Ka mo a tsenego Ngwakong wa Modimo, a tšea dinkgwa tšela tša go bewa pele ga Modimo, a ja a nea le bao a bego a na nabo, tšona di bego di sa swanela go ka lewa ke motho, ge e se baperisita.
Jesu a re: Ke tlo le botšiša: Se se dumeletšwego go dirwa ka Sabatha ke eng? A ke go dira botse, goba bobe? A ke go phološa bophelo, goba ke go bo senya?
Ge a fologa moo thabeng a na le bona, a ema mo go bego go le molala, a na le lešaba la barutiwa ba gagwe le bontši bjo bogolo bja batho ba ba tšwilego nageng ka moka ya Juda le Jerusalema, le mešikong ya lewatle ya kua Tiro le Sidone.
Le ba lehlogonolo ge batho ba le hloya, ge ba le leleka, ge ba le roga, ge ba hlaswa leina la lena ba re ke le lebe, ba realo ka baka la yena Morwamotho.
Mohla wa tšona le thabe le hlalale, le tsebe gobane moputso wa lena e tlo ba o mogolo kwa magodimong; gobane ke tšona tše botatabo ba di dirilego baporofeta.
Sa lena a e be go rata manaba a lena, le go setša le go adima mo le sa holofelego go boelwa. Ke mo moputso wa lena e tlo go ba o montši, la tlo ba bana ba Yogodimodimo, gobane yena le ba ba sa lebogego, le ba babe, o ba dira ka botho.
Fang, gomme le tlo fiwa; ke mo le tlo go adibetša la tšhelelwa ka seelo se se botse se se katetšwego, se se nago le mohlopa. Gobane seelo se le elago ka sona, ke sona se le tlo go elelwa ka sona.
O ka bolela bjang le ngwana weno; wa re: Ngwanešwana! A nke ke ntšhe lehlokwana leihlong la gago, mola kwata ya ihlong la gago o sa e bone? Moikaketši tena! Thoma o ntšhe kwata mo ihlong la gago, o kgone o boneša wa ntšha lehlokwana leihlong la ngwana weno.
Motho yo botse o tšweletša tše botse diets wa lehumong le le botse la pelo; mme motho yo mobe o tšweletša tše mpe di etšwa mo go befilego; gobane molomo wa gagwe o bolela tše pelo e di falatšago.
O swana le motho e a agago ngwako, a epa moralo a iša fase, a o thea godimo ga lefsika. Mohla wa mafuls a meetse, noka ge e tšhologela ntlo yeo, ya se o šišinye, ka ge e theilwe lefsikeng.
Gomme e a kwago a se dire, o swana le motho e a agilego ngwako mmung o se nago motheo. Ge noka e o tšhologela, o se diege go wa; mme go kgetloga ga ngwako woo ya ba mo gogolo.