Ka di daa niŋ Zɛbidii bihi Jeemsi mini Jɔn bɛn daa nyɛ Saimɔn tumtumdi’ tab’ la gba alahiziba. Ka Yisa yɛli Saimɔn, “Di zɔri dabiɛm, a nyɛla kulipal’ ŋun gbahiri zahim, amaa zuŋɔ zaŋ chana, a ni leela ŋun vɔri ninsalinim’ tiri Naawuni.”
Yisa daa ti be tin’ shɛl’ ni, ka kɔŋ’ ni daa wuligi do’ so niŋgbuŋ zaa ka o sanna ti damd’ o tooni balind’ o yɛra, “N dana, a yi di saɣi, a naan chɛ ka n kɔŋ’ ŋɔ naai ka n kpe n tab’ ni.”
Ka Yisa kpah’ o zuɣu ni yɛli, “Miri ka a yɛli so di yɛla; amaa cham’ ti zaŋ amaŋ’ wuhi maligumaana, ka mali sara shɛli Anabi Musa ni daa sab’ zali zaŋ chaŋ kɔŋ’ tibbu polo la; dina n-ni niŋ a kpaŋbu maa shɛhira niriba sani.”
Yisa daa ti lan wuhiri niriba dahin’ shɛli, ka Farisiinim’ mini Naawuni zaligubaŋdi’ shɛb’ daa ʒi m-mir’ o; bɛ daa yila Jɛrusalɛm mini Galili ni Judia tiŋkpansi na. Ka ti Duuma yiko din daa chɛ ka Yisa tibiri barinim’ maa daa be ŋun’ Yisa sani.
Amaa ka salo galisim zuɣu daa chɛ ka bɛ kɔŋ o zaŋ kpe Yisa sani; ka daa dula duu zuɣusaa ti chib’ voli n-zaŋ o min’ amaŋka maa tiri voli maa ni siɣisi li ti sɔŋ Yisa tooni.
Ka Naawuni zaligubaŋdiba mini Farisiinim’ maa daa bɔhiri bɛ suhuri ni yɛra, “Bɔ n-niŋ ka doo ŋɔ mɔri Naawuni shɛm ŋɔ? Ŋuni n-lee ni tooi chɛ niriba daalahichi paŋ ba ka pa ni Naawuni kɔŋko?”
Ka lan yɛli ba, “Amaa m bɔrimi ni yi baŋ ni Daadam Bia mali yiko din chɛri niriba daalahichi paŋdi ba dunia ŋɔ ni.” Di saha ka o ŋmaligi yɛli doo ŋun gbaya kpi maa, “N yɛr’ a mi, yiɣisima n-zaŋ a daamaŋka kuli!”
Ka Lɛvi maa daa niŋ Yisa saani pam o yiŋa, ka farigudeeriba pam mini ninvuɣ’ shɛb’ daa pahi Yisa min’ o nyaandoliba zuɣu laɣim ʒiya diri bindirigu maa.
Ka Farisiinim’ mini Naawuni zaligubaŋdiba bɛn daa be bɛ ni galim Yisa nyaandoliba maa ka bɔhi ba, “Bɔzuɣu ka yi mini farigudeeriba ni alahichinim’ laɣim timdi diri ka nyura?”
Ka bɛ daa yɛli Yisa, “Jɔn Baptaizira mini Farisiinim’ nyaandoliba lɔri noli waawaayili ka suhiri Naawuni, amaa ka nyin’ nyaandoliba bɛn’ kul diri ka nyura.”
Ka o daa lan ŋahi ba ŋaha ŋɔ yɛli, “So na ʒi n-tooi binyɛr’ palli tani n-liɣi binyɛr’ kurili; dama o yi niŋ lala o cheei binyɛr’ palli maa, ka tam’ palli din liɣi binyɛr’ kurili maa mi ku ŋman’ li.
So mi ku saɣi zaŋ da’ palli le da’ kol’ kura ni, dama o yi niŋ lala da’ palli maa ni chɛhichɛhi kol’ kura maa, ka dam maa kpaai bahi, ka kola maa gba saɣim.