayuh. Aku udah mansik Iya di mua kita empu, lalu aku nadai nemu Iya bisi udah ngereja penyalah munyi ti ku kita.
Herod pen nadai mega nemu penyalah Iya, laban iya udah ngirumka Iya pulai baru ngagai aku. Orang tu nadai udah ngereja utai ti tau ngasuh Iya kena ukum bunuh.
Pilate lalu bejaku baru ketiga kali ngagai sida, ku iya, “Nama kebuah? Nama penyalah ti udah dikereja Iya? Aku nadai nemu Iya bisi udah ngereja penyalah ti tau ngasuh Iya kena ukum bunuh! Nya alai aku deka ngasuh Iya disipat, lalu ngelepaska Iya.”
Pilate lalu ngelepaska orang ke dipinta sida, orang ke udah ditutup dalam rumah jil ketegal iya udah mai orang angkat ngelaban perintah lalu udah munuh orang. Pilate lalu nyerahka Jesus ngagai sida, nurutka pinta sida.
Lebuh sida mai Iya ari endur nya, sida nangkap siku orang ke benama Simon orang Sairin, ke baru datai ari menua pesisir deka mansang ngagai nengeri, sida lalu manggaika regang nya ba belakang Simon, lalu mejalka iya ngesan regang nya ngentudi Jesus.
Lebuh sida datai ba endur ti dikumbai “Keruntuk,” sida lalu ngeregang Iya dia sama enggau dua iku orang ke udah ngereja penyalah, siku muak ari kanan, lalu siku muak ari kiba Iya.
Orang mayuh bediri dia nengkilaka Iya, tang bala tuai orang Judah ngeleseka Iya. Ku sida, “Iya ngidupka orang bukai. Awakka Iya ngidupka Diri Empu, enti Iya amat Kristus ti udah dipilih Allah Taala!”
Iya nurunka bangkai Jesus, mungkus Iya ngena kain linin, lalu ngalika Iya dalam kubur ti udah ditebuk ba batu galang, lalu nadai udah kala dikena alai nguburka orang.