O Jesus llelo lenchar, ta kana sea pasa o cher, o sudo bichalda nesave amalen te phenen leke: Gazda, na brigisao, soke ni sem lacho te de ande mo cher.
Soke i me sem manus kai si man zor, ta si tala mo va boñikura, ta phenav goleke: Lla, ta vou llal, a ogoleke: Aide, ta vou avel. Ta kana me phenav me slugake: Cher gaia ezgoda, vou cherel la.
O Jesus chudisailo kana asunda gaia orba, ta dikhla pe llene kai llana pala le ta phenda: Chachimaia phenav tumenge ka ni ando Israel ni maladem pe gachin pachape sargo ande gava manus.
Avilo pase ta istarda e postelia kote kai inllarena e mule, ta e llene kai inllarena le achile. Ondaka o Jesus phenda e lleneke kai muloa: Ternea, chuke phenav: ¡Uste!
E llene kai bichaldaia o Juan avile pasa o Jesus ta phende leke: O Juan gua kai kristil bichalda amen te pucha tut dal san tu gua kai saia te avel o si te adurichara avere.
Ta phenda lenge: Llan ta phenen e Juaneke so dikhlen ta so asunden. Phenen leke kai e korre dikhen, e bange phiren, e leprosura saston, e kasuke asunen, e mule llundinpe ta e chorrenge phendol e lachi viasta.
Kana lleletar e llene kai bichalda o Juan, o Jesus dia orba e llenenge katar o Juan, ta phenela: ¿So llelen tumen te dikhen po pusto? ¿Iek ran chinome e balaviatar?
A te inai gia ¿So llelen te dikhen? ¿Iekhe manuse furiado barimaia? Tumen llanen kai e llene kai furiadon gia ta si ande dragostia zivin samo ande chera e charoke.
Von si sargo e minone kai besen po maskar katar o foro ta urkin ogole minonenge kai llan lenchar ta phenen lenge. Basaldan tumenge ande firura ta ni chelden, llilabiam tumenge llilia zalbake ta ni rovden.
Mapalal avilo o Chavo e Manuseko kai jal ta piel ta phenen letar, gava si iek lleno kai samo jal ta piel mol ta kai si amal e llenenchar kai si publikanura ta e manusenchar kai si bilache.
ondaka avili iek diskinia kai zivila isto ande gua foro ta llanglaia kai o Jesus lleloia te jal ando cher e fariseoko, anda pea iek taso alabastroko pherdo meriso.
Rovindo thodape kai e porrne e Jesuseke, pegachin rovela kai lake ausa perena pe jesuseke porrne. Ta mapalal sukarda len pe balenchar, chumidia len ta thoda pe lende meriso.
O fariseo kai ikhardaia e Jesuse te jal, kana dikhla gua, mislisailo: Gava lleno te aviloia chachimaia iek profeta, llanglaia savi diskinia bilachi si gaia kai dodil le.
O Jesus phenda leke: Dui llene sea unllile iekhe lleneke kai dela unllile ta pe gua radila. Iek saia leke unllile panch stotine denariura, a o gua pinda,
Ondaka, o Jesus dikhla pe diskinia ta phenda e Simonoke: ¿Dikhe gale diskinia? Kana diem ande cho cher tu ni diam man pai me porrnenge, a gaia diskinia jalada me porrne pe ausenchar ta sukarda len pe balenchar.